عربيتك نوعها ايه ؟ و ليه اشتريتها ؟ و ياتري اختيارك كان صح ؟

**Samir Elshahawy** · 20-10-2008 08:23 AM

صباح الخير

انا معايا لانوس 2006 كاملة اشتريتها من سنتين لاني ساكن في الرحاب و وجدت اني بصرف كتير علي التاكسيات و اتوبيس الرحاب مش بيسعفني ده غير عذاب الانتظار و الوقت اللي بيضيع

عربية كويسة بالنسبة لي من حيث سعرها و اقتصادية و اي حد يصلحها وبصراحة لما فكرت ابيعها ماعرفتش اجيب ايه بدلا منها بالفلوس اللي هاتيجي منها

لكن بشكل عام اشعر ان اختياري لها كان صح 100 % في المرحلة الحالية

ياتري انتوا ايه رأيكم ؟ وهل كنتم موفقين في اختياركم ؟

**tutankhamoun** · 20-10-2008 08:35 AM

السلام عليكم
بالنسبة للعبد لله ( نظرة مبدئية لنظرية الشراء لدي )
أنا لما بأشتري أي حاجة لازم تكون إنتاج محلي ( مصري ) أو عربي و هذا نادر وجوده في سوقنا المصري أو إسلامي و ده موجود متمثل في منتجات أندونيسيا و ماليزيا

فوجدت أنني أفاضل ما بين النيسان الصني المصري ( سيارة رائعة بجد )
و البروتون جين 2 .......... و بروتون واجا

و في النهاية و بعد مداولات منزلية مع الزوجة
أستقرينا على البروتون جين 2 و أتكلنا على الله و تم الشراء

ليه أشتريتها

1- تنطبق عليها مواصفات بلد المنشأ حسب نظريتي
2 - كبيرة و عالية عن الأرض و مش بتحك في المطبات
3- موتور قوي و بيساعد في السفر ( طرقي كلها سريعة أو أغلبها )
4-شنطتها ذات مساحة معقولة جدا
5- سعر مناسب و إمكانيات عالية ( كماليات كثيرة )
6- شكلها أكثر من رائع و رياضي بحت

و الحمد لله أرى أن القرار مناسب جدا و السيارة مريحة جدا بالنسبة لي
أعتقد أن أغلب الناس هاتكون مبسوطة من عربياتها إلا اللي عندهم كارثة في أساسيات العربية
و ربنا يبارك للجميع

**OlaOsman** · 20-10-2008 08:57 AM

قبل ما أقرر شراء السيريون لفيت على شوية ماركات و كنت مركزة على الهاتشباك.. مش عارفة ليه مش شايفة نفسي في عربية سيدان خالص. ضمن الهاتش باك اللي حطيتهم في دماغي كانت الهيونداي أتوس و لما قريت عن مشاكل غبور صرفت نظر عنها و بعدين مريت بالسوزوكي الألتو، بس كنت عايزة اتوماتيك فصرفت نظر عنها و ظهرت بعد كده البيكانتو، بس كتير قالوا لي لو عايزة أوتوماتيك يستحسن بلاش كوري، فبعدها ركزت على الياباني و في حدود الفلوس اللي كنت عارفة اني هاقدر أدفعها لقيت السيريون هي أفضل اختيار و استقريت عليها بعد ما قريت عنها كتير في منتدى دايهاتسو و لقيت ان ملاكها بيعشقوها و ماحدش اشتكى منها زي ملاك العربيات التانية فاستخرت الله و فعلا فضلت شهور مش بافكر في عربية غيرها و بانصح الناس انهم يشتروها حتى من قبل ما اشتريها انا.

العربية لحد دلوقتي مريحاني و ملبية كل طلباتي.. يمكن التقييم الكامل ييجي بعد كام شهر لما أبدأ أمرمطها في مشاويري كلها، بس لحد دلوقتي ماليش عليها أي تحفظات إلا بس حتة انها أحيانا بتحك في المطبات لما تكون الشنطة مليانة و معايا ناس في العربية، انما غير كده العربية زي الفل.

**دموع الثلج** · 20-10-2008 11:34 AM

تويوتا ياريس 2008

من خمس سنين كان معايا هوندا سيفك موديل 99 خليجى ومش عاوزه اقولك العربيه دى اتمرمطت مشواير قد ايه بصراحه السيفك سياره تستحمل المشقه بجد

لما قررت اشترى حطيت فى دماغى اول شى <<<< اشترى يابانى تقفيل بلدها>>>

ومع اللف والتفكير حطيت الجراند تريوس وخوفونى من ثباتها خصوصا لانها مرتفعه عن الارض وكمان سعر اعلى فئه فيها مبالغ فيه بالنسبه لامكانيات العربيه فطنشتها

بعدها جات الهوندا سيتى وطلعت تايلاندى طنشتها ومرتاحتش لها
جاء دور التويوتا كرولا وخفت اشترى موديل جديد ويجربوها فيا طنشتها

لقيت اختها الصغيره عجبتنى شكلا ومضمونا خصوصا ان استهلاكى للعربيه يعتبر معدوم لقيت كل الامكانيات اللى محتاجها فى الفول اوبشن الاتوماتيك

واشتريتها وحاسه ان اختيارى صح بنسبه 100% ولو هرجع اشترى هتبقى الياريس او السيفك بس

**ouba2** · 20-10-2008 03:42 PM

سوبارو ليوني موديل 1982 جبناها سنة 1991 والعربية قعدت 10 سنين مافيهاش الهوا ياااااة فكرتوني بايام عزها كانت تسارع اية و ثبات لايوصف ومرونة واداء و.... اهى اهى:k14: هاتخلوني اعيط المهم انها دلوقتي عايزة موتور و عفشة وسمكرة و ....الخ وإن شاء الله ناوين جيب الامبريزا الجديدة

**mrghost** · 20-10-2008 04:25 PM

شاهين 1400 سىسى 2004 كانت اختيارى انا رغم معارضة الوالد بس انا بحب العربيات اللى تتحمل جرى ومطبات وفى نفس الوقت عاليه مش كل شويه اخد مطب بالجنب و قطع الغيار رخيصه جدا مقارنه باى عربيه جديده والاهم من ده كله انه بعد غلاء البنزين بحط بنزين 80 وبكده بقدر امشى بيها مش بشيل هم البنزين

**AHMEDCAR** · 20-10-2008 04:29 PM

فيرنا عربيه كويسه قطع الغيار معقوله شكل كويس منتشره جدا سهوله اعاده البيع قطع غيار متوفره و رخيصه الى حد ما و اعتماديه ( طظ فى التوكيل بعد كده )

**khattab_89** · 20-10-2008 04:37 PM

أوبترا 2009
أنا الحمد لله أشتريتها بعد بعد أستمر سنة و شايف إنها عربية محترمة جدا و أنسب واحدة ليا

**shanodaa** · 20-10-2008 08:12 PM

المشاركة الأصلية كتبت بواسطة SE_coralsea

صباح الخير

انا معايا لانوس 2006 كاملة اشتريتها من سنتين لاني ساكن في الرحاب و وجدت اني بصرف كتير علي التاكسيات و اتوبيس الرحاب مش بيسعفني ده غير عذاب الانتظار و الوقت اللي بيضيع

عربية كويسة بالنسبة لي من حيث سعرها و اقتصادية و اي حد يصلحها وبصراحة لما فكرت ابيعها ماعرفتش اجيب ايه بدلا منها بالفلوس اللي هاتيجي منها

لكن بشكل عام اشعر ان اختياري لها كان صح 100 % في المرحلة الحالية

ياتري انتوا ايه رأيكم ؟ وهل كنتم موفقين في اختياركم ؟

اعشق دايو لانوس

**Samir Elshahawy** · 21-10-2008 02:14 PM

بصراحة يا Shanodaa ليك حق أنا اليومين دول معايا لانسر 1300 و رغم انها اتوماتيك و مريحاني الا اني مفتقد عربيتي الدايو لانوس اللي واقفة تحت البيت

الموضوع: عربيتك نوعها ايه ؟ و ليه اشتريتها ؟ و ياتري اختيارك كان صح ؟

LinkBack

أدوات الموضوع

عرض

-

-

-

-

المواضيع المتشابهه

اسعار الحاجات اللي اشتريتها ل 128 من ساعة ما اشتريتها

ياتري بيحصل ايه في جهاز الكمبيوتر اما الواحد يقفله وينام المصدر: ياتري بيحصل ايه في

عربيتك الياباني ....نوعها اية (تاني مرة)

عربيتك نوعها اية؟؟؟؟؟

عربيتك الياباني نوعها اية......(فكرة كريم منير ...تنفيذ العبد لله)

الكلمات الدلالية لهذا الموضوع

المفضلات

المفضلات

ضوابط المشاركة