الموضوع: تنبيه ومساعدة

السلام عليكم ورحمة الله وبركاته

كل عام وانتم بخير

بالنسبة للمساعدة: من يومين كدة كنت فى بنزينة توتال فى شارع النصر بالمعادى رايح اضبط زوايا لقيت واد كدة شغال فى البنزينة طلب منى يبص على الكبوت فتحت الكبوت بص على القربة وقالى دى فيها صدا لو تحب تغسل دورة المياة قلت ماشى اهو بالمرة نظافة وفعلا غسلت دورة المياة فى البنزينة وكانت فعلا مليانة صدا. تمام لغاية كدة. وبعدين الواد اللى غسل دورة المياة راح بدا يجيب لى عبوات حوالى 1/2 لتر كدة مياة خضراء بيقول دى نوع امريكى ومعبأة فى مصر تركيز 90% ونظيفة جدا وسعر العبوة 20 جنيه. قلت ماشى. راح الواد فضل يملأ قربة المياة بالعبوات دى لغاية بعد العلامة بحتة صغيرة وخدت 12 عبوة. طبعا انا عارف انى اتعمل عليا حوار وهم بيفتحوا لنفسهم شغل على قفايا وفى الآخر معملتش ضبط زوايا لأنى صرفت اللى جيبى واستلفت من واحد زميلى كان معايا. بس السؤال دلوقت: انا فهمت من تعليقات بعض الزملاء فى المنتدى ان المياة الخضراء غلط على سربنتينة الرادياتير الألمونيا خصوصا انى لسه مغير السربنتينة من شهرين بواحدة صينى يعنى مش زى الأصلى. هل فيه ضررة كدة على السربنتينة؟ وهل تنصحوا انى اخفف تركيز المياة الخضراء شوية بمياة عادية؟
بالنسبة للتحذير: زى ما قلت كدة فى الجزء اللى فوق: خللوا بالكم من حوارات البنزينات وخصوصا البنزينة دى للى ممكن يتعامل معاهم

ده انا اتنصب عليا طول وعرض بس الحمد لله مفيش علام ببلاش
طيب انت ايه رأيك فى موضوع السربنتينة ممكن يبقى فيه ضرر بما انها صينى يعنى خامة تعبانة اصلا؟
شكرا على الافادة :)