بصوا يا جماعة من الناحية النظرية البحتة الشارع مش ملك حد و مش من حق اى حد ان يقولك ما تركنش هنا ادام المحل او ادام باب العمارة و مش من حق السايس انه ياخد فلوس على الركن لان الشارع مش بتاع المرحوم عمه.
ده من الناحية النظرية , من الناحية العملية بقى لو حد قالك ما تركنش هنا او ادفع فلوس على الركن هتضطر تنفذ كلامه لأنك مش حاطط حراسة على العربية على طول و ممكن يعمل فيها اى حاجة و لما ترجع تلاقيها مخدوشة او مراياتها مكسورة او مسروقة او من غير طاسات او ازازها مكسور و تسأله او حتى تعمله محضر هيلبس وش الملاك و مش هتقدر تثبت عليه حاجة.
مرة واحد قالى ما تركنش قدام العمارة رحت متعصب عليه و قلتله مش هركن غير قدام باب العمارة لان الشارع مش ملك حد و هددته ان اى حاجة تحصل فى العربية مش هسيبه و هعمله محضر و هحبسه و اطالبه بالتعويض كمان , و النتيجة ان الراجل نسى الموضوع و طلع نام فى بيتهم قرير العين و انا اللى مانمتش الليلة دى و قعدت كل نص ساعة اطلع البلكونة فى عز البرد علشان ابص على العربية و اشوف لو حد بيعمل فيها حاجة.
ما نقدرش نقول غير حسبنا الله و نعم الوكيل.