الموضوع: دردشه حوالين ال byd l3

عايز ادردش معاكم ياجماعه بخصوص العربية دى
انا معجب مسبقا بال f3 وفعلا فكرت اشترى الاوتوماتيك منها لحد ماسمعت وشفت ال l3 على الطبيعه وعجبنى فيها اللى مكانش عاجبنى (وجهة نظر يعنى) وهو التابلوه سواء الالوان والبلاستيك اللى على شكل الخشب اللى بيضايقنى شخصياً وبحسه مستفز
ال l3 اجمل فى التصميم الخارجى والداخلى والعربيه ماشاء الله مليانه كماليات
وكنت متردد علشان مفيش منها اوتوماتيك حالياً بس قولت وفيها ايه لما تبقى مانوال مقابل شكل افضل ومختلف وجديد

السؤال هل قطع الغيار فى العفشه زى عفشة الكورولا الشكل القديم؟ وايه الاجزاء المتطابقه مع ال f3 كقطع غيار ؟؟
وبما اننا فى مصر وشعبها الناصح فمش معنى انتشار ال f3 بالتالى يخلى ال l3 تنتشر لان لى صديق مثلا مهتم بالسيارات ومعجب بال f3 وناوى يشتريها ولما شاف ال l3 عجبته بس برضو هيشترى ال f3 علشان منتشره وموجوده والنقطه الاهم من وجهة نظره انها متجربه فى تاكسيات يعنى العربية بتعمل من 12-18 ساعة شغل فى اليوم

وبالنسبه للاوتوماتيك فى ال BYD للناس اللى جربته بقالها كتير ايه رأيهم وهل مريحهم الاوتوماتيك عموما؟ (مسوقتش اوتوماتيك الا دقائق معدودة)

ونقطه جانبيه كده للى بيروح اسكندريه كتير وخصوصا ان كل الناس معجبه بمركز الصيانه فى الاسكندريه عن القاهرة لدرجة ان فى ناس بتسافر مخصوص علشان الصيانه الدورية
هل تعلم ان ال byd f3 نادرة جدا جدا فى الاسكندريه؟
انا بسافر كتير اوى وملاحظ الموضوع ده لدرجة ان فى ميكانيكيه من كثرة جهلهم بالعربية قالوا عليها عربية زبالة وانا متأكد ان ده جهل وغباوة على بعض لانى قريت وسألت سواقين تاكسى عليها كتير

الناس شايفه مستقبل ال l3 ايه وايه اللى متخوفين منه؟
ياريت تبقى مناقشه مفتوحه نتبادل فيها الخبرات وياريت اللى يعرف معلومات عن المعارض اللى فيها وتمنها فى المعارض كام ودفعة الحجز وخلال اد ايه بتستلم