الموضوع: انا رحت التوكيل .. وماعملتش حاجة d:

الناس كلها قعدت تقول بلاش تعامل مع التوكيل .. مالهوش لازمة
وانا اقتنعت .. وبعد ما اقتنعت .. قعدت ادور على الزيت المناسب للعربية
ولاقيت كلام كتير
وكل واحد (غالباً) مقتنع بالزيت اللى بيستخدمه
بس كان فى شبه إجماع على زيت شل الأصفر
المهم قلت اروح بنزينة شل واغير الزيت
اكتشفت ان بنزينة شل قفلت من سنتين تقريباً D:
قلت طب كفاية وجع دماغ بئى وروح التوكيل ويعملوا اللى يعملوه
اتصلت برقم مختصر ردت عليا واحدة
قلت لها (بالنص) عايز احجز صيانة الألف لعربية ماروتى فى فرع الهايكستب.
ادتنى رقم موبايل وقالت لى كلم الرقم ده
كلمت الرقم محدش بيرد
طول اليوم ماحدش بيرد
تانى يوم محدش بيرد ..
كلمتها تانى .. قالتلى والله هو ده الرقم وحضرتك معلش حاول تانى هما بيبئى عندهم ضغط تليفونات
قلتلها لاء .. ضغط تليفونات طول اليوم ده شىء مش حقيقي
الضغط فى وقت معين إنما مش طول اليوم
وقلتلها طيب انا عايز احجز صيانة اعمل ايه دلوئتى
قالتلى
"حضرتك ممكن تروح من غير ماتحجز"
قلتلها طب متشكرين
لغاية هنا وكنت اقتنعت تماماً ان كده التوكيل فاكس
وقلت اخوض المغامرة من باب التجربة
وانا مجهز نفسي نفسياً ان الأمور مش هتمشى سليمة
تانى يوم رحت عليهم الساعة 9 ونص تقريباً
استقبلنى رجل الأمن وقالى حضرتك حاجز؟
قلتله لاء
قالى طيب حضرتك اركن هنا (برة) وادخل احجز
دخلت
اول مكتب كلمت الشخص اللى قاعد عليه
ودار الحوار التالى
- عايز اعمل صيانة الألف لعربية ماورتى
- حضرتك لازم تحجز قبل ماتيجي ومش هينفع نعملك حاجة النهاردة
واول حجز بعد العيد يوم الخميس (الكلام ده كان يوم الأحد .. الوقفة)
- معلش انا اتصلت بالرقم المختصر وقالى انه ينفع اجى من غير ماحجز
- إحنا معندناش رقم مختصر :D
- يعنى انا اتصلت بشركة تانية
- اه حضرتك اكيد اتصلت بشركة تانية
- طب انا بتصل برقمكم بئالى يومن وانتوا مابتردوش
- اتفضل حضرتك ده كارت بالأرقام بتاعتنا

ببص على الكارت لاقيت الرقم اللى كان معايا بتاع فرع ابو رواش .. مش الهايكستب D:

- شركة تانية هتدينى الرقم بتاعكم ازاى
- يمكن حضرتك ده رقم بتاع المبيعات ولا حاجة
- طيب انا عايز اعمل شكوى دلوقتى
- حضرتك ممكن تتصل على الرقم المختصر .. ممكن يكون الرقم ده بتاع الشكاوى (اه والله قالى كده D: )
- يعنى انا اتصل بالناس واقولهم انا عايز اشتكيكم .. مافيش رقم إدارة عندكم

راح كاتبلى رقم أرضى على الكارت .. وخدت الكارت وخرجت
اتصلت بالرقم الأرضى .. رد عليا شخص .. ودار الحوار التالى (باختصار)

- انا عندى مشكلة فى فرع الهايكستب وعايز اعمل شكوى
- اتفضل حضرتك
- (حكيت له الحوار )
- احنا بنعتذر لحضرتك عن الخطأ الغير مقصود ..... الخ
- ياريت بس حضرتك حد يفهم الناس اللى بترد على التليفون نظام الشغل عندكم.

طلعت من التوكيل على بنزينة موبيل فى المنطقة عندى
قلت هغير نفس الزيت اللى بيغيروه فى التوكيل xhp
جنب البنزينة فى محل زيت .. بضرب عيني جوة المحل لاقيت جركنين شل أصفر D:
وانا دايخ عليه بره وهو جنب البيت عندى
اشتريت واحد ودخلت البنزينة غيرته .. وكنت جايب فلتر زيت من فترة غيرته هو كمان

المهم انا من ساعة ماغيرت الزيت .... وعادى يعنى
ولا العربية بئت احسن ولا بئت اوحش
هى الحمد لله كانت كويسة
بس انا كنت بشوف معظم الناس بتقول انا من ساعة ماغير الزيت والعربية فرقت معايا جامد
الصراحة انا مش حاسس بأى فرق سواء للأحسن او للأوحش
هو الحمد لله طبعاً
بس انا قلت انقلكم التجربة

المشاركة الأصلية كتبت بواسطة ahmed metwally

الله يبارك فيكم يا شباب

وبخصوص الزيت .. انا حسيت انه إيحاء
وحاولت اوحى لنفسي ان فى حاجة اتغيرت d:
بس مافيش خالص .. الحمد لله :)

يمكن الناس بتحس بفرق لان الكهرباء بتتظبط والسيور تتشد في صيانه الألف, انما نوع الزيت لوحده ماعتقدش ان بياثر عل ىالسحب خالص ممكن درجه الحرارة بس .