الموضوع: طريق مرسى مطروح !!

المشاركة الأصلية كتبت بواسطة shoshasam

تقريبا 5 شهور !!
ليه ؟ هما لغوا مطروح ولا ايه :d

هههههههههه بسال بس علشان لو كنت سافرت مثلا السنة الى فاتت ممكن يكونو حطو كمييين السنادى :)

المشاركة الأصلية كتبت بواسطة georgedada82

في رادار موجود دايما قبل مدخل مطروح وعلي طول الرادار ده موجود وبيدققوا علي الحزام وكده
وبعد الحادثتين الاخيرين اللي حصلوا عند مارينا اكيد هيبقي في اكتر من كمين علي السكة خاصة الايام دي
اما عن الاماكن الكويسة ... حضرتك عندك منطقة فندق البوسيت وطلعت حرب دي من احسن المناطق هناك
عند شاطئ الغرام ده برضو من احسن الشواطئ ... شاطئ مينا حشيش حلو بس يعيبه ان مفيش خدمات علي الشاطئ
الابيض وعجيبة ... دي كده تقريبا كل مطروح ... في منطقة عند فتح الله علي البحر اللي هي عند المحافظة فيها ماكدونالدز وبيتزا هت وكنتاكي وكوك دور ... ماك وكوك دور واخدين اماكن علي البحر مباشرة القعدة فيها مجانية
في وشهم في حلواني صابر برضو ومطعمم حسني وعامل كافيه برضو جديد علي البحر ... كل ده في مربع واحد ... وبالنسبة لو عاوز تشتري حاجة هناك في فتح الله ... ولو عاوز مطعم كويس وقعدات عربي في كوكو العربي هناك مطعم جامد جدا وكمنة ... رحلة سعيدة ... وانصحك روح بالعربية عشان تقدر تلف وتستمتع في اي وقت انا روحت مرة بدون عربية كانت غلطة بصراحة العربية توديك اي مكان انت عاوزه في اي وقت ولا تتفق مع سواق وما يجيلكش ولا الكلام ده كله عربيتك وقت ما تحب تتحرك اتحرك ووقت ما تحب ترتاح ترتاح ... واتمني لك رحلة سعيدة

ربنا يخلييييك يا باشا على المعلومات الجميلة دى :)

بس هوا الرادار دة بعد مارينا صح ؟ و فى الكيلو كام لو تفتكر ؟

لسة راجع من مطروح .. و دى كانت اول مرة من حوالى 6 سنين اروح مطروح ... مدخل طريق العلمين بقى كوبرى مش زى الاول بتاخد يوترن و لما بتنزل من الكوبرى بتلاقى حتة مزروعة على الجانبين و الجزيرة الى فى الوسط دى بيكون فيها ردار و اخر الزرع ده بيكون كمين .. فمتجريش فى الحتة دى و بعديها صحراء اجرى براحتك .. المشكلة ان بعديها الطريق زبالة علشان جردينه و بيصلحوه فلو جريت العربية حتبدهدل منك معدا اخر 20 كيلو مكنوش جردهم وقت ما سفرت
لما تخش على طريق مارينا .. اجرى زي ما انت عايز لغاية مراسى بعديها الطريق زبالة و مكسر و قبل مطروح فى كمين زى ما الاستاذ جورج تفضل و قالك ... نصيحة الطريق سىء جدا للجرى خصوصا لو راكب عربية واطية زى حلاتى .. الانترا 2012 و كانت محملة .. العربية اتمرطت

بص حضرتك الرادار ده قبل مدخل مطروح بشوية بس ركز فيه ... انا اتمسكت فيه قبل كده بصراحة وكل ما اروح الاقيه فهما موجودين دايما والحزام كمان وخلي بالك هناك اشارات كتير ... وخلي بالك من المخالفات عشان المدينة منضبطة مروريا بنسبة كبيرة ... وفعلا الطريق مش مؤهل للجري غير حتة صغيرة كده قرب المدخل هي اللي نضيقة
ورحلة سعيدة في مدينة جميلة فعلا من احلي الشواطئ في مصر

المشاركة الأصلية كتبت بواسطة hesham fawzy h

هههههههههه بسال بس علشان لو كنت سافرت مثلا السنة الى فاتت ممكن يكونو حطو كمييين السنادى :)

هوه واضح من كلام الناس هنا ان فعلا في كماين جديدة والطريق مابقاش نضيف زي الاول
عامة انت خللي بالك لان السرعه بتغري جدا بالذات علي الطرق المفتوحة اللي زي دي
وربنا يكفيك شر الطريق

شكرا يا رجالة على النصائح الجميلة دى :)