كلمة حق

**ethan82** · 20-10-2008 04:22 PM

بسم الله الرحمن الرحيم

عايز احكي عن تجربة مع التوكيل حصلت معاية يوم الخميس الي فات
بس قبل أي حاجه عايز أقول بجد توكيل محترم جداً

انا كان عندي شوية مشاكل وكان لسه ميعاد الصيانة مجاش . المهم اني اتصلت وأخادت ميعاد والي كان تاني يوم علي طول الساعه 9.30 الصبح في ابو رواش. المهم اني أخدت أجازة من الشغل وفعلا نزلت الصبح بس الساعه 9 وعقبال مروحت كانت تقريبا 10 أو 10 ونص . علي فكرة يا جماعه ده أول تعامل ليا مع أي توكيل ومكنتش عارف حاجه

دخلت ووقفت بالعربية وجالي واحد قالي وسئلني صيانه ؟ قولتولو لأ بس انا في كذا وكذا والمشاكل الي عندي . سئلني اذا كنت حاجز قولتولو اه قالي طيب لو سمحت رخصة العربية و جدول الضمان . طبعا رخصة العربية وعارفها لاكن جدول الضمان ده والا أعرف عنه أي حاجه . قولتلو لأ انا مش معاية جدول ضمان قالي اذاي ده المفروض تكون واخدو مع العربية قولتو عليه الطلاق مخادتو :d فا قالي لأ كده مش هنقدر نعملك الصيانه علي الضمان وكده هتدفع تمن التصليح وأي حاجه . قولتلو طيب مين المسئول عن الضمانات والكلام ده قالي اطلع عند استاذ مدكور فوق المهم طلعت ودخلت لللراجل ده وحكتلو اني معرفش حاجه عن الضمان ده او اني المفروض اخدو وقلتلو اني واخد أجازة وحرام اكون جيت علي الفاضي والراجل بصراحه طلع رجوله ومحترم وأتاكد ان العربية ليها ضمان من عنده وقالي انزلهم وانا هكلمهم ومتقلقش وكمان اداني العنوان الي هروح اجيب منه الضمان.
نزلت وكان فعلا كلمهم واستلمو مني العربية و أخادو كل الملاحظات وقالولي استريح لحد منخلص . طبعا انا مستريحتش وعملت نافسي طالع لأستاذ مدكور تاني وأعدت اتفرج علي العربيات وهيا بتتعمل لحد مدخلت عربيتي أعدت اتفرج من فوق وهما بيظبطو وبعدين جالي واحد بكل احترام قالي ممنوع الوقوف هنا فطبعا نزلت اتفرجت علي التليفزيون شوية ونمت شوية لحد مخلصو. المهم جات العربية وكانو بيجربوها وبعدين رفعوها تاني بره وكان الفني بيرجلش الفرامل وكان واقف مدير المهندسين والي بيشرف علي كل حاجه ووقفت اتكلمت معاه وقلتلو علي المشاكل وطمني جدا وخلاني أركب عربية تانية علشان اتأكد ان مفيش فرق وكمان قالي انا هطلع أجربها معاك بنفسي وفعلا طلع معاية لحد البوابات ولفينا ورجعنا وجربنا الفرامل وقالي شوية نصائح جامدة و قالي انو معاه سيراتو 2008 وقالي بص دوس فيها براحتك وانا بحب الشباب والشقاوة وقالي افرمها والا يهمك مش هيجرلها حاجه وقالي احنا هنا متأكدين من العربيات بتاعتنا. المهم رجعنا تاني ونزلنا وكنت هاخد العربية وأمشي قالي لأ استني وناده علي واحد وقالو خد العربية دي اغسلها وعايزها بتلمع وفعلا حصل وأخادت العربية ومشيت ومدفعتش والا مليم . وبصراحه كنت مبسوط ان في ناس محترمة ومهتمه بالشكل ده وبجد توكيل أكتر من رائع .
التوكيل بس ناقصو ان يكون فيه أكل كويس لأني كنت ميت من الجوع :d ومصدقت اني خلصت وطلعت صاروخ علي داندي أكلت وبعدين علي النادي ثم علي البيت وقولت لازم أحكيلكو بس طبعا نسيت بس الحمد لله أفتكرت انهاردة

**princemady** · 20-10-2008 04:54 PM

ليا الشرف إيثان باشا أكون أول واحد يرد عليك وبصراحة تقريرك عن معاملة التوكيل فى الصيانة جميل جداً وبيزيد اطمئنان الواحد
وبصراحة الشركات المحترمة بتكون محترمة فى كل أقسامها وأنا لمست مدى إحترام كيا وانا باتعامل مع مركز المبيعات اللى فى جليم

**youssefmustang** · 20-10-2008 05:07 PM

من ساعة محمد نصير هو اللى مسك التوكيل بتاع كيا وهو اللى رفع اسم كيا فى مصر بامانة ناس محترمة جدا جدا فوق الوصف

**lolly136** · 20-10-2008 08:06 PM

ya ethan hwa el mohndes ely m3ah el cerato da esmo 7a'led we ragel mlian shwya keda??

**Ahmed Selim** · 20-10-2008 08:50 PM

بصراحة ممتازين.........مبروك عليكم التوكيل الجديد......

**ahmed_su** · 21-10-2008 12:21 PM

مبروك عليك حل المشاكل فى العربية

وهما فعلا محترمين

**ethan82** · 21-10-2008 12:53 PM

المشاركة الأصلية كتبت بواسطة ahmed_su

مبروك عليك حل المشاكل فى العربية

وهما فعلا محترمين

بصراحه ياحمد معظم المشاكل اتحلت بس كان في حاجه واحده وهيه صوت الموتور انا شايف انو عالي شوية وهما بيقولولي لأ ده الطبيعي وكمان رفضوا يغيروا الزيت وقالولي ده في صيانة ال 5000 بس بصراحه انا غيرت زيت برة وفعلا صوت الموتور بقي أهدا بكتير وكمان انا كنت شايف ان 5000 كيلو كتير علي زيت التليين . وعلي فكرة سئلت علي تركيب الفوجات وطبعا طلع سعرها مبالغ فيه ب 1700 جنيه وده هما بيقولو لأن بيتركبلها دراع وحاجات لوحدها وحوارات كده فتقريبا شكلي هركبها بره. والأنزار محدش اعترض عليه تماماً
بس مجمل اليوم اني مشيت مبسوط ومش متكدر وده أهم حاجه.

**ethan82** · 21-10-2008 12:55 PM

المشاركة الأصلية كتبت بواسطة princemady

ليا الشرف إيثان باشا أكون أول واحد يرد عليك وبصراحة تقريرك عن معاملة التوكيل فى الصيانة جميل جداً وبيزيد اطمئنان الواحد
وبصراحة الشركات المحترمة بتكون محترمة فى كل أقسامها وأنا لمست مدى إحترام كيا وانا باتعامل مع مركز المبيعات اللى فى جليم

ياباشا انا الي ليا الشرف وبالتوفيق ان شاء الله

**ahmed_su** · 21-10-2008 01:24 PM

المشاركة الأصلية كتبت بواسطة ethan82

بصراحه ياحمد معظم المشاكل اتحلت بس كان في حاجه واحده وهيه صوت الموتور انا شايف انو عالي شوية وهما بيقولولي لأ ده الطبيعي وكمان رفضوا يغيروا الزيت وقالولي ده في صيانة ال 5000 بس بصراحه انا غيرت زيت برة وفعلا صوت الموتور بقي أهدا بكتير وكمان انا كنت شايف ان 5000 كيلو كتير علي زيت التليين . وعلي فكرة سئلت علي تركيب الفوجات وطبعا طلع سعرها مبالغ فيه ب 1700 جنيه وده هما بيقولو لأن بيتركبلها دراع وحاجات لوحدها وحوارات كده فتقريبا شكلي هركبها بره. والأنزار محدش اعترض عليه تماماً
بس مجمل اليوم اني مشيت مبسوط ومش متكدر وده أهم حاجه.

اجمالا الحمد لله انك مبسوط

فعلا تغير دراع النور لوحده فى حدود 700 جنيه علشان يبقى فيه مفتاح نور الفوجات

ريلاى الفوجات (الكتاوت) + تركيب الفيوز علشان تدخل ضمن دائرة كهرباء العربية

غير المصنعية اللى اكيد غالية

لو صوت الموتور مضيقك قوى كده فيه بطانة بتركب فى كبوت العربية

هى عندهم فى الوكيل تمنها 360 جنيه تقريبا كنت سئلت عنها وانا باستلم العربية بس استغلتها شوية