الموضوع: باركولي استلمت الوحش الناعم بيجو 508 و انطباع مبدئي خلال العوده بها الى المنزل

المشاركة الأصلية كتبت بواسطة hany63

مبدئيا طالما الواحد هيدفع مبلغ محترم يبقى اول شرط يكون قوة الموتور و بما اني كنت راكب سيفيك و ده اقوى موتور بالفعل ١٦٠٠ بدون تربو يبقى لازم العربيه الجديده تكون تربو و طبعا تكون شغاله كويس مع بنزين ٩٢

يبقى مش فاضل من الليله دي غير ال ٥٠٨ و انا عمال افكر لقيت استاذ اسلام Elenor نازل بتقرير تاني و كله بيشكر فيها قلت بس نتكل على الله و رحت المعرض اتفرج عليها و دفعت ١٠ الاف مقدم منعا للتردد رغم اني عمري ما سقتها و اللي اتلسع في الشوربه المفروض ينفخ في الزبادي

لحد ما فتكرت واحد صاحبي كان مره قال ان جاره عنده واحده قمت مبرشط عليه و اتفق مع جاره انه يشرح لي العربيه و الراجل كان كريم الصراحه و خلاني اسوقها
قلت بااااس المقدم مش راجع يا جدعان

المهم استلمت النهارده و حابب اقول على انطباعي المبدئي
العربيه جميله فعلا و كل اللي اتقال مظبوط فعلا باختصار العربيه تستهال كل قرش اندفع فيها
راحه تامه و فخامه و اوبشن و تابلوه و فينش و وضعيه قياده عاليه تحسها بين الليموزين و ال SUV
عربيه ليها هيبه في الشارع
عفشه جميله لدرجة اني مش فاكر اني خدت اي مطب
هاندلنج جميل تحسها لازقه في الاسفلت
الاداء ده حدوته اولا الفتيس ٦ نقلات نقلاته ناعمه عكس المتوقع تحس انه فاهمك على عكس فتيس الاوكتافيا تحس انك بتتخانق معاه لو ماشي على ال D
الموتور بقى بيجمع على اي نقله يعني مش شرط انك تسقط نقله حتى عشان يجمع يكفي فقط ضغطه بسيطه و انت على ١٥٠٠ لفه تلقاه بيستحيب بسهوله على نفس النقله اما بقى لو ضغطت ل ٢٥٠٠ لفه عينك مش هتشوف الا النور امال الوضع الرياضي و لا المانيوال ايه اللي هيحصل
الفرامل جيده جدا و فعلا في مستوى الباسات زي ما قال استاذ اسلام

العيوب بقى اللي ظهرت لغاية دلوقت

وضعية رؤيه خلفيه غير مريحه بس المرايات الجانبيه معوضه شويه
المسند اللي في النص ولا ليه تلاتين لزمه عشان تحت مستوى اليد اليمنى بكتير كنت اتمنى يعملوه زي الاوكتافيا و الباسات كان الواحد هيبقى باشا

وفي النهايه احب اشكر استاذ احمد فهمي على تقريره المثبت و التقرير ده فعلا كان بمثابة مرجع ليا و اشكر استاذ احمد امين منسق القسم و طبعا استاذ اسلام اللي مبخلش عليا باءي معلومه و استحمل كل اسئلتي و ازعاجي له

ألف مبروك يا أستاذ هاني علي العربية الجديدة ونورت عيلة الأسود,,
أنا مبسوط أن أنبطاعك عن العربية أيجابي كدا, وأنك مستريح فيها وهيا فعلاً من وجهة نظري برضه أفضل عربية في الفئة السعرية دي في السوق علي الراحة والأداء والكماليات اللي فيها يعني تستاهل كل قرش يدفع فيها
ربنا يبارك لك فيها يارب ويديما نعمة.

الف مبروك و اختيار موفق جدا لعربية اثبتت جدارتها و متجربة بقالها كثير و سمعتها كويسة فعلا و اللي عاجبني فيها اكثر حاجة عن الانسجنيا و ال 316 ان القاعدة في الكنبة الخلفية اريحهم بصراحة ، بس كأوبشن و شكل الانسجنيا شايفها احلى

ربنا يديك خيرها و يكفيك شرها