باركولي استلمت الوحش الناعم بيجو 508 و انطباع مبدئي خلال العوده بها الى المنزل
مساء الخير
اخيرا بعد طول تفكير و عناء تم استلام السياره اليوم و احب برضه اشرح سبب الاختيار
طبعا انا كان معايا و مازال على فكره هوندا سيفيك ٢٠١٠ و كنت جايبها بعد معاناه شديده مع الباسات TSi بسبب الفتيس
الصراحه السيفيك عمرها ما قصرت خالص بس طبعا اللي جرب فخامة الاوربي و الالماني و ثباته لازم برضه يحن
و ابتدت رحلة البحث
مبدئيا طالما الواحد هيدفع مبلغ محترم يبقى اول شرط يكون قوة الموتور و بما اني كنت راكب سيفيك و ده اقوى موتور بالفعل ١٦٠٠ بدون تربو يبقى لازم العربيه الجديده تكون تربو و طبعا تكون شغاله كويس مع بنزين ٩٢
و فضلت استعرض العربيات لقيت طبعا بعد استبعاد اي حاجه من ريحة فولكس جروب بسبب الفتيس الاتي :
بيجو ٥٠٨ و دي معرفش حاجه عنها غير من تقارير نايل موتور
ستروين Ds5 عربيه جميله بس للاسف الماركه عموما من يومها سمعتها مش قوي في السوق المصري ولازم نكون صرحاء مع بعض العربيه في مصر بتبقى لاسباب اقتصاديه جزء كبير من راس المال بمعنى ان وارد في اي لحظه تبيع و مش طالبه انك بالاضافه انك هتخسر مبلغ كبير انك تبيع بصعوبه
مرسيدس CLA الجديده و دي ممكن تحجزها دلوقت و الورثه تبقى تستلم بعد عمر طويل
بي ام 316 لا خلاف عليها بس حسيتها غاليه جدا بالنسبه لقيمتها و بتغلى بمعدل باكو كل ٢٠ ثانيه و الموديل ده تحديدا ما استريحتش فيه لما جربتها اول ما قعدت حسيت اني قاعد على الارض وانا جسمي مليان فمش ناقصه غضروف ولا حاجه
الانسجنيا اتوهمت بيها لما شفتها في معرض اوتوماك بس اللي منعني لما سمعت عن مشكله كبيره حصلت مع احد الاعضاء و سمعة الوكيل و عدم انتشار العربيه
يبقى مش فاضل من الليله دي غير ال ٥٠٨ و انا عمال افكر لقيت استاذ اسلام Elenor نازل بتقرير تاني و كله بيشكر فيها قلت بس نتكل على الله و رحت المعرض اتفرج عليها و دفعت ١٠ الاف مقدم منعا للتردد رغم اني عمري ما سقتها و اللي اتلسع في الشوربه المفروض ينفخ في الزبادي
لحد ما فتكرت واحد صاحبي كان مره قال ان جاره عنده واحده قمت مبرشط عليه و اتفق مع جاره انه يشرح لي العربيه و الراجل كان كريم الصراحه و خلاني اسوقها
قلت بااااس المقدم مش راجع يا جدعان
المهم استلمت النهارده و حابب اقول على انطباعي المبدئي
العربيه جميله فعلا و كل اللي اتقال مظبوط فعلا باختصار العربيه تستهال كل قرش اندفع فيها
راحه تامه و فخامه و اوبشن و تابلوه و فينش و وضعيه قياده عاليه تحسها بين الليموزين و ال SUV
عربيه ليها هيبه في الشارع
عفشه جميله لدرجة اني مش فاكر اني خدت اي مطب
هاندلنج جميل تحسها لازقه في الاسفلت
الاداء ده حدوته اولا الفتيس ٦ نقلات نقلاته ناعمه عكس المتوقع تحس انه فاهمك على عكس فتيس الاوكتافيا تحس انك بتتخانق معاه لو ماشي على ال D
الموتور بقى بيجمع على اي نقله يعني مش شرط انك تسقط نقله حتى عشان يجمع يكفي فقط ضغطه بسيطه و انت على ١٥٠٠ لفه تلقاه بيستحيب بسهوله على نفس النقله اما بقى لو ضغطت ل ٢٥٠٠ لفه عينك مش هتشوف الا النور امال الوضع الرياضي و لا المانيوال ايه اللي هيحصل
الفرامل جيده جدا و فعلا في مستوى الباسات زي ما قال استاذ اسلام
العيوب بقى اللي ظهرت لغاية دلوقت
وضعية رؤيه خلفيه غير مريحه بس المرايات الجانبيه معوضه شويه
المسند اللي في النص ولا ليه تلاتين لزمه عشان تحت مستوى اليد اليمنى بكتير كنت اتمنى يعملوه زي الاوكتافيا و الباسات كان الواحد هيبقى باشا
وفي النهايه احب اشكر استاذ احمد فهمي على تقريره المثبت و التقرير ده فعلا كان بمثابة مرجع ليا و اشكر استاذ احمد امين منسق القسم و طبعا استاذ اسلام اللي مبخلش عليا باءي معلومه و استحمل كل اسئلتي و ازعاجي له