الموضوع: تجربتى مع Fit&Fix واستخدام استيكر نايل موتورز

السلام عليكم ورحمة الله وبركاته

ازيكم يا كل أعضاء المنتدى يا محترمين

الحقيقة انا معرفتش احط الموضوع ده فين بس لانى معرفش غيركم هنا فانا حطيته هنا

بعيدا عن مشاكلى الكتير ,, حبيت اقولكم على تجربة كويسة حسيت فيها انى مبسوط بعيدا عن عك الصنايعية والكوفتاجية

بداية أنا اشتريت ستيكر نايل موتورز لما روحت وقابلت المهندس كريم منير فى ورشة نايل موتورز يوم ما اشتريت الزيت الولفر ( هبقى اعملكم تقرير عليه بعد ما اخلصه ) وبصراحة اتعملت تخفيض ممتاز بس عشان مهندس كريم راجل ذوق كالعادة.

قولت بقى استخدم الاستيكر وانا حاطط ايدى على قلبى ليطلع بقى المحلات أونطة ويقعدوا يهربوا ويطلعوا اى حجه انى محصلش على الخصم لكن بتجربتى المتواضعة لقيت الوضع مختلف.

أنا اتعاملت مع Fit & Fix فى الترصيص

فرع ميدان لبنان اللى فى شارع لبنان، ومعاملة ممتازة وأخدت خصم 50 % يعنى بدل 40 جنيه دفعت 20 جنيه وبيطلع فاتورة بكده.

قولت يا واد يا محمد يمكن الناس دى مش واخدين بالهم وغلطوا ولا حاجه وهو المفروض 5% مثلاً.

روحت استعدلت جنوط زى مانتو عارفين وروحت رصصت تانى مرة ولكن فى فرع اول الهرم، والشغل ممتاز ولقيت عمل خصم 50% قولت يبقى الموضوع بجد.

أهم حاجه يا شباب انى لقيت ناس فاهمه فى شغلها ، والحقيقة انى عايز اجرب عندهم ظبط الزوايا بس لما أحتاج لكن فى مرة فى فرع ميدان لبنان كنت داخل اظبط ، بص من تحت لاقى ان الجلب المقصات مضروبة وبتلق، قالى لا يمكن اظبطلك وهى كده لازم تتغير ..

عرفت انهم محترمين مع انى كنت متغاظ منهم لانى اطلطعت فترة طويلة وفى الآخر اكتشفت ان الجلب بايظة ومعملتش زوايا، يعنى خساير من كل ناحية لكن ده شئ مش يعبهم الحقيقة.

حبيت انقل تجربتى لعل الناس تستفيد ان شاء الله لأن الشركة دى سعرها كويس وشغلها نضيف وكلمتهم واحدة الا بقى اذا حصل ما حد حاجه تانية فأكيد لكل قاعدة شواذ.