الموضوع: مواصفات الزيوت وجودتها وأنواعها

أنا مهندس كهرباء بس شائت الظروف أنى أتعامل فى مجال الزيوت و ححاول أقولكم الخلاصه فى مواصفات الزيوت بقدر ما أستطيع:
كلنا عارفين أن لزوجة الزيت العادى بتقل كلما أرتفعت درجة الحراره و بترتفع لزوجته كلما أنخفضت درجة الحراره (مثال: السمنه لما بتسخن بتبقى زيت و العكس) - دى خواص الزيت العادى عشان كده بنضيف ال Additives عشان نعكس الخاصيه دى لتصبح ملائمه لمتور السياره الذى يحتاج إلى أقل لزوجه عند بداية التشغيل حتى ينتشر بأسرع وقت ممكن فى كل أجزاء الموتور, وعند أرتفاع درجة حرارة الموتور يرتفع معها لزوجة الزيت حتى تحقق أقصى حمايه للموتور بس بالقدر الذى يجعل الزيت ينساب بسرعه مع سرعات الموتور العاليه.

الأضافات ديه أو الAdditives يتم أختبارها و أختبار الزيت عن طريق API STANDARD وده حتلاقوه مكتوب على علبه الزيت( S ديه للبنزين و C للديزل)
API SM
API SL
API SJ
ال SM دى أعلى GRADE وحتلاقوها فى معظم الزيوت التخليقيه و دى معناها أعلى نسبه وجودة أضافات وال SJ العكس ودى حنلاقيها على علبة الزيوت الرخيصه و أحاديه درجات الحراره
أم ال SL فدى موجوده فى معظم أنواع الزيوت المعدنيه زى شل الأصفر و موبيل XHP و أمارات مصر وتكون متعددة درجات الحراره

نيجى بأة للزوجه ودى اللى أتكلمنا عليها فى الأول و بتكون نتيجه للأضافات المحطوطه فى الزيت و بتكون كالأتى على سبيل المثال:
Viscosity 20-W50
ودى معناه أن لزوجه الزيت وهوه بارد بتكون 20 و لما يسخن الموتور بتكون 50 بحد أقصى, طبعا الرقم 20 دة كل ما يقل يبقى أحسن عشان بيحقق أقل لزوجه فى البرد وده بيديلوه أسرع أنتشار عند بدايه تشغيل الموتور أذن الزيت Viscosity5-W50 أفضل من Viscosicty 20-w50 وخصوصا فى الشتاء

بالنسبه لأفضل أنواع الزيوت وده عن تجربه شخصيه
1 التخليقيه : أمارات مصر و شل بس أنا بستعمل أمارات مصر و تمنه دلوقتى 225
2 المعدنيه : أمارات مصر و شل و موبيلxhb
بالنسبه لزيوت توتال و كالتكس فامعرفش عنهم حاجه بس أسمع أن توتال كويس ومن ناحيه تانيه سمعت من ناس خبراء ان موبيل 1 عمل مشاكل كتير زائد أنه سريع البخر لأنه خفيف بس معرفش أيه مدى صحة الكلام ده لأن كله بيفتى من غير علم.