تجربة شراء أونلاين عن طريق موقع "إشتريلي" - بطّارية موبايل
السلام عليكم,
*الموضوع مش دعائي أبداً.. كانت لي تجربة مع إشتريلي وحابب أنقلها هنا للإفادة مش أكتر ولا أقل.
كان لي كذا تجربة شراء أون لاين فاشلة عن طريق الإي باي والأمازون, آخرها انتهت بإن الفلوس اتسحبت من الفيزا مباشرةً لكن البائع اشتكى ان الفلوس موصلتهوش, وبعدين اكتشفت دوّامة الدفع عن طريق الباي بال وانّي لازم ارفع قضية عن طريق الأمازون خلال 20 يوم وإلّا ضاعت الفلوس عليّا. يمين شمال الفلوس ضاعت عليّا في الآخر.
وفي تجربة أخرى الجمارك الفظيعة كلفتني 400 جنيه ضرائب على حذاء اشتريته من موقع أمريكي. توبة.
بطبيعتي مبحبّش المواقع الوسيطة بتاعت الشرا اون لاين, اصل ايه الزيادة اللي همّا بيعملوه مقدرش انا اعمله بنفسي وأوفّر فلوسي؟
لكن التجربة السيئة الأخيرة دي خلّتني أرفع راية الإستسلام وأدوّر على وسيط أون لاين.
http://technave.com/data/files/mall/...1525025964.jpg
جالي من سنة تقريباً هديّة موبايل Motorola Droid RAZR XT912 - الجهاز شغال بنظام أندرويد - من صديق لي في أمريكا, استعملته فترة وبعدين البطّارية باظت فجأة, دوّرت في النت وطلع ان الموتورولا ده بالذات في مشكلة سخونة في البطارية ومع الوقت البطارية بتبوظ.. لازم استبدالها بواحده تانية Replacement واتباع خطووات معيّنة لما تيجي تشحن الموبايل عشان تطوّل عمر البطارية.
طبعاً الموبايل اترمى في الدرج فترة طويلة لحد ما قررّت اشتريله بطارية جديدة.
دلوقتي معايا آيفون وتوبة من الأندرويد الحمدلله.
https://imagizer.imageshack.us/v2/81...661/kFtRTy.jpg
قلبت القاهرة رأساً على عقب ما لقتش بطارية للموبايل, سألت في الإمارات والكويت وبرضه مالقتهاش. مكانش قدّامي الا الأون لاين.
دخلت الإي باي واخترت البطارية اللي أنا عاوزها وإتأكّدت من تقييم البائع في الأوّل - حاجة مهمة طبعاً -
رحت ل أشهر وسيط أون لاين حالياً "إدفعلي" في الأوّل, عملت الأوردر وكل حاجة, كنت مستنّي الموافقة النهائية عشان احوّل فلوس من الفيزا.. اتفاجئت بإيميل منهم بيعتذروا لي بحجّة انهم مش بيشحنوا كيماويات - وده بيشتمل بطاريات الموبايل -
تعليقي: المفروض يكون في فليكسبيلتي أكتر من كده, صحيح ان بطاريات الموبايل من الناحية التقنية تندرج تحت مسمى الكيماويات.. لكن المفروض تكون استثناء.
رحت بعد كده لإشتريلي, عملت الأوردر وطلبت ان موظف يجي لي مخصوص لحد البيت يستلم منّي الفلوس - العملية دي بتتكلّف 30 جنيه زيادة -, وبالفعل في نفس اليوم جالي واحد وأخد منّي الفلوس.
الحسبة كانت كالآتي : (137 جنيه تمن البطّارية الفعلي + 28 جنيه ضرايب جمركية مالهاش لازمة بس لازم الدولة تقلّبك في اي قرشين + 5% من سعر المنتج الفعلي بتاخده اشتريلي + 48 جنيه شحن )
= 263 جنيه تقريباً.
هل الحسبة عادلة في رأيي؟ التكلفة بتقترب من الضعف تقريباً لكن راحة البال مش ببلاش.
الحسبة النهائية كانت ارخص من ادفعلي بالمناسبة. مش فاكر الفرق كان كام بالظبط.
https://imagizer.imageshack.us/v2/82...661/8tRj8D.jpg
إشتريلي بيطلب منّك مهلة شهر كامل لحد ما يوصلك الأوردر بتاعك لحد البيت. وفعلاً قبل نهاية شهر من عمل الأوردر ب 4 أيام كانت البطّارية وصلت المكتب بتاعهم ف اسكندرية واتشحنت في نفس اليوم عن طريق أرامكس ووصلت خلال يومين لحد باب البيت.
صور للشحنة:
https://imagizer.imageshack.us/v2/44...539/4ZuaeP.jpg
وفي النهاية حسبي الله ونعم الوكيل في البلد اللي مفيهاش ثقافة الشرا اون لاين بسبب الجمارك المتعسّفة على كل صغيّر وكبير. من مشبك الشعر لحزام البنطلون كلّه بيتجمرك.
