أكيد طبعاً ..
أنا لفيت على أكتر من واحد بتوع كوالين ، وكلهم للأسف أجمعوا على شراء كالون جديد ، وأنه لا يمكن لحام الجزء المكسور لأنه جزء متحرك ولصقه لن يتحمل عزم الحركة وسينكسر من أول استعمال.
طبعاً ، ببعض البحث عند بتوع قطع الغيار الاستيراد ، أدركت أن كالون الشنطة مش موجود نهائى وكلهم أفادوا بشراءه من التوكيل.
شوفت اللينك اللى حضرتك حطيته ، والحقيقة لم أستفيد من صاحب المشكلة هناك كثيراً لأن الحل الذى وصل إليه فى النهاية هو شراء كالون من فرنسا بالشئ الفلانى على رقم الشاسيه.
ولكن لفت نظرى فى هذا اللينك أحد الزملاء ذكر أنه قابل مشكلة مشابهة فى سيارة كليو ، وأنه نجح فى لحام الكالون عند ورشة فيبر فى الأزاريطة بتاعة واحد اسمه خالد.
ووجدت أيضاً فى هذا الموضوع زميل أوصى بواحد بتاع كوالين فى الشاطبى ..
وبما أنى قضيت الخميس والجمعة والسبت اللى فاتوا فى اسكندرية ، قلت يبقى الغدا يوم السبت هو أكلة سمك وجمبرى عند حودة جندل فى الشاطبى ونشوف القصة دى بقى ..
ولحسن الحظ لقيت حوده جندل وخالد فيبر و عماد فوزى للكوالين جنب بعض تماماً ، وكل محل على مرمى البصر من المحل الآخر ..
رحت لخالد ووريته الكالون ، مافكرش لحظة ، وقال بسيطة ده هانعمله بسهولة .. وبالمرة كانت المراية اليمين عندى منتهية وعايشة على السوستة فقط والفيبر جوه كله مكسر ، وخالد الماهر قدر يعملها ويخلق ألسنة فيبر جديدة مكان المتكسرة وقام الفنى المدعو حباظة بتقفيل المراية وكان شغل ابداع بصراحة.
وبالنسبة للكالون أعطاه لصنايعى عنده وشرح له المطلوب ، فدخل به الورشة 10 دقائق وخرج ليرينى النتيجة ، فوجدت أنه قد قام بلصقه تماماً ، ومشكلة عدم وجود عصب للجزء المكسور ، قام بحلها بأن وضع شبكة حديدية دقيقة (مثل سلك الناموس بتاع الشباك ولكن من الستانلس) بحيث تحضن مكان الكسر وقام بتسييح فيبر عليها فأصبح هذا المكان حديدي بمعنى الكلمة .. بالظبط كتجبيس ذراع مكسورة ولكن بالحديد.
وكان حساب تصليح المراه + لحام الكالون + فيه وش فتحة تكييف كان فيه كسر بسيط عمله بالمرة ، كان حساب الحاجات دى 80 جنيه ، واستنتج من المجهود المبذول بأن المراية حسابها كان 60 جنيه ، ولحام الكالون 20 جنيه ..
فأخذت الكالون وطلعت على عماد فوزى للكوالين اللى جنبه ، وقام فنى هناك اسمه مينا بتركيبه باحتراف ووصل عليه السنتر وكله تمام ، وكان حسابهم 20 جنيه ..
هنا انزاح الكابوس الذى كان على كاهلى وقفلت العربية فى مكانها وذهبت إلى حبيب قلبى جندل لأمرح بين الفيليه والبربون والسبيط والجمبرى وكفتة السمك .. واضمد جراحى النفسية بوجبة انفتحت لها معدتى على مصراعيها بعد زوال الغمة ..
والحمد لله
وشكراً على مساعدتك القيمة
ونصائح الزملاء.
المفضلات