السلام عليكم ورحمة الله وبركاته
الحمد لله ربنا كرمني واشتريت سبرانزا إنفي 2014 التقفيل المصري من معرض الطارق في سبورتنج - الإسكندرية , في الأول لفيت على كذا معرض والعربية كانت غير متوفرة والموجود الصيني الفئة ls فاضية وبنفس سعر المصري , فمندوب الطارق قالي هوفرلك النسخة المصرية باللون اللي انت عايزه خلال 3 أيام عشان هيبعت يجيبها من فرع القاهرة , دفعت ألف جنيه حجز ورجعت فعلا بعد 4 أيام العربية كانت موجودة باللون المطلوب . :tumb:
speranza envy 2014
black color
77,000 le
متهيألي وصف ومميزات السيارة تم التحدث عنه في أكثر من موضوع والمقالات مغرقة النت , لذلك سأركز في الموضوع على ملاحظاتي وانطباعي عن السيارة بكل حيادية .
* ملاحظاتي عند الاستلام (( الحلو ما يكملش للأسف )) :-
صحيح الطارق التزموا بكلمتهم وجابوا العربية في الوقت المتفق عليه وبنفس سعر التوكيل لكن....
- لمبة check engine كانت مضاءة لأن فيشة السرعة وكمبيوتر الرحلات كانت مفصولة , مع إنهم أنكروا نقل السيارة سفراً وأكدوا استخدامهم لكساحة نقل , لكن الواقع غير ذلك ووقت الاستلام كان متأخر وماكنش فيه وقت أروح توكيل اسبرانزا يركبوها , غير إني كان لازم أسافر في نفس اليوم.
- كان فيه خبطة بسيطة لا تذكر أسفل باب السائق لكن الحمد لله كان معايا أحد الأصدقاء لاحظها ومندوب الطارق ضرب لخمة هو وكل الواقفين من العاملين بالمعرض , لكن عديتها وما حبيتش أعملها مشكلة خصوصا انها مش باينة :tire:
- كتالوج العربية وكتيب الضمان على كلامهم هستلمهم مع ورق العربية للترخيص , الكلام دا مضبوط !؟
- العربية كانت شبه مردومة من برا وجوا وواضح جدا انهم مخزنين العربية وناويين يعطشوا السوق ويرفعوا من سعر العربية . :blink4: ((( بالمناسبة العربية بدأت تبيع فعلا وتظهر في الشارع خصوصا سعرها تنافسي جدا بالنسبة لحجمها وإمكانياتها)))
فبالتالي استلمت العربية بعداد سرعة متوقف وكذلك كمبيوتر الرحلات وآخر قراءة للعداد 70كم واضطريت اسافر بالوضع دا.
---------------------------------------------------
بداية الرحلة وتجربة السيارة في مشوار لمرسى مطروح 300كم
العربية كان فيها حوالي 15 لتر بنزين , توجهت لمحطة إمارات مصر الموجودة بمحرم بيك بعد الموقف الجديد وفولت التانك , ضبطت ضغط العجل نيتروجين , قرأت دعاء السفر وبدأت الرحلة :clap:
- صاج العربية والدهان الخارجي الحمد لله ممتازين وجودة التقفيل عموما مستواها كويس ولا توجد فروقات ملحوظة بينها وبين التقفيل الصيني.
- سحب العربية ما شاء الله تبارك الله ممتاز حتى مع تشغييل التكييف (ماتور 1500) .
- صوت الماتور كان ناعم في البداية لكن بدأ صوته يعلي بعد 200كم مع سخونة ملحوظة عند لمس الكابوت استمر الموضوع 3 أيام تقريبا وبعدها بدأ يقل تدريجيا وحاليا معقول بلاحظ السخونة عند الشبكة الأمامية فقط (دون تدخل) :g:
- الكنبة الخلفية مريحة تتسع 3 أفراد مرتاحين بشرط ما يكونوش طوال عشان السقف في الخلف منخفض بعض الشيء (هو تصميم العربية aerodynamics كدا :sleeping:) لكن المسافة بين الكنبة والكراسي الأمامية جيدة جدا , إنما الكراسي الأمامية ناشفة وغير مريحة حتى بعد تعديل وضعيتها (جايز عشان أنا طويل :laugh6:) .
- ارتفاع السيارة عن الأرض ممتاز (لم أجرب في حالة الحمولة الكاملة لكن أتوقع سيكون معقول).
- الأضواء الداخلية للتابلوه مريحة وواضحة وكذلك الأضواء الخارجية والـ fog light
- أعجبني بجد في الإنفي تعدد أماكن التخزين واستغلال كل مساحة في الأبواب والكنسول :thumbsup:
- إمكانيات العربية جيدة من وجود parking sensor وجودة cd player\usb لكن بسماعتين فقط , بس يظل الصوت معقول .
- لاحظت وجود تخبيط في العفشة الخلفية مع المطبات وصوت 'تزييق' أعتقد لأن السيارة مازالت في فترة التليين (تم التأكد من ضبط ضغط الإطارات) .
- الفرامل ضعيفة ولمبة abs منورة في التابلوه , حتى الـhandbreak مش قوية بشكل كافي , مش عارف المشكلة فردية ولا ظهرت مع حد تاني!
- صالون العربية واسع وينقصها إضاءة خلفية , بس العربية موفرين فيها بطريقة رهيبة عشان تنزل بالسعر ده حتى الـairbags شالوه :biggrin:
بما إن كمبيوتر الرحلات مفصول , وأنا مش بتحرك كتير العربية (لحين ترخيصها) فمش هعرف أحسب الاستهلاك الفعلي للبنزين .
---------------------------------------------------
إن شاء الله بمجرد انهاء الترخيص هروح مركز الخدمة يشوفوا حل للملاحظات دي , لكن المجمل السيارة ممتازة جدا وتستحق سعرها (value for money) واختيار موفق الحمد لله , ربنا يحفظلنا سيارتنا ويرزق كل واحد السيارة اللي نفسه فيها :ask:
أعتذر عن الإطالة والسلام عليكم ورحمة الله وبركاته
:bye2: