عاوز أعرف العربية مش بتدور ليه

**mabdelaziz** · 22-10-2008 09:57 AM

السلام عليكم
معلش يا جماعة اعذرونى لأنى محبط من العربية دى, لسه ماكملتش معايا شهر واحد وغيرت لها مروحة الموتور وطرنبة الموتور بتنقط ميه وعاوزة تتغير هى كمان, وآخر حاجة بقى حصلت امبارح لقيت العربية مش عاوزة تدور.
أنا عربيتى لادا 2007 موديل 90, وفى خلال الكام يوم اللى قعدتهم معايا ماعملتش بيها غير مشوارين بس اللى يعتبروا طوال فى المسافة, غير كده أنا كنت بلف بيها بس بالكتير ساعة فى اليوم فى منطقة سكنى ومرتين قعدت تقريباً يومين من غير ماشغلها خالص.
اللى حصل امبارح إنى نزلت أجيب حاجة قبل المغرب, فدورت العربية الحمد لله دارت وبعدين قعدت يدوبك دقيقتين أسخنها وبما إن المشوار قريب وأنا كنت مستعجل فقلت أمشى بقى وخلاص, المهم جبت الأول ومشيت يدوبك 5 متر وجبت التانى ولسه بدوس بنزين قامت نطت منى مرتين وبطلت, بحاول أدورها تانى راسها وألف سيف ماهى دايرة.
سبتها حوالى ساعتين وحاولت أدورها تانى مفيش فايدة. سبتها لغاية الصبح ولما حاولت أدورها تانى برضه مش عاوزة تدور, يدوبك لما بتعمل تكة بسيطة كده مع المارش وتسكت.
امبارح لما كنت بحاول أدورها كنت بشوف مؤشر البطارية مش بيتعدى المنطقة الحمراء خالص, جربت أنور النور لقيته شغال, كلمت واحد قريبى قال شوف كده الميه ناقصة ولا لأ, بصيت عليها النهارده لقيتها مغطية الألواح بحوالى 0.5 سم.
ياريت حد يطمنى ويقول لى أعمل إيه, البطارية مش جديدة بس العربية كانت شغالة زى الفل وبتدور من أول مرة, هل دى مشكلة بطارية ولا حاجة تانية, ولو مشكلة بطارية أحلها إزاى؟

شكراً مقدماً, واعذرونى لأنى لسه مستجد فى موضوع العربيات ده

**mabdelaziz** · 22-10-2008 12:20 PM

ياريت يا جماعة أى مساعدة أحسن أنا فى حالة احباط شديدة جداً

**Ahmed Hamdy** · 22-10-2008 02:02 PM

لو المارش مش بيقول خالص يبقى عيب مارش ..
حتروح لكهربائى يشوفه وممكن يصلحه ..

لو شغال ممكن يكون بطارية .. بس الأول روح لكهربائى وقيس شحن الدينامو .. ممكن يكون مش بيشحن ..

لو الدينامو كويس .. بص على القواطيش انها مش مملحة ..

بعدين حاول تديها زقة وتمشى مشوار عشان تشحن البطارية ..

وبعد المشوار بطل ودور .. لو دارت بس سبتها شوية "يوم مثلا" ومدارتش يبقى غالبا بطارية .. مبقتش تحتفظ بالشحن ..

فى برضه احتمال ان البوجيهات تكون مرطبة .. ممكن تغيرها وتجرب قبل ما تغير البطارية ..

**mabdelaziz** · 22-10-2008 05:25 PM

أشكرك جداً يا أستاذ Ahmed Hamdy على اهتمامك وردك.
أنا حاولت أدورها بالزق مفيش فايدة, توكلت على الله ورحت جبت لها كهربائى يشوفها, جاب معاه بطارية تانية وكشف عليها وبعدين وصل البطارية اللى معاه ببطارية العربية وقعدنا ودورناها دارت الحمد لله, كشف على شحن الدينامو قال لى كويس, وقال روح لبتاع البطاريات يقيس لك الميه بتاعة البطارية عشان تطمن.
بطلت ودورت كذا مرة بعد كده شغالة الحمد لله كويس.
هل ياترى ممكن يكون سبب اللى حصل ده إن ماكنتش بمشى بيها كتير فى الفترة اللى فاتت, وهى حوالى 20 يوم كنت يدوبك بتعلم بيها شوية كده يعنى لف على بسيط لمدة ساعة بالكتير ومرتين بس عملت بيها مشوارين طوال؟ الكهربائى قال لى ممكن بس مش متأكد... ياترى إيه رأيكم؟

**Ramy_Ali** · 23-10-2008 01:42 PM

صح كدا
لازم تشغلها على الاقل مرة كل اسبوع لمدة ساعة مثلا حتى ولو على الواقف عشان البطارية تحتفظ بشحنتها
وممكن تكون البطارية الموجودة حاليا ضعيفة او بايظ فيها ربع ( بدليل لما ركبت واحدة تانسة اشتغلت )
والميه مش دليل انها سليمة
ممكن اصلا تكون امبيرها اقل من امبير عربيتك ودا بيبان لو المارش مش بيدور بسرعة معقولة او كويسة
او النور بيكون ضعيف اثناء السير
تاكد من امبير السيارة من اى شخص معاة لادا زيها واكشف على البطارية كويس