الحمد لله .. قدر الله وماشاء فعل ... فردة الشاسيه
النهاردة كنت ماشي بالعربية فجأة سمعت صوت دبدة قوية تحت العجلة اللى قدام وبعدها بشوية لقيت العربية سحفت على الارض ... نزلت لقيت العجلة اللى تحت السواق معووجة لبرة ... انا افتكرت مقص انكسر او كوبلن فرط او حاجة كده ... كلمت ونش انقاذ جه خدها ووديتها لعفشجي جمب البيت عندي وبص على العربية وقالي دي فردة الشاسيه اللى تحت اللى ماسكة العفشة مكسورة ... ودي بسبب انك خدت كام مطب جامد ورا بعض او نزلت في حفرة بسرعة يعني حاجة شبه كده .. وقالى دي لازم الموتور يتحل عشان تتلحم وتتعمل زرجينه ....
قلتله شكرا بقي وكلمت ونش تاني ورحت بيها على الحرفيين لورشة كريم منير لانى مش هثق فأى حد يشتغل في شاسيه العربية غير الورشة دي ... واحمد قدروة كشف عليها وقالي نفس الكلام ... وقالي كمان ان دى بتحصل كتير في اللانوس وانه شاف العيب ده في كزا عربية لانوس ....
طبعا سبت العربية هناك وبكرة الموتور والعفشة هيتحلوا بالكامل ويوم الاتنين يبدأ شغل السمكرة في الشاسيه ... وربنا يسترها بقي على الجميع وهبقى احيلكوا ايه اللي بيحصل يوم بيوم ان شاء الله
دعواتكم يا رجالة