( و ايه اللى هايخلى واحد طالع معاش السنادى يجرى فى تطويرات و الكلام ده ) موقف و رؤية
الســـلام عليكم و رحمة الله و بركاته
من فترة عملت الموضوع ده :
لحد امتى هانفضل عايشين المسرحية المجتمعية الاجتماعية الهزلية دى !!
و فيه اهتديت للفكرة اللى عملتها فى موضوع مستقل من كاد يوم هنا
دعوة لانشاء قسم ( بنك الافكار ) بالمنتدى .... رأي المشرفين و الاعضاء ؟
و للأسف لم تثمر بأى تفاعل ايجابى " اطلاقا ! "
النهاردة فى الشغل عندنا -حكومى- واحد بمقام رئيس مجلس الادارة ، لسه جاى جديد
و "كل غربال وله شدة" فاعطى تصريحاته و تعليماته و ... الخ لـ رؤساء الاقسام بتاعتنا
و عاوز كل حاجة زى ما الكتيب الارشادى بتاع سنة صـفـر بيقول !
الجميل ان الوظيفة اللى انا فيها هى اكتر وظيفة ممكن تستفيد من التطور التكنولوجى عامة ، الوظيفة لو بس اعترفت بـ "التليفون" فهى هاتوفر علينا يمكن نص الشغل
انا متعين جديد ، و لما شوفت الوضع المذرى ده عملت ورقة بمقترحات و افكار لتطوير القسم عندنا ( الكلام دا من 6 شهور )
و حكيت فى المواضيع اللى فوق دى انها لم تلق اى اهتمام
و لما رؤساء الاقسام 3 رؤساء جمعونا فى مكان واحد علشان ينقلوا الاوامر ، و انهالت علينا الطلبات التافهة المضيعة للعمر -بما تحمله الكلمة من معنى-
و الزملاء لما لاقوا انهم بيتزنقوا طالب البعض منهم بإنى اجيب الورقة اللى كنت كاتب المطالب فيها
عدت على 2 من الرؤساء ، والتالت بالفعل كان قرأها من 6 شهور و ماعبرش فيها
و نــفــــــــس السيناريو - لم تجد الورقة اى اهتمام ، لدرجة انى قولت يا خسارة الورقة الـ a4 اللى طبعت عليها ! -
و لما خرجنا ، و الكل حانق طبعا و قرفان ، و بيتكلموا على الطلبات .... الخ
جه رد لخص الحوار كله و كان الرد : " منتظرين ايه يعنى من الرؤساء بتوعنا و هما اصغرهم قدامه سنة و يطلع معاش ، هما كل اللى يهمهم الليلة تعدى لحد ما يطلعوا و خلصت الحكاية "
بالظبط كدا ،
منتظرين ايه من مسؤولين عموما عمرهم الافتراضى انتهى
و روحت لقيت مقالة رائعة على النت بعنوان : فخ التمانينات
دا اللينك بتاعها
https://www.facebook.com/photo.php?f...3268038&type=1
و كان احد التعليقات العبقرية قال :
مشكلة المقال الوحيدة انه لم يسلط الضوء على ان كتير من المشاكل الشباب أنفسهم سبب فيها... وكون صراعنا مع جيل التمانينات دايما بينتهي لصالحهم ملوش غير معنى واحد : اننا للاسف أضعف منهم ، ضعفنا ده مش ناتج عن قوتهم اد ما هو فعلا تجسيد للحقيقة المرة .. اننا جيل ضعيف كوزن ع الارض وككوادر ، ويوم ما جتلنا فرصة من دهب لتجاوز فجوة الزمن افترقنا لمليون تكتل وانضحك علينا من الجيل اللي المفروض انه تمانيناتي وقديم !!
يبقى نركز الهجوم على نفسنا ، ونعترف بأخطاءنا كجيل ونحاول نتجاوزها احسن من انتقادجيل لا يعري انتباها اصلا لاي انتقاد يصدر منك !!
----------------
الافكار لو ماجاتش مننا احنا ، و عملنا تحالفاتنا بايدينا احنا ، و احنا اللى ضغطنا و احنا اللى نفذنا
ماحدش تانى هايعملنا
=========
موقف النهاردة دا طلعنا منه و عملنا ايه ؟ أو قررنا ايه ؟ - ولا حاجة
هانفضل ناخد على دماغنا برضه و احنا ساكتين
و اللى كان طالع سخن اوى و عاوز يلمنا علشان نكتب ورقة بمطالبنا - آل يعنى ماكانش فيه ورقة مكتوبة من 6 شهور و كانوا بيتريقوا عليها - لما اتجمعنا اتكلم فى الهوا 3 دقايق و بعدها سكت ....... ليه ؟ لإنه عاوز يتنقل و كدا كدا هايهرب من الدوشة دى لفرع تانى ! فـ ليه يعمل شغب و هو عاوز مصلحته تمشى !!!
و الباقى فيهم كتير بينتفع من الهبل و الفساد الادارى الموجود ، و مش فارقة معاه الدنيا تتغير ولا لأ
انا مش هاعمل تغيير لوحدى ، و انت مش هاتعمل تغيير لوحدك ، و ايد لوحدها ماتسقفش
و مش هانتظر كمان 20 سنة لما الاقى واحد متعين جنبى عنده نفس الفكر فى التغيير ،، و انا قدامى نت و منتديات و طرق تواصل فى لحظات
و زى ما انا قولت برضه فى اول موضوع فوق :
اقتباس:
لو شعب مصر 80 مليون واحد ، منهم 5 مليون ممكن ييجى منهم ، الخمسة مليون دول منهم 200 الف واحد عنده افكار و مشاريع تطويرية ... المفروض الناس دى تتجمع و تجمع نفسها و مش هاقول يتعملهم وزارة لإن كدا الفكرة هاتموت ، لكن يتجمعوا بأى شكل ، و يحطوا الخطط التطويرية دى و يختبروها ، و بعد تكوين الخطة كاملة يطلعوا على الجهة أو الوزارة المختصة و يقدموها .. لقوا قبول خير و يكملوا
لقوا عدم اهتمام ، الـ 200 الف يعملوا اعتصام قدام الجهة دى لحد ما يبقى فيه اهتمام
الـ 200 الف مش كلهم فى نفس المجال ، بس هايدعموا بعض لإن ايد لوحدها ماتسقفش
--- مش عارف ، نعمل بنك الافكار على الفيس بوك مثلا ، أو قسم فى منتدى ، مش عارف ---
لو كلامى دا كله انا راميه فى المكان الغلط ، و ان المنتدى هنا بتاع عربيات و اجتماعيات و بس ، يا ريت حد يقولى فى رد ، أو فى رسالة ع الخاص .
علشان دى آخر محاولاتى ، لو فيه مكان اكتر متخصص دلونى عليه
