امتحان الرخصة الخاصة

**drmona** · 01-09-2014 08:50 PM

انا عايزة ادخل امتحان الرخصة الخاصة انا اتدربت مدرسة لكن مدخلتش الامتحان في معاده لاني مكنتش مستعدة و كنت متوترة جدا المفروض ادخل المرة الجاية بس خايفة جدا و دي اخر فرصة ليا عشان اعمل الرخصة
ممكن نصايح من اللي دخل قبل كده
و شكرا لكم

**J A G U A R** · 02-09-2014 12:50 AM

بصى لو هتخافى بلاش تدخلى أحسن علشان الخوف هايخليكى مرتبكه ومش هاتعرفى تعملى حاجه

هاتدخلى فى الاول اشارات ودى سهله

وبعدين هاتدخلى قياده وده رخم شويه ويا سلام بقى لو العربيه لادا بس لو بتسوقى كويس وبتشغلى المرايات مش هياخد 10 ثوانى ولو عرفتى تكرمشى 20 جنيه للعسكرى اللى قاعد جنبك يبقى تمام اوى وهايعديكى .. لو منفعش هاتتوكلى على الله وحاولى فى الطلعه تزودى بنزين شويه علشان العربيه متبطلش وعلشان مش هاتكونى متعوده على الدوسه وبالراحه وانتى بتعدى القراطيس

فى الرجوع حاولى تظبطى المرايات وتبقى عارفه مكان القراطيس فين بدل ما يتخبطو وبيكون فى مكان معين بتكسرى فيه الدريكسيون مره شمال ومره يمين وخلاص

ومن الاخر لو تعرفى حد فى المرور هاتطلع من غير وجع الدماغ ده

**ahmed.mustafa** · 05-09-2014 10:28 PM

حضرتك هو الامتحان سهل جدا انا امتحنت في شهر يوليو2014 في التجمع الخامس مكانش في امتحان اشارات و العملي كان سهل جدا و من غير رجوع بالضهر بس كانت العربية بتاعتهم و كانت مانيوال.
كله كان بينجح حتى اللي مساقش مانيوال قبل كدة.
انتي بتدي الاول و تمشي بالراحة اهم حاجة متخبطيش في الإقماع و متفرمليش جامد مرة واحدة.
الموضوع سهل جدا و ان شاء الله تنجحي

**rias** · 06-09-2014 11:35 AM

بعد الأستعانة والتوكل على الله
الدخول بين الأقماع سهل
1- لما اول قمع يمين يبقى بجوار القايم اليمين للسيارة (منتصف السيارة يعنى) لفى الطارة لليمين مع عقارب الساعة
2- ولما تانى قمع شمال بجاور القايم الشمال لفى الطارة عكس عقارب الساعة
3- أدخلى بين أخر قمعين بوش العربية بس مش بكاملها ..الدخول سهل خالص
الرجوع (سبب سقوط الأغلبية)
1- أرجعى وعينك على المرايا الشمال قربى من القمع اللى على شمالك ورا وأول لما العجلة الخلفية شمال تكون شبة ملاصقة للقمع (يعنى بين القمع والعجلة 10سم مثلا ..عرض العربية بيأثر برضة) ومركز العجلة بجوار القمع (متخليش العجلة تعدى القمع ) لفى الطارة بالكامل عكس عقارب الساعة وبالتعبير الدارج (أكسر كله) ومتخفيش مش هتخبطى القمع اليمين (لأن الكل بيخاف من كده) كل اللى فات سهل الخطوة اللى جايه أهم شئ:
2- وأنت بترجعى وبعد ما لفيتى الطارة بالكامل عينك تنتقل و تركز على المرايا اليمين وأول ما يظهر القمع الأيمن الأخير (اللى كان أول قمع يمينك وانت داخلة) فى المرايا أبدأى لفى الطارة مع عقارب الساعة وانت بترجعى بحرص وأجعلى العجلة اليمين الخلفية بجوار القمع تماما وارجعى (زى ما عملنا فى القمع الشمال السابق بس بطريقة معكوسة) هتلاقى نفسك خرجتى من بين القمعين اللى كنت داخلة منهم فى البداية
أنا عارف ان الشرح النظرى ربما غير واضح بس لو بصيتى على حد وهو داخل الأختبار فى المرور تقدري تستوعبى كلامى
العربية ما تبطلش لو بطلت أكتر من 3 مرات بيخرجك
وانت راجعه للخلف ممنوع تتوقفى للتقدم بالعربية ثم اعادة الرجوع للخلف لازم ترجعى ديركت (يعنى متغيرش النقلة)
ملاحظة هامة :: كونى هادئة تماما وتتحركى بحرص ولا تلتفتى لمن يشير أليك بالتحرك أسرع ولا لمن يحاول يوترك فالتوتر والقلق سبب كافى للسقوط رغم أجادة القيادة
دعواتى لك بالتوفيق

**S O P H O S** · 07-09-2014 05:49 PM

زي ما قال الاخوة
والموضوع مش مقلق اوي كده
والثقة هي اقصر طريق لنجاح الاختبار ده

**mif** · 20-10-2014 11:42 AM

المشاركة الأصلية كتبت بواسطة rias

بعد الأستعانة والتوكل على الله
الدخول بين الأقماع سهل
1- لما اول قمع يمين يبقى بجوار القايم اليمين للسيارة (منتصف السيارة يعنى) لفى الطارة لليمين مع عقارب الساعة
2- ولما تانى قمع شمال بجاور القايم الشمال لفى الطارة عكس عقارب الساعة
3- أدخلى بين أخر قمعين بوش العربية بس مش بكاملها ..الدخول سهل خالص
الرجوع (سبب سقوط الأغلبية)
1- أرجعى وعينك على المرايا الشمال قربى من القمع اللى على شمالك ورا وأول لما العجلة الخلفية شمال تكون شبة ملاصقة للقمع (يعنى بين القمع والعجلة 10سم مثلا ..عرض العربية بيأثر برضة) ومركز العجلة بجوار القمع (متخليش العجلة تعدى القمع ) لفى الطارة بالكامل عكس عقارب الساعة وبالتعبير الدارج (أكسر كله) ومتخفيش مش هتخبطى القمع اليمين (لأن الكل بيخاف من كده) كل اللى فات سهل الخطوة اللى جايه أهم شئ:
2- وأنت بترجعى وبعد ما لفيتى الطارة بالكامل عينك تنتقل و تركز على المرايا اليمين وأول ما يظهر القمع الأيمن الأخير (اللى كان أول قمع يمينك وانت داخلة) فى المرايا أبدأى لفى الطارة مع عقارب الساعة وانت بترجعى بحرص وأجعلى العجلة اليمين الخلفية بجوار القمع تماما وارجعى (زى ما عملنا فى القمع الشمال السابق بس بطريقة معكوسة) هتلاقى نفسك خرجتى من بين القمعين اللى كنت داخلة منهم فى البداية
أنا عارف ان الشرح النظرى ربما غير واضح بس لو بصيتى على حد وهو داخل الأختبار فى المرور تقدري تستوعبى كلامى
العربية ما تبطلش لو بطلت أكتر من 3 مرات بيخرجك
وانت راجعه للخلف ممنوع تتوقفى للتقدم بالعربية ثم اعادة الرجوع للخلف لازم ترجعى ديركت (يعنى متغيرش النقلة)
ملاحظة هامة :: كونى هادئة تماما وتتحركى بحرص ولا تلتفتى لمن يشير أليك بالتحرك أسرع ولا لمن يحاول يوترك فالتوتر والقلق سبب كافى للسقوط رغم أجادة القيادة
دعواتى لك بالتوفيق

ممكن اللى بيختبر يطلع راسه من الشباك يبص على القمع ؟

**drmona** · 21-10-2014 08:18 PM

المشاركة الأصلية كتبت بواسطة mif

ممكن اللى بيختبر يطلع راسه من الشباك يبص على القمع ؟

متهيالي ممكن لان محدش بيقعد جنبك انا شخصيا كنت باصة ورا عادي و انا برجع ورا يعني مش في المرايا

**J A G U A R** · 23-10-2014 07:07 PM

المشاركة الأصلية كتبت بواسطة mif

ممكن اللى بيختبر يطلع راسه من الشباك يبص على القمع ؟

انت وحظك

يعنى لو العسكرى او الظابط مركز معاك وبصيت وراك ممكن تلاقى اللى نازل على وشك هههههه بهزر طبعا هتلاقيه بيقولك بص قدامك ولو مش مركز معاك او مش شايفك ممكن تبص عادى