استشارة عاجلة فى اغرب معركة بين المالك والمستاجر فمن ينقذنى

قصتى مع المستاجر تحكى فى الف ليلة وليلة ولكن باختصار لحكايات السنين حتى لا اطيل عليكم

القصة انى انا مالك لعقار فية شقق ايجار قديم وانا كمالك ايضا مقيم فى العقار مع المستاجرين

قام المستاجر بحركة خبيثة جدا لاجبارى على شراء شقتة المتهالكة وعمل شكوى فى الحى لترميم العقار وجاء لقرار الحى بترميم شامل للعقار(بعد دفع اللى بالى بالك ) رغم ان عمرة 30 سنة فقط وكانت تكلفة الترميم تتعدى ال نصف مليون جنية نقدا وعدا !!!!

تخيل نص مليون جنية وانا العقار سنويا مش بيدينى اكتر من 500 جنية ايجار سنويا وليس شهريا ههههه مسخرة سنين طبعا

روحت اقابل المستاجر اشوف طلباتة اية واستريح من قرفة.........قعد حاطط رجل على رجل فى وشى هو واولادة الخمسة وقاعدن شمتانين فيا ومن الفلوس اللى هدفعها ترميمة وراح الراجل قلى عايز شقة سوبر لوكس قيمتها لا تقل عن مليون جنية عشان اخرجة والا ادفع نصهم ترميم فى العقار غصب عنى !!!!!!!!!

طبعا رفضت طلبة وروحت لمحامى ابن حلال قلى هو مش بيذلك ومطلع ايماناتك انت كمان اقرف المستاجر قلتلة دبرنى يا وزير ..................؟

قلى انت كمان اطلب لية قرار بترميم شقة المستاجر وليس ترميم لخرسانة العقار فقط واطلب تمكين من شفتة للترميم واطردة طرد مؤقت وهو من حقك قانونا من الشقة لحين اتمام الترميم ويحق ليك ان تقوم بتكسبر كل بلاط الشقة والدهانات والمطبخ والحمام والسباكة وانك ترمى عفشة برة الشقة وانت عليك ترميم الكمرات والخرسانة فقط قانونا وشرعا وبكدة هو شقتة هتدمر تماما لانك هتسلمها لية على المحارة وبكدة واحدة بواحدة والبادى اظلم وهو كدة هيقلل من طلباتة المستفزة

والسوال الان هل لو انا جالى فعلا قرار بتمكين من شقة المستاجر لان العقار كلة تحت الترميم

هل لو انا كسرتلة شقتة وانا برمم ........ هكون ملزم بتعويض ما اتلف اثناء الترميم؟؟ من دهانات وسيراميك ومطبخ وحمام ؟؟

ارجو الافادة لان كلام المحامى ممكن يكون خطاء وساعتها هلبس فى الحيط وكفاية فلوس الترميم اللى علية

لعنة الله على مغتصبي الاملاك ......

اكتر واحد يفيدك هو المحامي اللي اشار عليك بكدا


ملاحظة ...لو المستأجر زبالة زي منتا بتحكي عنه كدا ...يبقي انسب حل ليه الاسلوب الزبالة ...واعتقد ممكن حضرتك تكون فاهم

اقتباس:

---

المشاركة الأصلية كتبت بواسطة حسام الغرباوي

اكتر واحد يفيدك هو المحامي اللي اشار عليك بكدا


ملاحظة ...لو المستأجر زبالة زي منتا بتحكي عنه كدا ...يبقي انسب حل ليه الاسلوب الزبالة ...واعتقد ممكن حضرتك تكون فاهم

---

زبالة كلمة قليلة جدا للوصف

انا بينى وبينة حكايات كتير جدا لم اذكرها لضيق المقال تتعمل افلام سيما تاخد جوايز اوسكار


ولو تشوف الراجل وهو حاطط رجل على رجل فى وشى ........ ولو تشوف فرحتة وشماتة فيا لما لبسنى بنص مليون جنية تكلفة ترميم العقار .......ز هتعرف ان كلمة زبالة دى قليلة جدا علية

الشعب المصري عنده مرض نفسي ...

اكتر واحد هيفيدك محاكى صايع بس بصراحه مستاجحر ابن كلب بصراحه هيا ناقصه غباوه

على فكرة فيه تظلم من حقك تقدمه على قرار الترميم

لا أنصحك بمقابلة الإساءة بالإساءة، كما أحذرك أيضاً من ألاعيب المحامين لأنها في الغالب ترتد على صاحبها، وقد يكون محامي الخصم أخبث من محاميك فتدخل في دوامّة..


الحل من وجهة نظري هو أن تسلك الطرق الودية.


الطريق الأول: الجلوس مع السكان جميعهم، وعرض الموضوع عليهم بتفاصيله كاملة، وتوضيح الصورة من حيث الإيجار الفعلي الذي تحصل عليه والتكلفة المتوقعة لأعمال الترميم للمبنى كله. اعرض عليهم المشاركة في التكاليف لأن المنفعة عامة والمصلحة واحدة..


وقد حدث هذا مع أحد أقربائي حيث شارك السكان في ترميم جزء متهالك من العمارة ودفع كل واحد منهم تقريباً 15 ألف جنيه..


الطريق الثاني: لو لم يتعاون معك أحد وأنت ميسور مادياً وقادر على تحمل تكلفة أعمال الصيانة، فلماذا لا تقوم بها بمفردك؟



أولاً: الصيانة لبيتك وأنت المالك له كله، وستستفيد من ذلك مباشرة أيضاً لأنك تسكن فيه.. لو لم يكن متهالكاً وبحالة سيئة لما صدر قرار يلزمك بصيانته.. فهو خطر عليك ابتداءً وضياع لمصدر دخل لك ولأولادك مستقبلاً كما سترى في النقطتين التاليتين..


ثانياً: هناك الآن لجنة اسمها "لجنة تعديل قانون الإيجار القديم" تتبع وزارة الإسكان مباشرة وتدرس بهدوء حلول عملية لهذه المشكلة. وقد قال إبراهيم محلب لليوم السابع حرفياً "هناك ظلم كبير واقع على الملاك.. والمستأجر يعلم جيدا أن ما يسدده كإيجار للوحدات المؤجرة بالقانون القديم ليس القيمة العادلة".. إذن هذا توجه واضح للحكومة وإن كان بطيئاً..


ثالثاً: هناك لجنة حكومية لمراجعة التشريعات القديمة كلها في مصر (أكثر من 61 ألف قانون منها ما يعود إلى سنة 1935) وقد يكون قانون الإيجار القديم من ضمنهم ويتغير الحال بين عشية وضحاها، ويعود النفع لك ولأولادك.. بالطبع لن يتم طرد المستأجرين، لكن على الأقل سيتم رفع قيمة الإيجار لتتناسب مع مستوى المنطقة والتغير الزمني..


رابعاً: الدخول في مناكفة قانونية سيكلفك أموال كثيرة وجهد كبير واستعداء لجار سيئ أنصحك بأن تتجاهله لتأمن بوائقه..

انا مش بفهم فى الحاجات دي .. بس طالما البيت متهالك ومحتاج ترميم ... روح هات قرار ازالة للبيت كله ونزله فوق دماغهم كلهم

انا بسمع ان دي لعبة الناس بتعملها لما تكون عايزه تطلع الناس اللى واخدة ايجار قديم

بس برضه محتاج تسأل كويس جدا جدا قبل ما تعمل اي حاجة

فى حل احسن انك تقول انك مش قادر ترمم و تطلع قرار ازاله للعقار ولما العقار يتهد ملكية الارض كلها حترجع ليك .

ولو انت عملت كده هو اللى حيجرى علشان يعمل استشكال على قرار الازالة .

ردا على كل المشاركات

بالنسبة لوجود لجنة حكومية للبحث قانون الايجار القديم............. بص لن يجرؤ اى حاكم للبلاد ولو بعد الف سنة من الاقتراب من قانون الايجار القديم لان نص البلد هتترمى فى شارع ولو عدل حتى قيمة الايجار القديم وزود قيمة الايجار مئة ضعف فالاخر الايجار لن يزيد قيمتة عن 300 او 400 جنية شهريا لان فى الاصل قيمة الايجار لا تتعدى جنيهات معدودوة

بالنسبة لقرار الازالة المشار الية من الاعضاء ............. كان غيرك اشطر لان اصدار قرار بازالة العقار يحتاج الى فترة من عشرة الى عشرين سنة دة لو اتحكم اصلا بالازالة انما القرار بيجى فى الغالب بتنكيس العمارة يعنى ازالة دور او دورين بكتير ويبقى باقى العقار موجود مع العلم ان هناك عقارات عدت عمر المية سنة ولم يصدر لها قرار بالزالة العقار

بالنسبة لفكرة مشاركة السكان فى الترميم .......... فاولا مستحيل انك تقنع السكان كلهم بتحمل مبلغ ضخم فى ترميم وخصوصا ان اغلب السكان واخدين شقق وقفلنها كالعادة فى كل عمارات لاليجار القديم فى مصر ..ثانيا العقار فعلا حالتة جيدة جدا بس الراجل كان مقبض حلو للمهندس المعاين للعقار عشان يصدر قرار بترميم كمدا وغيظا فى شخصى ولوى دراعى عشان اجيبلة شقة لوكس مكان شقتة الايجار

اخيرا لما قعدت افكر بينى وبين نفسى لاقيت ان يكون عندى شقة ايجار قديم احسن الف مرة من شقة تمليك لان صيانة وترميم العقار على المالك ولما المستاجر بيجى يمشى بياخد فى الاخر حق شقة تمليك واكتر شوية ............ وعجبى على الاوضاع فى مصر

اوعى المستاجر يساومك على تمليك الشقه له
سعتاها سيكون كعبه و كعب السكان عالى عليك

انا معايا نفس المكشله ولكن ترمميمات عادية
و المحامى بتعانا اوضح لى ان الثلث التكلفه الترميميات بتكون على المالك و الثلثين الباقيين على المستاجرين
ودا قانون ,,
ولكن الافضل ليك ان تشوف سكه مع الساكن ( المستاجر ) اللى عاوز يمشى يعنى فيه شقق بتخلص على 25 الف و هناك ب 15 الف دا على حسب حاله البيت و مكانه و فيه شقق بتخلص على اعلى من كده (مثال لو شقه وحيده فى البيت و بخروج الساكن يبقى البين خالى تماما )و يمكنك اقناع المستاجر ان الافضل ليه انه يمشى عشان البيت ايل للسقوط ,, متهالك ,, احسن يقع على دماغه لا قدر الله ,, او او او

عايز تقرفه ... انزل باجنة وشاكوش وكسرله باب الشقة .... حيروح يعملك محضر اتلاف وتنزل جنحة ضدك ههههه مفيش قضية متخافش لان الباب ملكك ومحدش بيتعاقب علي اتلاف ملكه وحيركب باب جديد كسره برضه ... حتقولي ما هو ممكن يعمل معايا كدا ويكسرلي باب الشقة بتاعي اقوللك انه ساعتها حيلبس حكم

اقتباس:

---

المشاركة الأصلية كتبت بواسطة tarek12

اوعى المستاجر يساومك على تمليك الشقه له
سعتاها سيكون كعبه و كعب السكان عالى عليك

انا معايا نفس المكشله ولكن ترمميمات عادية
و المحامى بتعانا اوضح لى ان الثلث التكلفه الترميميات بتكون على المالك و الثلثين الباقيين على المستاجرين
ودا قانون ,,
ولكن الافضل ليك ان تشوف سكه مع الساكن ( المستاجر ) اللى عاوز يمشى يعنى فيه شقق بتخلص على 25 الف و هناك ب 15 الف دا على حسب حاله البيت و مكانه و فيه شقق بتخلص على اعلى من كده (مثال لو شقه وحيده فى البيت و بخروج الساكن يبقى البين خالى تماما )و يمكنك اقناع المستاجر ان الافضل ليه انه يمشى عشان البيت ايل للسقوط ,, متهالك ,, احسن يقع على دماغه لا قدر الله ,, او او او

---

حكاية التلتين التكلفة على المستاجر والتلت على المالك دى كذب فى كذب قولى لية ؟؟؟

اولا

الترميم الخرسانات والكمرات والشقوق دة من صلب العمارة ككل وبالتالى الاجمالى بيكون على المالك

لكن ترميم شقة المستاجر نفسة دى التلتين والتلت زى ما بتقول ودى مش هتفرق كتير لان اغلب اجمالى الترميم بيكون فى اساسات العمارة وليس الشقة المستاجر نفسها فهمت قصدى ؟؟

ثانيا

الترميم بيتحسب ازاى على العمارة تعالى افهمك الحتة دى ................. نفترض العمارة عشر ادوار في كل دور 3 شقق مثلا اذن اجمالى الشقق العمارة 30 شقة .............. طيب لو المستاجر شقتة متبهدلة وعايزك ترمم لية على قفاك ؟؟ ساعتها هيتحسب ترميم شقتة جزء من تلاتين جزء من اجمالى الترميم كدة وصلت المعلومة ؟؟

معلش يا زعيم ان مفهمش فى الكلام ده بس فى سؤال شاغلنى
لو منفذتش قرار الترميم ايه اللى هيحصل

اقتباس:

---

المشاركة الأصلية كتبت بواسطة cosmo

معلش يا زعيم ان مفهمش فى الكلام ده بس فى سؤال شاغلنى
لو منفذتش قرار الترميم ايه اللى هيحصل

---

قضية جنائية تصل الى الحبس لتقصيرك فى جماية السكان العمارة

وياما ملاك عقارات راحوا السجن عشان انهيار بلكونة او شباك فى عمارة بتجيب ايراد خمسة جنية شهريا من الايجار

والاعلام والجرايد فى الاخر يطلعك مجرم وقاتل للسكان !!!!!!!!!!!!!!!!!!!!!!

باشا استشكل على قرار الترميم وراضى المهندس اللى حيجى يعاين حيطلعلك تقرير ان حاله العماره زى الفل وان الاساسات تتحمل 25 دور كمان لانك كده كده لو راضيته حتظل القضيه مفتوحه والقرار قائم
خللى المحامى او حد من طرفك ينزل الحى ويسأل على مهندسين المعاينه ويسلكلك امورك علشان تخلص
ولو فعلا العماره محتاجه ترميم امشي في إجراءات قرار الازاله وهدد الأخ اللى قارفك بورق رسمي انك ماشي في الإجراءات وراشش في الحى والموضوع حيخلص قريب وسيبه يعيش مع القلق فتره لان الفكر أسوأ حاجه تضايق بيها بنى ادم .

اقتباس:

---

المشاركة الأصلية كتبت بواسطة الفجر

حكاية التلتين التكلفة على المستاجر والتلت على المالك دى كذب فى كذب قولى لية ؟؟؟

اولا

الترميم الخرسانات والكمرات والشقوق دة من صلب العمارة ككل وبالتالى الاجمالى بيكون على المالك

لكن ترميم شقة المستاجر نفسة دى التلتين والتلت زى ما بتقول ودى مش هتفرق كتير لان اغلب اجمالى الترميم بيكون فى اساسات العمارة وليس الشقة المستاجر نفسها فهمت قصدى ؟؟

ثانيا

الترميم بيتحسب ازاى على العمارة تعالى افهمك الحتة دى ................. نفترض العمارة عشر ادوار في كل دور 3 شقق مثلا اذن اجمالى الشقق العمارة 30 شقة .............. طيب لو المستاجر شقتة متبهدلة وعايزك ترمم لية على قفاك ؟؟ ساعتها هيتحسب ترميم شقتة جزء من تلاتين جزء من اجمالى الترميم كدة وصلت المعلومة ؟؟

---

وقت ما عملت التررميم انا اشتشرت اكثر من محامى و احد قال ان كافه الترلاميميات بتكون على المالك ,, و محامى اخر موثوق فيه قال لى الثلث على المالك و الثلثني على المستاجر و هذا طبقا لحكم محكمه و هو دا اللى اتنفذ

اما بالنسبه لقولك ان اترميمات الداخليه فى الشقه بتكون كذلك ( الثلث على المالك و الثلثن على المستاجر ),, فاللى فهمك هذه المعلومة بيستجرتك و عذرا لهذا اللفظ لان ببساطه مكتوب فى عقد من العقود القديمة ( يتعهد المستاجر بعمل اى الترميمات او اصلاحات او اى تلفيات فى الشقه المؤجرة و تكون على نفقته الخاصه و لا يتحملها المالك )
و عشان كده هناك البعض من الملاك اللى بضيع حقهم عشان مش عاوزين مشاكل و هناك المالك الجامد الى بياخذ حقه ,, و هناك المالك الكروديا و هناك المالك اللى بيداس عليه من المستاجر و بيترفع فى وشه القديمة

ان شاء تكون فهمت الكلام ..,, اسال محامى و اثنين ,, و لا خاب من استشار

لما تقرا التعليقات والاحداث اللى بتحصل فيها تقتنتع تماما ان مفيش فايدة فى البلد دى مهما حصل

بصراحه موقف صعب جدا ربنا يكون معاك
بس سؤال دلوقتى مطلوب نص مليون جنيه ترميم العماره
طيب لو حضرتك مش معاك المبلغ دا ودا شىء عادى خصوصا ان كل الأيجار السنوى زى حضرتك ما قلت 500 جنيه
حايكون الموقف ايه من الناحيه القانونيه

اقتباس:

---

المشاركة الأصلية كتبت بواسطة ahmed abdkarim

فى حل احسن انك تقول انك مش قادر ترمم و تطلع قرار ازاله للعقار ولما العقار يتهد ملكية الارض كلها حترجع ليك .

ولو انت عملت كده هو اللى حيجرى علشان يعمل استشكال على قرار الازالة .

---

هو ده الكلام .. على حس قرار الترميم اللي هو جابه هات إنت بقى قرار إزاله للعقار بما إنه متهالك ومحتاج للترميم .. وخليه بقى يبقى عمل زي الدبور اللي زن على خراب عشه .. اهو كده قصر عليك السكه وقطعلك نص المشوار .. وفي الأخر لو رحت للحكومه وقولتلهم مش دافع هيعملوا أيه ؟؟ هيسجنوك عشان ترمم العقار اللي مش بيجيلك منه غير 500 جنيه في السنه ؟ طبعا لأ .. العقل والمنطق والقانون بيقول ياإما التكلفه تتوزع ع السكان ياإما قرار بإزالة العقار .. مات الكلام... وبرضه إسأل كذا محامي وياريت تشوف محامي معرفه او ثقه مايحورش عليك عشان يطلع مصلحه .

بصراحة انا تهت ومبقتش عارف فين الصح وفين الغلط

مش قادر احكم فين الحق

من اراء الناس حاسس ان القانون بتاعنا ده لوقعدوا ميت سنة يعدلوه هيطلع محامي او مواطن خبيث يطلع ثغرات القانون وياخد حق مش حقه او يأذي شخص تاني مسالم وملوش في الخباثة

متي يفيق الضمير عند معظم المصريين فيطبقون الحق والعدل بينهم

اللهم ايقظ عقول وقلوب وضمائر المصريين وانشر الحق والعدل بينهم يا ارحم الراحمين

انته عندك المستاجر زباله عندنا بقي المالك هوا الي زبالة لو مكناش لسه من سنتين مرممين البيت كنت سقلتك عمل ايه عشان نعمل زيه