الموضوع: مساعدة فى تسعير ماتريكس 2006 خليجى ضروررررى

السلام عليكم اعضاء المنتدى الكرام
الرجاء المساعدة من الخبرا فى تسعير ماتريكس 2006 كورى اتوماتيك عاملة 160000 كيلو متر بتاعة صديق لى وعايز اشتريها هى فابريقة كلها وسقف وكبوت وشنطة ورشة جانبين فيها فتحة سقف ومخدع امامى وخلفى ومساحة خلفية وفول سبويلر اصلى بتاعها ولسه صاحبى ده مركب عفشة جديدة اصلى اربع مساعدين kyb يابانى ومقصات جديدة بصراحة عفشتها تحفة وبطاريتها لسه جديدة بقالها شهر بالضمان
ومغير بوجيهات بلاتنيوم وتكييف تلاجة باختصار العربية مفيهاش حاجة لاصل هو زميلى فى البنك وجارى كمان وبنروح ونيجى مع بعض وبقالها معاه 3 سنين يعنى من الاخر العربية معرف وهو حايجيب خلاص الاتراج الجديدة وعايز يبيعها بس علشان احنا صحاب وزمايل الموضوع محرج هو قالى شوف على النت اسعارها كام ومش حانختلف بس فوجئت باللى طال 97000 و93000 واقل واحد 89000 والله اعلم بالحالة بس دى انا عارفها وسوقتها بنفسى تحفة بصراحة ومحتاجة بس تغير قاعدة الموتور علشان فى رعشة فى العربية لما بيشغل التكييف وهو غير القاعدة الكبيرة من سنة وانا معاه تقريبا بقية القواعد عايزة تتغير وقالى انها رخيصة واعملهالك المهم علشان ماطولش عليكما انا شايف ان سعر النت ده مبالغ جداااا انا قلت له 89000 فهل فى رايكوا السعر ده كويس ولا غالى مع العلم انى لسه ما نفذتش علشان هو طالع يصيف بيها فى السخنة وقال نكلم بعد ما نرجع
يا ريت المساعدة من خبراء المنتدى الكرام ولكم جزيل الشكر

المشاركة الأصلية كتبت بواسطة mr . Gold

غالية سعر العربية كدة علي الموديل وأنها مش فابريقة بالكامل زي ما حضرتك بتقول راشة جنبين دي آخرها 82 وتبقي عامل معاه واجب كمان وانت براحتك عارف السعر دة بتاع 2008 و 2009 وربنا يوفقك

يا سيدي الفاضل ال 82000 ج اللي قلت معاليك عليهم ده سعر ال 2006 بتاعت الوكيل ..
اما الفرق بين الخليجي 2006 و الوكيل 2008 و 2009 و كل شغل الوكيل فهقولك على فروقات صغيرة ع السريع :
1/ مبدئيا تكييف الخليجي و العربية واقفة من غير ماتكون ماشية و فيه هوا بيبرد السربنتينة هو نفس برودة ماتريكس الوكيل و العربية ماشية على 120 و السربنتينه الهوا بيطري عليها .. و اللي يقولك انا تكييفي ثلاجة و هو معاه ماتريكس وكيل يبقى ما يعرفش بتاتا يعني ايه تكييف خليجي !!

2/ضفيرة الكهرباء الذكية في الماتريكس الخليجي تم استبدلها من سي غبور الوكيل بضفيرة كهرباء عادية جدا جدا .. فمثلا في الخليجي لو بالليل و نور العربية مفتوح و انت بتركن .. فانت مش محتاج اطلاقا انك تقفل نور العربية من الدراع .. انت بس مجرد فتح باب السائق بعد تبطيل العربية و نزع المفتاح من الكونتاك هتلاقي كل لمبة في العربية طفت لوحدها !!! و مثال اخر : لو مانزلتش فرامل اليد كويس بعد 5 ثواني من مشيك بالخليجي هتلاقي جرس باب العربية و هو مفتوح بيرن لتنبيهك انك تكمل تنزيل فرامل اليد جيدا .. طبعا ده مش في الوكيل بتاتا !!!! و مثال اخر : ريموت الخليجي اصلي و منفصل عن المفتاح و من اهم و اذكى اوبشاناته انك بمجرد قفل السيارة بالريموت و جه حرامي معاه مفتاح العربية و فتحها و الانذار هيشتغل طبعا و حاول يشغلها فمش هتدور معاه نهائيا لانها فاصلة طرمبة البنزين مش فاصلة كهرباء بس ... اما الوكيل فريموت العربية 2006 من مصنع غريب اما 2008 و 2009 مش عارف مين اللي عاملهم الريموت .. و مثال اخر : دراع المساحات في الوكيل بسرعتين فقط لااااااا غير .. اما دراع المساحات في الخليجي فيكفي اني اقولك انه فقط في اول سرعة للمساحات فيه اوبشن تحكم تشغيلها بالتتابع من مدة ثانية واحدة الى مدة 18 ثانية حسب قوة المطر او سرعة نزوله ..

3/كرسي السائق في الوكيل دراعين فقط واحد للظهر و الثاني لتحريك الجسم كله ... اما في الخليجي فبالاضافة للدراعين التقليديين عند الوكيل فعندك دراع في جنب ظهر الكرسي من ناحية الشمال لنفخ الاسفنج في منطقة نهاية العمود الفقري .. و بكرتين هيدروليكيتين في جنب مقعد الكرسي زي الالماني لتغيير وضعية جلسة السائق من حيث العلو و الخفض و من حيث انسب وضع لراحة الفخذين !!!!! بالاضافة طبعا لمخدع يد ملتصق في كرسي السائق ..

4/كل موديلات الوكيل غبور افندي هتلاقي ظهر الكنبة الخلفية بدون مخدع ينزل في النص .. اما الخليجي فهناك مخدع به حامل كوبايتين ..

5/فتحة سقف في ال 2006 و 2005 الخليجي و فقط !!!!

6/الخليجي اقل ارتفاعا للحفاظ على ثبات العربية .. اما الوكيل فاعتقد انه اتهيأ له انها جيب بجد فرفعها بزيادة .. مش كدة وبس ؛ ده كمان الوكيل نفخ الكراسي اسفنج بطريقة بلدي علشان يوهم الراكب انه راكب عربية عالية و بالتالي بقينا بنعرف لون بنطلون الراكب بكل سهولة .. اما في الخليجي ماشغلش باله بكل ده و مخلي وضعية الكراسي شبيهة نوعا ما بالسيدان ..

7/ في الخليجي مساحة خلفية للزجاج الخلفي ..

8/ في الخليجي سبويلر اصلي غير مضيء على شنطة السيارة من ناحية السقف ..

دي الحاجات الشكلية اللي مابيعرفش قيمتها الا اللي ركب الاثنين ..
و طبعا ما اتكلمتش عن جودة العزل و التقفيل و روعة العفشة في الخليجي و الفرق بين محرك الفيرنا اللي الوكيل حطه في الماتريكس و بين المحرك المغطى بمقاوم حراري خاص بالسيارات الخليجي !! فالمحركين مختلفيين شكلا و موضوعا ..
ما شاء الله من روعة التقفيل و العزل .. اول ما جبت الخليجي و شغلت التكييف افتكرت ان الكلاكس بايظ لاني سامعه كأنه مبحوح فقلت هغيره .. شوية و بقفل التكييف و بفتح الشباك و عاوز اسمع صوت العجل و ضربت كلاكس لقيت صوت عالي و نقي مختلف عن اللي سمعته و الشباك مقفول !!!

كفاية كدة علشان مستعجل .. بس احب افكر صاحب الموضوع ان سعر العربية دي تجاري للتجار علشان ياكل من وراها عيش و تكون بحالة جيدة جدا هو 88000 ج .. و يبيعوها ب 92000ج قابلة للزيادة او للنقص ..