الموضوع: تركيب زينون في رينو فلوانس

السلام عليكم و رحمة الله و بركاته

انا كنت عايز أركب زينون في عربية رينو فلوانس 2015 , في ناس بتقول اي لعب كهرباء خارج التوكيل يخرج العربية من الضمان , رحت كلمت التوكيل رد عليا واحد بتاع صيانة مايعرفش اي حاجة زي حالاتي و قالي اسأل المهندس , كل اللي استفدته منه ان ممكن اركب فانوسين زينون شاكب راكب بــ 9,000 جنيه بس , ايوالله 9,000 جنيه بس , المهم هوا قالي انا ماعرفش ممكن تركب زينون اصلا ولا لأ

قاعدت ادعبس على النت و في الكاتالوج و تقريبا وصلت لشوية معلومات ماعرفش هما صح ولا غلط و بناء عليه ممكن أخد قرار انا هاعمل ايه , فا كنت محتاج مساعدة أهل الخبرة جزاكم الله كل خير :

1- مكتوب في الكتالوج بفضل الـ55W عن الـ35W في العربية , و انا قريت ان الـ55W عمره أقصر و مش فارق كتير اصلا عن ال35W !!!!
2- لمبة العربية H7 , دا فعلا صح ولا غلط , و دي يركبلها زينون عادي ولا باي زينون ولا هي dual beam ولا ايه القصة بالظبط حد يفهمني !!!!
3- الالوان و درجة الحرارة , بنتكلم من 4,000K المصفر وصولا للـ30,000K الموف تماما , بس اللي انا فاهمه ان احسن حاجة هما 6,000K و 8,000K عشان لونهم ابيض مزرق على خفيف , مداهم ابعد و أريح للعين , الكلام دا صح ولا غلط ؟؟؟
4- لو فرض انا قررت اجيب 55W/H7/8000K لو المعلومات اللي انا جبتها دي صح , أجيبه منين و بكام و أخدره و أروح اركبه في التوكيل كدا على طول ؟؟؟؟