تقرير مصور عن فك وتنظيف المنافولد فى موتور x20xev

**Hesham.H** · 04-09-2014 07:06 PM

الزملاء الأعزاء .. السلام عليكم
بدون مقدمات كتير لأن الموضوع طويل .. النهارده موضوعنا عن المنافولد فى موتور x20xev واللى هو نفسه اللى موجود فو موتور c20sel والموتورين دول اللى موجودين فى معظم العربيات الفكترا بى ٢٠٠٠ سى سى

نصيحه لوجه الله لو مش حافظ موتورك بلاش تعملها بنفسك

هحاول اختصر قدر المستطاع منعا لتشتيت الفكر .. بس نصيحه لازم تكون واكل كويس لان الموضوع متعب وبياخد وقت طويل

اول حاجه لو هاتعملها فى البيت زى ما انا عملت يبقى معاك طقم عده محترم

ولو الوضع طلع سيئ فى المنافولد بعد الفك هاتحتاج شنيور بفرشه سلك وماكينه غسيل ضغط زى دول

هانبدأ على بركه الله وده منظر الموتور اللى هانشتغل عليه وأول حاجه هانعملها هانشيل العمه او الهوايه وعشات نشيلها لازم نفك الحاجات المترقمه فى الصوره

١ خرطوم بخار الزيت ٢ فيشه حساس الهواء ٣ فيشه حساس درجه حراره الهواء

وبكده الهوايه جاهزه للخلع وهايكون ده منظر الموتور بعدها

الخطوه الجايه هى فك البوابه وعشان نفكها لازم نشيل الآتى

١ فيشه الأيدل ... ٢ فيشه التى بى إس ... ٣ خراطيم تبريد البوابه ... ٤ خراطيم الفاكيوم اللى راكبه فى البوابه ... 5 خرطوم داخل وراجع مسطره البنزين .... ٦ واير دواسه البنزين

مره تانيه لو مش هاتعرف تركب الكلام ده تانى يبقى بلاش تعملها بإيدك

كده هانبقى جاهزين نفك البوابه بالسلامه وهايبقى عن طريق ٤ صواميل ١٠ هانفكهم زى الصوره كده

بعد ما خرجنا البوابه

وده منظر من الموتور بعد فك فيشه حساس الكامه وحساس الكرنك ورفع ضفيره الرشاشات بعيد عن المنافولد

كده فاضل اننا نفك المسامير اللى ماسكه المنافولد فى بلوك الموتور وللأسف ماعرفتش اصور الخطوه دى كويس بس مع الوصف والصوره دى هانفهمها كويس بأمر الله

هما عباره عن ٦ صواميل تحت الرشاشات وصاموله فى الشمال ومسمار فى اليمين كلهم ١٣ هاتفكهم بلقمه ويد سستيم ... وهانفك قاعده الدينامو اللى راكبه فى المنافولد كمان

وطبعا ما ننساش نشيل كل خراطيم الفاكيوم اللى راكبه فى المنافولد وفيش الحساسات اللى تحت ( مهم جدا انك تاخد بالك منهم عشان ما تقطعش الضفيره وهما اللى عليهم السهم ده بعد خروخ المنافولد ( الصوره من على النت مش من عربيتي )

وده منظر المنافولد منظر المنافولد ( من على النت برضو )اللى هانشتغل عليه ...

المانفولد بتاعى طالع نضيف اوى من بره وابن ناس لانى طبعا كنت عملت شغل فى العربيه من قريب والبيه الميكانيكى نضفه من بره بس ... وده كان منظره من جوه يا جودعاااان

طبعا كانت مفجأه ... وبعد محاولات فى تنظيفه ما جابش نتيجه غير الجاز مع الشنيور بلقمه السلك ( بس طبعا بحرص عشان ما يتجرحش ) وبعد كده بماكينه ضغط المياه ( واحد صاحبى الله يباركله سلفهانى :)

طبعا هاتعمل حسابك فى علبتين منظف كربراتير ننظف بيهم الحتت اللى ماوصلهاش الشنيور ... وده الحمد لله كان المنظر بعد التنظيف

طبعا جزئين المنافولد كان بينهم جوان سليكون ... هانجيب سليكون نوع نضيف ونبدأ نعمل جوان تانى بالشكل ده

بعد الجوان هانقفل المنافولد بتاعنا زى ما فكينا ونبدأ نعمل خطوات التركيب بعكس الطريقه المشروحه

الموضوع طويل .. وحاولت اختصر على قد ما قدرت ... أول حاجه محتاجها من حضراتكو الدعاء طبعا وربنا يجعله علم ينتفع بيه ويجعله فى ميزان حسناتنا جميعا

طبعا فى تفاصيل ممكن اكون نسيتها هتبان معانا فى المناقشه فى الردود بأمر الله

بحضر موضوع جديد عن خراطيم الفاكيوم فى الموتور ده لأنها مهمه جداا ومعظم البهوات الصنيعيه بيلغوها

تحياتى

**hagagatc** · 04-09-2014 07:52 PM

ده شرف ليا اكون اول الناس ارد علي الموضوع الله ينور بجد موضوع جميل ومجهود جبار وربنا يجعله في ميزان حسناتك بس اهم حاجه تكون حسيت بتغيير في الاداء في العربيه

**hagagatc** · 04-09-2014 08:13 PM

ممكن نعمل زي الميكانييه ما بيعملو في العمرات بيسيبوا المكنه في جاز وبصنفره بعد كده وبنزين ده لو فيش شنيور

**khaled_yassin** · 04-09-2014 08:17 PM

فنااااااااااااااان واستاذ
اخوك فيرناوى بس والله استمتعت بشرحك والصور

**ashourashour** · 04-09-2014 08:21 PM

الله ينور و يباركلك

من المسلمات ان سلاسه تدفق الهواء للمحرك ليها دور كبير جدا عالاداء والقدره الحصانيه

اكيد انت خدت بالك من الحاجات دي بس نسيت تنبه الناس عليها
1-الفك والتركيب والموتور بارد تماما عشان مفيش حاجه تقفع مع الفك والتركيب
2-الحرص كل الحرص على احكام الجوانات لان اي تنفيس المكنه هتاخد هوا و الاداء هيضيع
3-التربيط عالمسامير يكون بالتوزيع يعني متمسكش مسمار بعينه تقرط عليه للاخر لا ربط كله بالتساوي مع بعضه

اتمنى تكون في طريقه اسهل من كدا

ياريت تقولنا عالنتيجه

**aymanshebl** · 04-09-2014 08:43 PM

مشكور جدا

**mwetsh** · 04-09-2014 08:49 PM

بجد موضوع ممتاز ربنا يبارك فيك و فى جميع الاخوة

**amr elsisi** · 04-09-2014 09:53 PM

تحياتي لك يا هشام ولمجهودك
انت عارف ان اخوك مر بالتجربة دي قبل كدة
بس كنت لوحدي معرفتش اصور
اهم حاجة اتاكدت ان بوابة التخلخل الداخلية بتعمل ولا مفوتة
تحياتي لك مرة اخري

ودي صورة لطريقة فك فيشة مجمع الرشاشات
وهيا بتكون كلها قطعة واحدة وطريقة فكها ادخال مفك عادة بين وش السلندر وبين الفيشة المجمعة
ونطر الكلبسات

**Hesham.H** · 04-09-2014 11:16 PM

المشاركة الأصلية كتبت بواسطة amr elsisi

تحياتي لك يا هشام ولمجهودك
انت عارف ان اخوك مر بالتجربة دي قبل كدة
بس كنت لوحدي معرفتش اصور
اهم حاجة اتاكدت ان بوابة التخلخل الداخلية بتعمل ولا مفوتة
تحياتي لك مرة اخري

ودي صورة لطريقة فك فيشة مجمع الرشاشات
وهيا بتكون كلها قطعة واحدة وطريقة فكها ادخال مفك عادة بين وش السلندر وبين الفيشة المجمعة
ونطر الكلبسات

الله ينور يا عمرو بك ... المنافولد عندك كان زى عندى بالظبط :)
البوابه الداخليه شغاله الحمد لله بس عرفنا ايه فايدتها ياريت وتحياتى على الاضافه الجميله

الموضوع: تقرير مصور عن فك وتنظيف المنافولد فى موتور x20xev

LinkBack

أدوات الموضوع

عرض

-

-

-

-

المواضيع المتشابهه

تقرير عن تسقيط مكنة x20xev

استهلاك بنزين موتور x20xev او c20sel

تقرير بتنظيف الكاربتير وتغير طقم الكهرباء وتنظيف فلتر البنزين

تقرير مفصل بحملة الكشف المجاني ...... نيسان موتورز إيجيبت (تقرير مصور)

الكلمات الدلالية لهذا الموضوع

المفضلات

المفضلات

ضوابط المشاركة