صيانة 45 الف كم افيو (تكلفة و قطع الغيار )

**ahmedez03** · 04-09-2014 08:40 PM

عملت صيانة ال 45 الف كم للافيو ... العربية موديل 2013 مانيوال
اتصدمت و انا في التوكيل انها صيانة سيور ... كنت بحسبها صيانة عادية ... اول شئ سألتة (بتقبلوا دفع بالفيزا هنا) ... اية الي جبني النهاردة ... و بدأت اتكلم ... مش هي تغير السيور علي 60 الف ... رجعت كتيب الضمان للاسف لايتة 45 الف ... المهم صوروا لية جدول الصيانة و قلت بصوا نقسم البلد نصين ... نغير علي 60 الف اية رأيكم ... دا السيور الفبريكة ... المهندس بيهمس سير كتينة يعني صبابات و عمرة ... ما انا عارف يا اخي لية تفكرني ... من هنا لهنا ... قولت اتكل علي الله احسب الحسبة ... و احنا بنحسب لقيت طلمبة مياه ... اية ... لية يا عم ... قلي هي كدة المجموعة كلها بتتغير ... رديت مش هتغير كمان بلية الكرتك و عمود التكيهات ... اية يا هندس ... قالي العربية لو مغيرتش تبقي برة الضمان دا تمنة 300 و كام جنيهة بس ... طبعا انا بغلي ... مقتنع طبعا كل الكلام دا فاكس ... لولا ان العربية لسة فس الضمان كنت لفيت وشي و عملت الصيانة عن اي مكانيكي .. المهم غيرت و دي الاسعار
سير دينامو 132 ج
شداد دينمو 311 ج
شداد كتينة 390 ج
سير كاتينة 181 ج
طلمبة مياة 312 ج
مياه تبريد 73 ج
و كمان فلتر و منظفات محرك
الكل قطع 1484 ج قطع غيار ... و مصنعيات 593 ج ... بعد الضريبة جتلي الفاتورة 2285 ج ... كنت عاوز اسيب العربية عندهم و امشي ... مش عاوزها تاني

**ahmedez03** · 04-09-2014 08:43 PM

اه ... نسيت ... انصح كل شاب و فتاة بأنهم ما يركبوش و لا يشتروا الافيو ... غلطة و ندمتن عليها ... ركبت الكوري منها كانت جيدة ... و اشتريت المصري و اتخدعت احلي خدعة

**ايمن فهمى** · 04-09-2014 10:30 PM

معلش ياباشا ربنا يعوض عليك
بس ليا سؤال هى ايه المشكله لو انا اشتريت عربيه جديده وخرجت من الضمان وعملت نفس الصيانه عند حد انا ضمنه وعارفه ؟

**medo_h_e** · 04-09-2014 11:24 PM

المشاركة الأصلية كتبت بواسطة ahmedez03

اه ... نسيت ... انصح كل شاب و فتاة بأنهم ما يركبوش و لا يشتروا الافيو ... غلطة و ندمتن عليها ... ركبت الكوري منها كانت جيدة ... و اشتريت المصري و اتخدعت احلي خدعة

ممكن حضرتك توضح ايه المشاكل ال قابلتك ؟

المشاركة الأصلية كتبت بواسطة ايمن فهمى

معلش ياباشا ربنا يعوض عليك
بس ليا سؤال هى ايه المشكله لو انا اشتريت عربيه جديده وخرجت من الضمان وعملت نفس الصيانه عند حد انا ضمنه وعارفه ؟

عادى مفيش مشكله بس مش كل العربيات الجديدة تنفع تعملها صيانة بره التوكيل
لكن ميزة التوكيل ان لو في عيوب صناعه او مشكلة كبيرة طبعا التوكيل بيعملها على حسابه

**ahmedez03** · 05-09-2014 02:33 AM

المشاكللحجز الي في العربية ... انا شريها زيروا في ديسمبر 2012 ... كنت محتار ما بين صني الجديد الفئة الاولي مانيول كانت عاملة 95 الف بس التسليم بعد شهرين او اوفر برايس 10 جنيه (كانت ايامها لسة جديدة و بالحجز) ... و الريو (كيا) سيدان الفئة الاولي مانيول ... كانت عاملة 96 الف جنيهة و تسليم فوري (بس كانت مشكلة 1400 سي سي مسمعة فيها ) ... او الافيو مانيول استلام فوري علي 82.5 الف جنيهة ... للاسف كان عند اختي اختها الكوري 2010 مانيول (تتصور ان عددها لسة معداش 35 الف) ... اي بي اس و وسايد هواء و طارة شيك متحركة و حبت اوبشن في الكست و البلوتوث ... و للاسف استخدامنا ليها كان معظمة جو المدينة فماكنتش واضح فيها المشاكل ... لما جيت اشتري بالامانة لقيت مفيش فرق في الطبلوة ما بين الصني و الافيو الا كمبيوتر الرحلات الي لقيتة بعد كدة في الافيو (شيكت علي الطبلوة بس لسة ما فتحتوش عشان الضمان) ... و بالنسبة للريو في وقتها كان موضوع المحرك مسمع في كل جتو ز اسنهلاكة العالي للوقود ... المهم اتكلت علي الله و حجزت من منصور افيو (كنا بردوا شريين منوا الافيو 2010) ... علي انها اخت الي مع اختي ... طبعا ما شفتهاش في المعرض ... و انا بستلم اكتشف المفاجأة العربية مختلفة عن الكوري في الاوبشن (يمكن تكون غلطتي) ... نرجع لتقفيل الفواصل ما الكش (علي فكرة انا مهندس و اشتغلت فترة في صناعة السيارات) ... عيوب صناعة اولها عندي كان ي صيانة صوت ونة في الماتور ... في صيانة 5000 الف طلع صوت الشدادات و غيرتها ضمان طبعا ... بعد 12 الف كرسي من كرسي المحرك اتكسر و فضحتهم علية ... و بعد كدة عملوا حملة الفحص لموديلات 2012 و 2013 .... قربة تبريد غيرتها علي 20 الف ... قربت زيت البور علي 30 الف ... حاجات كتير بس الحمد لله كلة في الضمان ... دا عيوب الصناعة الي قبلتنا في المصري ... و ما قبلتناش في الكوري اختها الي عندنا ... نرجع للعربية ... انا من المنصورة يعني الطرق المكسرة جوة المدينة ... العربية كويسة لاستخدام مدينة ... عيبها التكييف و الطقطقة في صوت المساعديين بس مع المطبات في المدينة ... لكن برة المدينة .. انا بجري بالعربية علي طول القاهرة المنصورة ... ثبات ضعيف بعد 100 ... مع سحب اضعف مع استخدام التكييف ... بس يا سيدي اتمني اني اكون فدت

**ahmedez03** · 05-09-2014 02:35 AM

طبعا ... دا انت لو غيرت كلكس العربية برة الضمان ممكن يطير منك ضمان ضفيرة الكهرباء

**medo_h_e** · 05-09-2014 04:54 PM

المشاركة الأصلية كتبت بواسطة ahmedez03

المشاكللحجز الي في العربية ... انا شريها زيروا في ديسمبر 2012 ... كنت محتار ما بين صني الجديد الفئة الاولي مانيول كانت عاملة 95 الف بس التسليم بعد شهرين او اوفر برايس 10 جنيه (كانت ايامها لسة جديدة و بالحجز) ... و الريو (كيا) سيدان الفئة الاولي مانيول ... كانت عاملة 96 الف جنيهة و تسليم فوري (بس كانت مشكلة 1400 سي سي مسمعة فيها ) ... او الافيو مانيول استلام فوري علي 82.5 الف جنيهة ... للاسف كان عند اختي اختها الكوري 2010 مانيول (تتصور ان عددها لسة معداش 35 الف) ... اي بي اس و وسايد هواء و طارة شيك متحركة و حبت اوبشن في الكست و البلوتوث ... و للاسف استخدامنا ليها كان معظمة جو المدينة فماكنتش واضح فيها المشاكل ... لما جيت اشتري بالامانة لقيت مفيش فرق في الطبلوة ما بين الصني و الافيو الا كمبيوتر الرحلات الي لقيتة بعد كدة في الافيو (شيكت علي الطبلوة بس لسة ما فتحتوش عشان الضمان) ... و بالنسبة للريو في وقتها كان موضوع المحرك مسمع في كل جتو ز اسنهلاكة العالي للوقود ... المهم اتكلت علي الله و حجزت من منصور افيو (كنا بردوا شريين منوا الافيو 2010) ... علي انها اخت الي مع اختي ... طبعا ما شفتهاش في المعرض ... و انا بستلم اكتشف المفاجأة العربية مختلفة عن الكوري في الاوبشن (يمكن تكون غلطتي) ... نرجع لتقفيل الفواصل ما الكش (علي فكرة انا مهندس و اشتغلت فترة في صناعة السيارات) ... عيوب صناعة اولها عندي كان ي صيانة صوت ونة في الماتور ... في صيانة 5000 الف طلع صوت الشدادات و غيرتها ضمان طبعا ... بعد 12 الف كرسي من كرسي المحرك اتكسر و فضحتهم علية ... و بعد كدة عملوا حملة الفحص لموديلات 2012 و 2013 .... قربة تبريد غيرتها علي 20 الف ... قربت زيت البور علي 30 الف ... حاجات كتير بس الحمد لله كلة في الضمان ... دا عيوب الصناعة الي قبلتنا في المصري ... و ما قبلتناش في الكوري اختها الي عندنا ... نرجع للعربية ... انا من المنصورة يعني الطرق المكسرة جوة المدينة ... العربية كويسة لاستخدام مدينة ... عيبها التكييف و الطقطقة في صوت المساعديين بس مع المطبات في المدينة ... لكن برة المدينة .. انا بجري بالعربية علي طول القاهرة المنصورة ... ثبات ضعيف بعد 100 ... مع سحب اضعف مع استخدام التكييف ... بس يا سيدي اتمني اني اكون فدت

انا يعتبر من المنصورة ومعايا 2013 اوتو وكنت متردد قبل لما اشتريها كنت حاجز ريو وسيراتو الفئه التانيه بس لقيتهم زادو سحبت الفلوس وجبت افيو اوتو لكن جبتها ومقتنع بيها الحمد لله ومعايا زى الفل مفيش مشاكل
انا معاك ان التقفيل المصري بيكون في مشاكل وجودته ضعيفه
بس هنيجى نقول المرسيدس بتتقفل في مصر بس الفرق في العمالة ال بتقفل ناس مهندسين وناس ملهمش فيها
لكن الافيو كعربية عائلية صغيرة تعتبر كويسة لما تقارنها بسعرها وانتشارها طبعا ورخص قطع الغيار وإعادة البيع
اما عيوبها زى ما انت قلت انا معاك انها ناشفه في المطبات بس اعتقد ان كل الجديد كده عندك السيراتو ناشفه والفانتازيا بردو ناشفه في المطبات
الفرامل بالنسبه لى تعتبر متوسطه يعنى المفروض تكون احسن من كده
نيجى للثبات وطبعا بيختلف من شخص لاخر ومن طريق لطريق بس عموما هي معاك ثابته وكويسه لحد 140 وده يعتبر كويس في طرقنا
اما التكييف انا بختلف معاك ..... تكييفها جيد واحسن من عربيات تانيه كتير طبعا مش بقارنها بتكييف الفيرنا او الانسر البومه
بالنسبه للمشاكل ال قابلتك يعنى في حاجات بعد 20 و 30 الف كيلو اعتقد ده عادى وطالما غيرتهم في التوكيل كنت ملتزم بالصيانات

بس في المجمل عربية اقتصادية عائلية بتستحمل جدا وواسعة وعالية عن الأرض

**S O P H O S** · 05-09-2014 09:04 PM

ربنا يعوضك خير
كلنا بدفع كتير بسبب التوكيلات

**ahmedez03** · 07-09-2014 01:05 AM

أظن ان الافيو الاوتوماتيك كوري ... مش مصري ... تاني شئ علي 140 كم العربية عندي بتبقي خلاص مفيش اي اتزان ... تكيفها سئ مقارنة بالفيرنا و الصني طبعا ... سحبها بطة بلدي ... تتصور ان حتي الجيلي بتلفحني و انا ماشي علي 160 ... و الله كنت بحسبها اوكتافيا و هي باينة في المرايات ... لما عدتنا لقيتا جيلي امجراند و كانت ماشية علي 180 اقل حاجة و كانت سابتة جدا ... في الاخر لو انت بتستخدمها جوا المدينة هيبقي تقديرك لها جيد جدا ... لو انت بتجري بيها علي طرق سريعه هيبقي تقديرك لها سئ

**mustafaezz** · 13-09-2014 10:56 PM

بعد ما صاحبى جاب الافيو 2014 اوتوماتيك ونصيحته انه مايجبهاش بس برضوا جابها
ركبتها اول لما جابها وركبتها على 3500 كيلو متر
الاختلافات اللى لاحظتها من اول ما جابها ومن بعد 3500 كيلو
عايزه ظبط زوايا وتربيط العفشه واعتقد ان ده فى كتير من العربيات
الدريكسيون تحس انه بقى هاف باور تقل بشكل غريب
تقفل الباب اليمين تحس انك بتقفل ميكروباص
سحب بنزين خرافى غير طبيعى ومن اول ما جابها وهى سحبها زى الزفت
عربيه فاشله بمعنى الكلمه والفيرنا برقبتها
انا كان معايا فيرنا 2013 واقدر اقارن بيهم
وانا مش خبير اوى فى العربيات
طلعة الافيو جميلة مش وحشه طلعة الفيرنا تديها بالجزمه
تجميع الافيو من فوق الـ60 زى الزفت تجميع الفيرنا يديها بالجزمه
تكييف الافيو زى اللزفت بمعنى الكلمه لا يقارن بالفيرنا
قاعدة الافيو غير مريحه تماما زى الفيرنا
صالون الافيو واسع جدا ولا يقارن بالفيرنا
العفشه الى حد ما زى بعض
ثبات الفيرنا فوق الـ100 مرجحيه الافيو ماعدتش بيها الـ100 بس اعتقد احسن
الافيو بجد عربية فاشله مافيهاش ميزه غير انها واسعه من جوه ولا انصح حد بشرائها