الموضوع: الحل لتعليق سقف البانوراما فى الميجان

فيه ناس بتشتكى من ان فتحة السقف عندهم ساعات بتعلق ومبترضاش تطلع وتسحب لورا
والسبب هو ان غالبآ الازاز ده متغير قبل كده
وبتاع الازاز اللى ركبه مركبوش صح
طيب انا برضو الازاز كان ساعات بيعلق معايا يطلع الطلعه الاولى وينزل تانى
كأن فيه حاجه بتصده من ورا
مبيطلعش الطلعه الاولى مضبوطه وبيخبط فى حرف السقف
اكتشفت ان العيب ده سببه الجرار اللى شايل الازاز زي ما انا مشاور عليه فى الصوره



الحل بسيط
الجرار ده ماسك فى الازاز بسيلكون
هتفصل الجرار عن الازاز خالص وتشيل السيلكون القديم
وتسيبه
وهتيجى للفبره اللى ورا وتشيلها
طريقه فكها سهله جدآ
هتفك الغطه الصغير اللى فى الصوره ده



وهتلاقى تحته مسمار هتفكه بمفتاح نجمه
وبعد كده هتسحب الفبره دى لورا
يمكن تلاقيها معصلجه شويه تقوم جايب مفك عاده وترفع الفبره من الاخر خالص زي ما انا مشاور .. سنه بسيطه جدآ لفوق وتسحب لورا هتلاقيها طلعت معاك
وبكده تقدر تشيل الجرار بره خالص وتنضفه وتحط عليه سيلكون وترجعه مكانه تانى
وتلزقه فى الازاز وتضبط بأيدك بقى وضع الجرار تخلى حروفه متساويه مع حروف الازاز زي ما هو متركب فى الصوره كده
وطبعآ هتسيبه ينشف على نفس الوضع ومتحركش الازاز خالص
على فكره لازم تكون تحريكه السقف على اول درجه فقط قبل ما تعمل الكلام ده كله
انا للأسف نسيت اصور كل الخطوات اللى انا عملتها
مع العلم ان انا فكيت الازاز كله وشيلته خالص
وعملت فى الجرار التانى نفس الموضوع بس ده بعد ما ركبت الازاز تانى
وممكن تركب الجرارات دى فى الازاز وهو بره عادى جدآ بس محتاج تركيز شويه عشان تركبهم فى مكانهم الصح
انا حاولت اشرح على قد ما اقدر
والموضوع كله ميتكلفش غير امبوبه سيلكون ب 10 جنيه هتستخدم منها شويه صغيرين