ماذا عن سعر سيارة byd المذهلة new f7 وماذا عن مشاكلها الكثيرة بعد ان تشتريها ؟

**ابو ياسمين** · 06-09-2014 09:16 AM

سألنى كثير من الزملاء عن سعر السيارة NEW F7 التى كتبت عنها تقريرى الأخير وهو :

حصرى لنايل موتورز بالصور سيارة byd الجديدة والمذهلة قبل الأعلان عنها رسميا

( أرجو قرأة التقرير اولا ليكون هذا الموضوع مفهوما )

كما سألونى عن موعد نزولها مصر

ولزملائى الأعزاء اقول انى لا اعرف سعرها ولا اعرف متى تنزل مصر

فهذه المعلومات عند التوكيل

ولكنى جلست مع نفسى وحاولت ان احسبها فوجدت ان محركها 1500 فقلت هذه نقطة مشجعة فى الجمرك

وسافرت على طول على الصين وأشتريت العربية

لكن فى الجمرك بص الموظف فى الكتالوج

وقال لازم نحجزها عندنا

قلت له ليه بس دى اميرة وبنت ناس ومش وش بهدلة !

قال : دى فيها جهاز رؤية ليلية زى الدبابات ولازم تجيب موافقة من وزارة الدفاع

فحاولت ان افهمهم ان ده اوبشن ولا علاقة له بأى شئ

فينظر لى الموظف بغضب

ويقول دى أجراءات امنية

ولما حصلت بعد تعب على الموافقة ورجعت

يكمل قراءة الكتالوج ويقول

وكمان نظام عرض بيانات زى الطيارات .. عايزين موافقة من هيئة الطيران المدنى

ومرة اخري اذهب للحصول على الموافقة واقول

هانت النهاردة نخلص العربية ونروح نفرجهم عليها فى نايل موتورز

وبالمرة نغيظ بيها اصحابنا بتوع زمان

bassem.naguib - hossam165 - eha bpopo - memos

ولأن الأعمال بالنيات

الاقى عمنا اياه بيقولى كل دا جميل بس فاضل موافقة جهاز تنظيم الأتصلات

ياعم هو فيه أيه .. مال جهاز الأتصالات والعربية

يقولى : هى مش بتتصل مع الموبايل وبيتصل بيها

وبعد قصة طويله جبت له الموافقه

وقلت بس هانت خلاص

ولكنه فجأة يقول

مش هينفع لازم تجيب موافقة من وزارة الأعلام

ليه بس يا أستاذ

قال لى : دا أحنا لقينا فيها كاميرات أكتر من مدينة السينما ولازم تصريح بالتصوير

قلت لنفسى النهاردة عنده حق

وكان لزومها ايه الكاميرات ده حتى طول النهار هتصور ميكروبصات بتكسر على العربية

وعلى فكرة الريموت الموجود فى الساعه كمان عمل مشكلة

ما كانوش عارفين يجمركوها على التوقيت الصيفى ولا الشتوى

وكانت حكاية على ماجبت التصريح

بس ياخسارة كانوا مصرين على موافقة من الداخلية

قلت له ياسيدى متعقدهاش

قال : ازاى دى فيها بلوف العجل بتبعت اشارات لاسلكية ولازم الموافقة

مش يمكن العربية بتتجسس علينا

وبعد ما كبرت فى السن وانا بجيب الموافقات دى كلها

قالى على فكرة يا أستاذ

العربية دى لازم نلغى منها نظام الركن بالريموت

قلت : يانهار

طيب ليه كدا

قال : علشان رخصة السواقة من جوه العربية

ومفيش رخصة سواقه من برة العربية

ثم ايه لزوم كل الحاجات الغريبة دى وايه لزوم حساس النور

قلت له هو يعنى يخليها تنور لوحدها فى الضلمة وتطفى لو دخلت شارع فيه نور

ضحك بغيظ وقالى : ابقى قابلنى لو طفت

هو اصلا في شارع فيه نور !

فقلت له

ياه فاتت عليه دى !

اصل دى عربية معمولة لشوارع بيمشى فيها البشر

مش لشوارع بيتعذب فيها البشر

احنا مش محتاجين عربية معموله فى BYD

احنا محتاجين عربية معمولة فى جهنم !!

وكنت خلاص زهقت وأخدت العربية ورجعتها الصين تانى

وأنا راجع اشتريت توك توك

! TUK .TUK ….. IS THE BEST

**dedi** · 06-09-2014 11:12 AM

رائع يا ابو ياسمين
ياترى سمحوا لك بالتوك تك ولا لا
هل ممكن اى معلومات جديدة عن i3 لو سمحت ياريت تقارير مفصلة ومميزة عنها لو سمحت وبالتفصيل الممل الممل

**hossam165** · 06-09-2014 02:24 PM

رائع يا استاذنا
بس لو كنت جبتلي معاك بدل ماتغيظني كنت لفيت معاك
بدل ما انت لفيت كل ده لوحدك
ويمكن كنت عزمتك علي شوب فخفخينة كمان
هههههههههههههههههههههههه

**تامر.محمد** · 06-09-2014 04:12 PM

ههههههههههههههههههههههههه ههههههههههههههههههههههههه ههههههههههههههههههههههههه هههههههههههههههههههه طريقة سرد تحفة و الله

**hesham fawzy h** · 06-09-2014 05:05 PM

ربنا يستر على البلد دى والله

**ابو ياسمين** · 06-09-2014 06:14 PM

المشاركة الأصلية كتبت بواسطة hossam165

رائع يا استاذنا
بس لو كنت جبتلي معاك بدل ماتغيظني كنت لفيت معاك
بدل ما انت لفيت كل ده لوحدك
ويمكن كنت عزمتك علي شوب فخفخينة كمان
هههههههههههههههههههههههه

شامم ريحة شماتة

ربنا يستر من التلاته الباقين وخصوصا باسم ما يصدق

على العموم هكتب تقرير تانى عن التوكتوك وهشرح ال 141 نظام إلكترونى الموجوده فيه وهرفع كمان 161 صورة للتوكتوك الجديد
المنتظر الأعلان عنه فى معرض باريس الدولى للسيارات لسنة 2115
وهكتب التقرير فى قسم byd

وبرضه نغيظ أصحابنا القدام اياهم