بسم الله . انا اتشرفت انى انضميت الى نايل موتورز افض موقع للسيارات واللى فيه بنلاقى اى حاجه بندور عليها بخصوص السيارات . واحب اقدم خدماتى بخصوص اى استفسار متعلق ببريليانس بموديلاتها
عرض للطباعة
بسم الله . انا اتشرفت انى انضميت الى نايل موتورز افض موقع للسيارات واللى فيه بنلاقى اى حاجه بندور عليها بخصوص السيارات . واحب اقدم خدماتى بخصوص اى استفسار متعلق ببريليانس بموديلاتها
اهلا بيك يا فندم انا نفسى اشترى عربية عالية شوية وبصراحة القاشقاى والسبورتاج والسوبارو اسعارهم جامدة اوى ولما دورت عرفت العربية بريايانس v5 وقريت كل المواضيع عنها في المنتدى وعاجبانى جدا بس خايف من تجربة الصينى علما انى كنت راكب لانسر بومة سبورت وراحت منى في حادث شديد وبعتها خردة فانا حاليا بفاضل بين لانسر شارك تانى فئة او ال v5 او ازود شوية واجيب كيا سول ....حضرتك تنصحنى بايه ؟؟؟علما ان العربية هتكون للمدام والاولاد لانى حارج مصر حاليا
العربيه امكانياتها معقوله بس علشان اكون صريح فيها عيوب ممكن حضرتك تتقبلها او لا
اولاً علبه دركسيون . العدادات بتتحرق . الريموت بيضعف . مشكله صوت من الشنطه
يفضل انك لو قررت تشترها انك تجيب فئه ال gl وبلاش ال gls علشان فيها كنترولات كتير فى اماكن عرضه للتلف ( اسفل الكراسى ) فى اى اسئله فى الخدمه
وللعلم هى موتور ميتسوبيشى مايفك بس صناعه صينى
الف شكر لرد حضرتك...
بس انا كده قلقت منها لانى عايز حاجة المدام تركبها وما تعملش معاها مشاكل ومتابعة الصيانة فى مواعيدها فى التوكيل فقط .............يعنى الواحد بيجب يجيب زيرو علشان ما يمرش باى مفاجئات
السلام عليكم، اولا احب اشكر حضرتك علي الخدمه دي لاعضاء المنتدي
ثانيا: انا كنت ناوي علي اول عربيه ليا.. وكنت عايز حاجه معقوله ولقيت البريليانس frv cross كاختيار.. كنت حابب اعرف تقييمك للعربيه بشكل عام.. وايه مشاكلها؟ وشكرا لك
اولا احب اشكرك على المجهود
ثانيا كنت عاوز اسأل عن جالينا 2012 من غير فتحة سقف 60000 كيلو مش راشة أي حاجة
تعملها كام ؟؟؟ يعني ممكن حضرتك تقولي الرانج اللي بتتباع فيه
وشكرا مقدما
والله يا فندم مفيش عربيه مفيهاش مشاكل والمشاكل اللى قلتها موجوده فى اغلب العربيات وعلى العموم كل اللى قلته بيتغير على الضمان
الشكل الجديد من الكروس نازل اخر السنه لو ممكن حضرتك تستنى بدال ما تشترى الشكل القديم اما بالنسبه للعربيه مشكلتها المساعديين وعلبه دركسيون وحساس الاكسجين وبردو كل ده ضمان وبيركب الحاجات المتعدله يعنى بدون مشاكل
الجالينا اخر موديل فيها 2010 ده اخر انتاج من المصنع والكميه اللى اتبقت عملوها موديلات السنه علشان تتباع .اما بالنسبه للعربيه اللى حضرتك سالت عنها تعمل حوالى 60.65 بس يفضل تقرير حاله من الوكيل علشان قطع غيار العربيه دى غاليه نسبياً والتقرير بيشمل الصاج والشاسيه والمحرك والكهرباء
موضوع جميل بالتوفيق
احب اول حاجة اشكر حضرتك على الرد ....
بس حضرتك متأكد ان ده هوا الرينج .. اصل انا شاريها من سنتين ب80 كده يبقى انا كنت اتخميت ولا ده عشان سعر الصيني بينزل ؟؟؟؟
ع العموم احب اشكرك تاني عالمجهود الرائع بس لو تقولي انا ممكن ابيعها فين برده بسعر كويس يبقى كده تمام اوي
لا يا افندم ممكن يكون كان ده سعرها وقتها انا لسه واحد بايع جالينا 2010 عامله 100 الف km ب 45 الف
بس افضل مكان لبيعها هو السوق يوم الجمعه
السلام عليكم / شكرا بجد عالموضوع وربنا يجازيك خير
أخى bugatti.beah لو حضرتك عايز تبيع سيارتك أنا عايز جالينا حالة كويسة ..... وأنا من أسيوط وكنت نازل بكرة السوق أشوف ...... ممكن أقابل حضرتك لو حضرتك عندك جدية البيع .... مع خالص الشكر .. وياريت إرسال رقمك لى ...... وانا رقمى 01005545109
وياريت أخونا الكريم لو تقرير عن السيارة الجالينا عموما مالها وما عليها ...... مع خالص الشكر
انا معنديش عربيه للبيع بس لو فى حاجه جت قصادى هبلغ حضرتك
بالنسبه للجالينا ممكن حضرتك تعرف امكانياتها من اى مكان اما بالنسبه لعيوبها
1.. عفشه العربيه بتحتاج تغير جلب بشكل مستمر
2.. ال abs مشكلته البسيطه حساس ب 60 جنيه انما المشكله الكبيره كنترول ال abs وده بيعدى ال 4 الاف
3.. العربيه نادر جداً لو حد عرف يظبط تقسيمه الكاتينه لانها 2 سير فلازم حد متخصص فى العربيه
4.. كرتيره زيت المحرك قريبه من الارض فلو لا قدر الله اى مطب على سرعه او حجر عالى شويه الكرتيره هتتكسر وساعتها هتتغير لانها الومنيوم ومش بتتلحم
5.. كباس التكييف لو حبيت تشترى عربيه لازم تتاكد من عمل الكمبريسور بدون ونه او خشونه لان الكباس ب 6 الاف جديد
6.. دينامو العربيه بيخرج 13.5 v لو مش اصلى وده ضعيف بالنسبه للعربيه ومعظم الوقت البطاريه هتنام
7.. فتحه السقف لو فيها مشكله تغيير الميكانيزم ب 11 الف
8..الريموت ب 800 جنيه
9.. فى بعض العربيات فيها مشكله فى الفتيس لازم تتاكد لو هتشترى ان العربيه بتنقل كل النقلات من غير رزعه
10.. الدركسيون قريب جداً من رجل اللى سايق وهو فى اعلى نقطه
11..قواعد الموتور نادر لو لقيت منها اصلى . والتقليد بيخلى العربيه تتهز جامد
12.. كنترول المراوح لازم تتاكد انه بيشغل السرعتيين علشان الكنترول ده ب 1200
13.. واخيراً انا عارف انى كرهتك فيها بس حضرتك قلت ما عليها وانا تحت امرك فى اى سؤال
ممكن راي قاطع بالنسبة لل frv cross زيرو؟ سألت عليها ناس كتير راكبينها وبيشكروا فيها جدا.. هل عيوبها خطيرة واللا سهل علاجها!!
استاذ medo-312 العربيه عيوبها محدوده بعكس ال v5 علبه دركسيون . مكن زجاج . حساس شكمان . واوسخ حاجه فيها الكاست متهيالى لو كانو نزلو فيها الجهاز ابو 50 جنيه ده كان هيبقى افضل . ومساعدين خلفيه العربيه الجديده بتلاقى صوت خبط وبتتغير ضمان . مؤشر البنزين بينزل ربع ربع بس هى تعتبر الاقل عطل فى بريليانس والاحسن الموتور المايفك اللى هى العربيه الاوتوماتك علشان المانيوال موتور صينى وتحت امرك فى اى سؤال
ألف شكر بس الحاجات اللي بتتغير في الضمان لو نفس النوع المشكلة هاتفضل موجودة برضه.. واللا في حل تاني!! ومتشكر جدا لاهتمامك وذوقك
لو سمحت ممكن حضرتك تقول لي مانع السرقه الموجود ف Frv cross 2014? وشرح بسيط ( الكويل اللى على الكونتكت والترانسبوندر اللى داخل المفتاح) يعني ايه؟
وهل ممكن تركيب ايمبوليزر ف التوكيل؟ شكرا لك واسف لو تقلت عليك بس محتاج الاجابه جدا لان لو كده خلاص هتكل علي الله واجيب الكروس
بالنسبه لعلبه الدركسيون لما بتتغير بتركب علبه معدله غير الموجوده فى الاول والمساعديين كذلك اما بالنسبه للمؤشر دى حاجه طبيعيه فى العربيه دى
سلام عليكم.........معروض عليا fsv اوتوماتيك موديل 2011 ماشيه 40000 كيلو متر ومطلوب 65000 ...اولا كنت محتاج اعرف راي حضرتك فى fsv مالها وماعليها ....وثانيا هل سعرها ده كويس....واخير افضل مكان اكشف فيه على العربيه ....وشكرا لحضرتك واعتذر للاطاله
ببساطه ان جوه مفتاح العربيه فى ترانسبوندر زى ما بيقولو فحمايه بيبقى عليها كود بيبعت اشاره للكويل اللى هو راكب على الكونتك والكويل ده بيبعت اشاره لل bcm وده كنترول السنتر والكنترول ده بيبعت اشاره لكنترول المحرك علشان يبعت امر الدواره ومن غير الترانسبوندر ده مستحيل تشغيل العربيه وممكن حضرتك تجرب وتشيل الترانسبوندر من جوه المفتاح وهتلاقى لا حياه لمن تنادى والترانسبوندر ده بيتكود بجهاز الشركه عن طريق كود خاص ويارب اكون قدرت اوصل الفكره وانا تحت امرك
شكرا لحضرتك جزيلا واسف علي السؤال ده بس انا لسا جديد..
وانا كده نويت ان شاء الله كاول عربيه ليا brilliance frv cross واتمني تكون العربيه اعتماديه واعطالها قليله... وشكرا جزيلا لسعة صدرك وجوابك :) يعني كده ان شاء الله الحراميه مش هيعرفوا يعملوا حاجه معاها الا بالونش :D
سلام عليكم bugatti.beah .........معروض عليا fsv اوتوماتيك موديل 2011 ماشيه 40000 كيلو متر ومطلوب 65000 ...اولا كنت محتاج اعرف راي حضرتك فى fsv مالها وماعليها ....وثانيا هل سعرها ده كويس....واخير افضل مكان اكشف فيه على العربيه ....وشكرا لحضرتك واعتذر للاطاله
ال fsv فى الفتره الاخيره ابتدى يظهر فيها مشكله فى ال abs بالنسبه للعربيه اللى حضرتك بتقول عليها هى كده خرجت ضمان كهربا وطبعاً لو فى صوت فى العلبه دى كده على حسابك مشاكلها قليله زى علبه او كاست مجموعه زراير زجاج وكده حاجات بسيطه وخصوصاً الاوتوماتك بالنسبه لسعرها ممكن تبقى اقل ب 3 الاف افضل مكان هو الوكيل ب 300 جنيه تقرير حاله ميكانيكا وكهربا وسمكره ليه الوكيل لان فى شويه حاجات كده بالجهاز بيتكشف عليها مهمه جداً فى قرار الشرا وتحت امرك فى اى سؤال
انا قلت انها موتور مايفك بس صناعه صينى يعنى هو هو الموتور بس مصنوع فى الصين مش موتور صينى يعنى نسبه مكوناته 40 % صينى
استاذ mosho1985 بالنسبه لمشكله ال abs بتكلف حوالى 300 جنيه مجموعه الزراير 400 العلبه بتتعمل فى شارع شامبليون وانت واقف ب 400 جنيه بس نصيحه تقرير حاله الاول
السلام عليكم ورحمة الله شكرا على ردك الوافى بخصوص الجالينا وربنا يباك فيك. واخى بالنسبة fsv ياريت لو حد ب
قدامة عربية كويسه يقولً عليها مو يل ٢٠١٠ او ٢٠١١
استاذ بوجاتي...حضرتك شوفت او إشتغلت عالـموتور الــ 1.5t إللي برسليانس منزلينه فالــ v5 ؟!... و لو لأ...هل في إمكانيه ان حد يطلبها سبيشيال و تيجي بيه من الصين...؟! و ؟؟!..و هل لو حد جاب العربيه دي و سقط لها موتور 1.6t هل ممكن تتفوق كأداء و شكل و إمكانيات ووسعر على منافسيها ؟! اشكرك و دي اسئلة كانت في دماغي لأن العربيه بالموتور الـ 1.5t مكسرة الدنيا هنا فى جنوب امريكا
ممكن شرح بسيط عن مشكله علبه الدركسيون و المساعد الخلفي لل cross
و خصوصا علبه الدريكسيون ايه الاعراض اللي بتظهر و تبين العيب ده
موضوع انها تيجى سبشيال دى مظنش اما موضوع الموتور ال 1600 دى بسيطه وخصوصاً لو العربيه خرجت من الضمان بس هتحتاج موتور وكنترول موتور وايمو
علبه الدركسيون المشكله اللى بتحصل فيها فى الجلب والمشط الجلب ضعيفه وبتتاكل وده بيخلى المشط اللى بيتحرك جوه العلبه يعمل صوت نتيجه البوش . وبالنسبه للمساعد يا اما بيضرب زيت او بيخف
طيب حضرتك عندك مكان او تقدر ترشح مكان عشان الصديق يشترى الموتور و الحساس و يركبهم ...او ممكن تنصحنا بإيه نعمله ؟!...و مرديتش عليا..هل حضرتك شوفت او إشتغلت على الموتور ؟!
انا قلقان بعد ما سمعت الكلام ده عن العربية frv cross الواحد يشتريها ولا يدور علی غيرها
سؤال . هو اي العربية احسن من ناحية التقفيل وعيوب الصناعة وقطع الغيار والبيع الجيلي ايمجراند ولا frv cross؟؟