الموضوع: تم تغيير السيرفو

اولا ربنا يخليكم ليا ويخلينى ليكم
من كتر ما استفدت منكم واتعلمت
انا تقريبا دلوقتى مش بحتاج صنايعى يحددلى العيب الا فى حالات قليله جدا
طبعا انا كنت عملت اكتر من مره شغل فى الفرامل عشان احافظ على ادائها واخرهم كان ال aps
والظاهر ان عربياتنا فيها ترابط بين قطع غيارها وبعضها بمعنى ان لو حصل عيب فى جزء من اى دوره فيها (ميه او بنزين او فرامل او حريق) بتلاقى انك بتغير كل حاجه فيها بالتتابع
طبعا انا الفرامل عدى بقت زى الفل والحمدلله بس بعد كام يوم لقيت المكنه مش مظبوطه شويه على غير العاده فقولت اهدى عليها شويه وكده شكلها سيرفو زعل على اخواته اللى اتغيروا
اول امبارح نازل بالعربيه لقيت الفرامل فى الضياع والبدال عاوز صحه تدوس عليه
على قد ما زعلت على قد ما انبسطت لصحه توقعى
بدات مباشرة رحله البحث عن سيرفو استيراد
وطبعا فروق كبيره فى الاسعار بين تاجر والتانى
طبعا انا كنت بقارن بين الحاله والسعر ووقت الضمان
واستقريت على سيرفو حالته ممتازه ولحسن حظى كان التاجر بيطلع موتور من نص واستنيته لغاية اما خلص واخدت السرفو من نفس النص
ب 275 بالخناق شويه والهزار شويه ومعاه ضمان اسبوع
انا كنت واخد قرارى انى هركبه بنفسى
كان فى تقريبا عضو هنا كاتب تجربته فى تغييره
وطبعا كالعاده بتاعتى حفظتها
ولما بدأت وفتحت الكابوت وبصيت فى الدواسه وشيكت على السيرفو الاستيراد
لقيت طريقه اسهل من اللى هو كاتبها بكتييييير ووفرت معايا وقت ومجهود اكبر
العضو اللى فعلا فادتنى مشاركته (مع احترامى لانى مش فاكر هو مين)
فك السيرفو بقاعدته ودى طبعا احتاكت شغل كتير فى الحوض وفى الدواسه
اللى انا عملته
لما ببص على السريفو الجديد لقيت ان فى مسمارين هما اللى ماسكين السيرفو بالقاعده والقاعده راكبه على الصدر ب4 مسامير من الدواسه
انا بئه فكيت بدال الفرامل اللى راكب على دراع السيرفو وبيكون راكب بكلبس وتيله وفكه فى منتهى السهوله وبيكون فى كاوتشه شبه القرطاس راكبه على دراع السرفو وليها مشقبيه دوران عشان تكون مقفله على الصاج يستحسن تزقها لجوه الحوض لسهولة السحب بعد كده
كده انت مهمتك انتهت من جوه العربيه
ننط بئه فى الحوض
لسهوله الفك وعشان تعرف تمد ايدك كويس
تفك العلبه بتاعت الكتاوت ويستحسن انك تنطر منها الكتاوت وتشيلها بعيد وتبعد الاسلاك كمان
تجيب علبه معاك عشان تفضى الزيت اللى فى الخزنه
تنطر الخزنه (هى كبس متقلقش) بتميلها بقوه شويه بس بحرص ناحية العمه وبتكون جاهز بصوابعك عشان تسد الفتحتين لغايه اما حد يناولك العلبه عشان تفضى الزيت فيها
وتشيل خرطوم الماستر السفلى منها
بعد كده تفك ماسورتين الماستر العلوى
وتفك الماسر العلوى مع الحفاظ على جوانه جدا( لونه اسود جلد)
وتنطر خرطوم السيرفو هو كبس (شده لبره بزاويا)
من الافضل انك تفك فيشة ال aps والدفيره وتخلع الماف من مكانه
بتمد ايدك ورا حلة السيرفو بتلاقى مسمارين واحد فيهم سهل والتانى مقرف( من ناحية الفخده )
بشوية صبر وطولة بال بيتحلو و بأكبر كميه من الحرص بتسحب السرفو بره وتخلى بالك جدا من مواسير الفرامل بتحتاج انك تزق ال aps شويه عشان يخرج معاك وترفع المواسري بتاعت الماستر شويه
التركيب بقه بطريقه عكسيه بحته
اللى تعبنى فى الموضوع هما المسمارين لانك تقريبا مشا شايفهم وبتفك وتربط بالاحساس
والكاوتشه اللى شبه القرطاس
فيها مشقبيه عشان تكون حاضنه دوران الصاج من جوه اعتقد ان مفيش صنيعيى بيبيتها مظبوط ولكن عشان بتشتغل بنفسك بتحرص على انها تبات (ممله فى تثبيتها)
كان العضو منبه على ظبط بدال الفرامل مع فوانيس الاستوب (بشكره جدا عليها)لانى فعلا مكنتش عارف هعالجها ازاى (عوضت فرق المسافه بدبل فيس)لغايه اما ظبطت
المضحك بئه
انى بعد اما قفلت ودورت لقيت الموتور مش مظبوط برضه
قولت اطلع اجرب وليه بقول يا هادى لقيت البدال صخره وشبه مش بيوقف العربيه
اضريت انى الجأ الى اخويا ونسيبى الميكانيكى كالعاده وبعد الشرح وانا متغاظ على مجهودى الضائع واللى غاظنى اكتر ضحكه عليا
لقيته بيقولى ركب خرطوم السيرفو يا فالح
هههههههههههههههههههههههه
وبعد التعتيم على نساينى وتركيب الخرطوم تم الحساس الفعلى بالاداء المتميز والحمدلله
الدروس المستفاده
1 الوقت
من بدايه ما فتحت العربيه لغاية اما دورت تانى ساعه وربع بالظبط بما فيهم استراحة شاى وتدخين سيجاره
2 المعرفه
انك تكون عارف اجزاء عربيتك ومكوناتها وطرق المعامله معاه
3 العلم
لما بتشغل دماغك بتلاقى الاسهل
4 التوفيييييير
شغله زى دى كان ممكن تكع فيها 100 ولا 150
5 التغفيل
لو رحت عند صنايعى معرفه او لآ هيعملك من الحبه قبه وهيربطك جنبه بالساعات
6 التقفيل
انت لما بتقفل غير لما هو بيقفل تماما
انا اسف جدا جدا عشان مصورتش لانى والله كنت مركز فى الشغل وكنت خايف انسى او التلفون يقع يكسر او يتسرق وانا حاطه على العربيه( انا كنت بشتغل فى الشارع)
بالله عليكم متزعلوش منى عشان مصورتش بس انا حاولت اعوض بالشرح ويارب اكون وفيت

المشاركة الأصلية كتبت بواسطة فادى محمد

ع البركه يا شريف .بس لو كان في صور كان هيبقي موضوع عالمي..
العضو اللي كان ركبه قبل كده هو زميلي وجاري م رامي المهدي
وانا كنت معاه بادواتي واحنا بنخرجه من نص استيراد عند دكتور اوبل
وتم تركيبه في استرا 2006 برازيلي .
لما جيت انا اركب السيرفو بتاعي , استفدت جدااا من تجربتي في الاسترا
وبالذات في موضوع التيله وتزامن نور الاستوب مع اول الدوسه.
ركبت السيرفو بدون القاعده . بس عندنا مؤرف وهتفك حجات كتير
علشان توسع لنفسك , البطاريه والماستر والايه بي اس بالعلبه اللي عليه..
اخدت بالك ان دراع السيرفو اللي في الكابينه له عيار , بيطول ويقصر؟
الموتور ع السلانسيه هتلاقيه واقف زي الالف مش بيرعش

فعلا انا اللى افادنى تجارب الاعضاء زائد انى قلبى جامد شويه (حاجتى بئه وانا حر فيها)
بس ايه رايك فى تركيبه من غير قاعده بالذمه في صنايعى يعملها
بس انا محتاجتش اشيل البطاريه والaps مجرد انى زقيته سنه صغيره وانا بخرج السرفو ووانا بدخله تانى لان قاعدته صاج فبيكون سهل شويه تحركه
وفعلا الموتور واقف زى الالف واحسن مما كان
لا والله مخدتش بالى ان السيرفو فيه رجلاش مع انى كنت شايف الدراع بيلف فى ايدى وقولت انه اكيد ده رجلاش بس رجعت فى كلامى تانى لما لقيت اللف مش مؤثر
بس هنزل بكره افك التيله واجرب عشان مش مقتنع بالتخشينه الدبل فيس دى

المشاركة الأصلية كتبت بواسطة Ahmed Saad

مجهود ممتاز وفعلا زي ماقولت الشغل بايديك هيغنيك عن عك ووجع دماغ الميكانيكيه وعلي فكره انا مش بستريح غير لما اشتغل بايدي لاني مش بقتنع بالميكانيكيه في مصر كده بقي لو عايز تقتحم مجال تصليح عربيتك جيبلها كابل الاعطال واتعلم طريقه استخدامه مع شويه فيديوهات يوتيوب هتقتحم ميكانيكا عربيتك وهتحس انك فهمت اوي بس اقري صح وطبق ونفذ صح هتبقي سوبر ان شاء الله

الف شكر لردك يا استاذ احمد
عارف حضرتك الصياد وفرحته لحظة خروج السمكه بتكون عامله ازاى
لك ان تتخيل مدى سعادة الفرد منا وقت ما يعمل حاجه فى عربيته بنفسه وتتطلع صح
ده الواحد لما بيكون عنده عيب ويروح للصنايعى ويصلحه بيكون طاير من الفرحه فما بالك لما يعملها بأيده
موضوع الكابل والله انا بفكر فيه (بصراحه حاسه غالى حبتين)

المشاركة الأصلية كتبت بواسطة amr elsisi

الله ينور يا شريف
بس ياريت كنت صورت
تحياتي لمجهودك

وعلى حضرتك يا عمرو
انت من الناس اللى استفدت منهم كتير
واسف على عدم التصوير وانا قولت اسباب عدم التصوير ايه وياريت تسامحونى

المشاركة الأصلية كتبت بواسطة mwetsh

الله ينور موضوع جميل ينقصة الصور للمبتدأين اللى زى بس ممتاز والله

ربنا يخلى حضرتك
وكلنا مازلنا مبتدئين
انا قصرت فى الصور فعلا بس تقريبا نقلت الوضع بالتفصيل كتابتا
ويارب اكون شرحته بطريقه تغنى عن الصور وان كنت اشك انها تكون اوفى