كنت غيرت من فتره ال aps بتاعى وكنت كتبت عن المشكله و رحلة البحث والتركيب
وكان الاستاذ ايمن حمدى كان رافع فيديو عن طريقة تصليحه و كنت مبنهر جدا من سهولتها
وللعل كانت عندى المشكله وقتها بس مكنتش متأكد من انه السبب فى الaps
ولما باظ خالص اضريت انى اشترى وحده استيراد
الله غالب ( من احسن نعم ربنا علينا النسيان) وتاه من بالى خالص انى احاول فى تصليحه قبل ما اشترى واجرب
المهم بعد ما حليت مشكلتى مع الفرامل وبشيل العده فى العربيه لقيت الوحده القديمه قدامى قولت والله يا انا يا هيه
نزلت الف وادور على قرص رفيع زى اللى فى الفيديو عشان اركبه فى الشنيور وافور بيه الكفر
ملقتش خاااالص
قمت شاري سلاح منشار وقولت مش مشكله ماهو بايظ بايظ زى ما تيجى
ووحده واحده قمت شاقق الحتت العدله والزوايا ال 90 لكن الدوارانات بصراحه مجتش بالمنشار خوفا من انى اضر البورده جوه
خدو بالكم انى شقيت بس لكن مخلتش السلاح يعدى جوه
طبعا كده فيى حتت كتير مش هتعرف تقرب منها بالمنشار
الدوارانات كلها
والحته اللى تحت الفيشه
شوف بئه يا محترم انا عملتهم ازاى واكتشفت ايه
جبت مفك عاده رفيع من بتوع الاليكترونيات بيكون رفيع وحامى جدا
وبدأت احفر بيه بكل تركيز وسرعه عشان اخلى الفبر يسخن ويسرع معايا عملية الشق(ده فى الجزء اللى ورا السوكيت)
وبنفس المفك ومعاه شاكوش صغير (زى بتاع المنجد) عشان تكون الضربه تأثيرها ضعيف
بدأت رحت مباشره على الحتت النص دايره وحطيت الفك بميل جامد و بدات الجراحه
لقيت الحكايه اسهل مما كنت اتخيل
وتم لحام الاجزاء المشار لها فى الفيديو و زياده من عندى تم المراجعه على البورده كاملة لحامات
(اللحام تم بمعرفة فنى لانى كنت خايف اسيح حاجه فيها)
وقفلت الغطاء بسيلكون حرارى وبعد اما نشف اديته كمان وش خفيف من بره خوفا من تسريب اى مايه لجوه
وقمت مركبه مكان الجديد وهوب قام شغال زى القرد ابن التيييييت
راحت فلوسك عشان بتتسرع يا شريف
قولت مش مشكله اهو يبقى احتياطى عندى وخلاص وعوضى على الله
بص يا محترم انا اكتشفت ايه
وانا بخربش وبدق بالمفك فوجئت ببعض الاوقات بلاقى الدقه سهله وسلسه وناعمه واوقات لآ
بدات اركز اكتر لقيت ان فيه جزء فاصل رفيع جداا بين الجزء اللى بنفكه والجزء الثابت
ولو جربت تفكه بنفسه ركز شويه فيه لانه هيخلى التفوير اسهل
للاسف انا اكتشفته فى الاخر (والله اعلم اذا كنت مصيب او مخطيء)
الموضوع سهل جدا جدا ومفهوش اى قلق خالص (تركيز فقط لا غير)
وبقول لحبايبى اللى هيعاتبونى على انى مصورتش
اقسم بالله انى عامله قبل ما اركب السرفو وافتكرت دلوقتى انى اكتب عنه ومكنتش متخيل انه هينفع لانى كنت واخد الحكايه تضييع وقت
اسف جدا سامحونى