شوفي أنا كنت بسوق و كويس كمان و عارف قواعد و اشارات المرور و طبعا بأفهم في الموتور و الميكانيكا بحكم عملي كمهندس بحري , وذهبت الي الامتحان دون اي واسطة و لم أدفع مليم واحد و هي دي كانت المشكلة ....

البيه الظابط امتحني في كل اشارات المرور , انا الوحيد بين اللي كانوا واقفين و لما جاوبته جاء دور المهندس ليسألني عن الموتور و طرق تبريده المهم بدأت أجاوب و لما سأل اسئلة اخري اكتر صعوبة تدخل احد سائقي النقل و قاله "ده جاي يطلع رخصة خاصة مش درجة اولي و لاتانية - ده ملاكي يابيه" و لكن رد المهندس كان "معلش ده مهندس و لازم يجاوب" و فعلا جاوبته باجابة لم تخطر له علي البال أو الخاطر لانه اصبح موظف متجمد و متحجر فقال لي " طيب هانشوف هاتعمل ايه في العملي "

و فعلا في العملي دخلت بالعربية بين الاقماع بدرجة عالية من التحكم في السيارة اعجبت الكثير من اللي كانوا واقفين , و لزيادة صعوبة الامتحان قرر السيد المهندس اني ارجع بالعربية زي مادخلت و فعلا بدأت ارجع بضهري و عند اخر قمع لمحته في المراية الشمال و هو بيدفعه برجله علشان يقلل علي المسافة فأصطدمت به , لكن من غيظي كملت عليه باقصي سرعة و فرمته

طبعا حضراتكوا كده عرفتوا نتيجة الامتحان - سقطت طبعا و الظابط قالي "ابقي قابلني لو طلعت رخصة "

هنا ياسادة لجأت الي الواسطة وواسطة جامدة كمان و ذهبت تاني يوم و حصلت علي الرخصة و ذهبت الي حضرة الظابط علشان يشوف الرخصة و قولت له " اديني طلعت الرخصة و جيت قابلتك":k16: