الحمد لله لسه راجع من الساحل و قبليها كنت فى السخنه يعنى عامل أكتر من 1000 كم سفر
العربيه دلوقتى العربيه عامله 5000 كم فحبيت أكتب تقيمى للعربيه بعد الفتره ديه
كل التفاصيل و مواصفات العربيه مكتوبه فى اللينك ده
http://www.nilemotors.net/Nile/431817-2015-1000-a.html
حكتب بقى المميزات و العيوب بكل حياديه بعد تجربه السفر
المميزات
1-العربيه عاليه و أنسى أنك تحك فى أى مطب حتى مع وجود أربع أشخاص و طبعا الشنط
2-الأضائه بالليل جيدا جدا و بتكون كاشف الطريق أمامك
3-مساحه التخزين فى الشنطه واسعه و بتاخد حاجات كتيره وكانت كافيه جدا لكل الشنط ألى كانت معايا فى السفر (شنط لأربع أفراد)
4-الموتور بيجيب 180 و هوا مستريح و طبعا فى أكتر من كده بس مردتش أتغابى على الموتور وهوا لسه جديد
5-عزم الموتور جيد جدا و متحسش بأى تقل فى العربيه و هى محمله
6-طبعا التكييف جميل و قوى زى معظم الكورى و أخرى كان على واحد و أحيانا كنت بقلل درجه الحراره عن ال Max
7-الفيميه اللى فى الزجاج الجانبى الخلفى و الخلفى مفيد جدا و بنصح أى حد أن يكون من مقاييس التفاضل بين أى عربيه هوا الفيميه و طبعا مكنش عندى مشكله مع اللجان علشان مثبت على الرخصه
8-عزل الصوت جيد جدا سواء صوت الموتور أو مقاومه الهواء
العيوب بقى و علشان الموضوع يكون أوضح للناس حقارن قى وسط الكلام بالريو2013 و السيراتو 2008
1-العفشه ناشفه شويه, مش مزعجه أوى و بتعود عليها , هى أنشف من السيراتو 2008 و تقريبا نفس الريو( لسه عايز أجرب النيتروجين)
2-الثبات متوسط , فى الطوالى طبعا مفيش مشكله لحد 190 عادى و مش مكلبش فى الدركسيون و العربيه مش بتتنطط
بس فى الملفات لازم أنزل بالسرعه شويه يعنى مثلا طريق زى السخنه فى بعض ملفات الزعفرانه يبكون لازم أنزل ل 70 بالرغم فى السيراتوا كنت بنزل ل 90 أو 80 بس فى الملفات العاديه ممكن من 120 ل 140 عادى
من الأخر هى أقل فى الثبات من السيراتو و يمكن أقل حاجه بسيطه من الريو و ده طبعا عشان العربيه عاليه عن الأرض و مقاومه الهواء أكتر
3-أستهلاك البنزين و ده أعتقد أنه حيكون زى السيراتوال 2014 علشان نفس الموتور
الأستهلاك عندى ( المتوسط مش اللحظى) كان 7.8 ليتر لكل 100 كم و ده عند سرعه 130-110
و كان 12.5 ليتر لكل 100 كم و ده عند سرعه 180-160
مكنتش بمشى أقل من كده فى السفر
داخل القاهره فى الزحمه بيكون حوالى 10.5 ليتر لكل 100 كم
4-صوت الموتور بيعلى تقريبا بعد ال100 وبيكون مسموع داخل الصالون بس مش مزعج و أعتقد ده عادى فى كل الكورى
مش فاكر حاجه تانيه
فى المجمل , الحمد لله أنا مندمتش أنى أشتريت السول و فضلتها عن عربيات تانيه كتير
لو فيه أى سؤال أو حاجه مش واضح أنا تحت أمركم
