الموضوع: تقييم عن كيا سول 2015 و صيانه ال1000كم

بسم الله الرحمن الرحيم

الحمد لله أشتريت كيا سول 2015 الشكل الجديد و لسه عامل صيانه ال1000كم يوم الأربع ألى فات

علشان أخلى الموضوع مرتب حكتب المواضيع ألى حتكلم فيها
1-المواصفات و الأسعار
2-تقيمى للعربيه (المميزات و العيوب)
3-تقييم لأبو رواش بعد عمل صيانه ال1000

1-المواصفات و الأسعار

الطول الكلى :4.150 متر , العرض الكلى :1.800متر ,الأرتفاع :1.593
المسافه بين قاعده العجلات الأمامى و الخلفى 2.570متر , المسافه بين العجله اليمين و الشمال 1.576متر(أمامى) و 1.588 (خلفى)

الموتور 1600 , 130 حصان ,و الفتيس 6 نقلات Steptronic , تانك البنزين 55 ليتر

العربيه بينزل منها 3 فئات و كلهم أوتو

EX
السعر 156
1أيرباج ,طاره ملتى ,ظبط و ضم المرايات كهرباء ,أشارات فى المرايات,تحكم فى البور ستيرنج (Sport, normal,Comfort(
فوجات ,مساحات زجاج خلفيه , زجاج ملون خلفى و يمين و شمال خلفى فقط و ليس أمامى
جنوط 16
ريموت , أيموبلايزر ,التحكم فى أرتفاع كرسى السائق ,لمبه ستوب خلفى

Highline
السعر 176
زياده عن ال EX
2 أيرباج
ABS ,جنط 17 ,مثبت سرعه ,فتحه سقف ,باركينج سينسور (خلفى)

Topline
السعر 205
زياده عن الHighline
جنط 18 ,ليدات أمامى و خلفى ,حساس أضائه, كاميرا و شاشه 4.3 أنش ,بلوتوث
Push button Start engine ,بركينج سينسور أمامى و خلفى

2- تقيمى للعربيه (المميزات و العيوب)

العربيه بسم الله ما شاء الله جميله و من أول متركبها تحس بالفخامه و أنك كاشف الطريق قدامك

طبعا الشكل الخارجى أذواق

لما جبت العربيه كنت بدور على حاجه عاليه و سعر مناسب و تقفيل و خامات و توكيل كويس و الحمد لله أعتقد أنى لقيت ألى أنا عايزه

المميزات

1-الخامات الداخليه و التقفيل جيد جدا
2-عزل الصوت الخارجى ممتاز
3-صالون واسع
4- الشنطه فى الموديل 2015 بقت أكبر و العربيه سقفها بقى أوطى من القديمه
5-الثبات جيد
6-العفشه مش ناعمه و مش خشنه ,عادى زى بقيه الكورى
7-عاليه عن الأرض و ده طبعا مهم جدا فى مصر علشان خطوط الدفاع الأرضى ألى بتعملوه الحكومه و الاهالى( المطبات )
8-الفيميه الخلفى مفيد جدا بيحمى الأطفال من الشمس و طبعا مثبت على الرخصه
9- الفرامل كويسه جدا
10-شكل العربيه مميز
11-الكنبه ممكن تتنى لأسفل و يكون معاك ربع نقل لو عايز تنقل حاجه كبيره
12-طبعا العربيه جرايه و بتجمع بسهوله و الفتيس ال6 سرعات بيريح الموتور

العيوب

الحمد لله لسه محستش بأى مشاكل أو عيوب و أكيد لما أواجه حاجه حقولها على طول

1- سعر و سهوله أعاده البيع أكيد مش زى السيراتو
2- قطع غيار العربيه مش منتشره ( انا مسألتش عليها بس أعتقد أنها مش منتشره أوى)
3- لسه مجربتش العربيه فى الملفات الحاده أو على سرعات عاليه , أعلى سرعه وصلتلها 140 و كانت ثابته و مفيش مشكله

3- صيانه ال 1000 كم فى أبو رواش

على طول بروح القطاميه أو السبع أو وروكسى فى صيانه الريو بس المره ديه قولت حاروح أبو رواش

روحت عملت صيانه ال 1000كم فى أبو رواش بعد الفطار

بصراحه أول و أخر مره أروح هناك ,مش عارف اذا كان ده الطبيعى ولا علشان رمضان بس

1- مهندس الأستقبال تقريبا مبيفهمش حاجه (مش تريقه والله) مش عارف الفرق بين البوجيهات البلاتينوم و العاديه وحاجات تانيه
2- مكان الأستراحه مفهوش فيه شبكه يعنى لو حد حب يكلمك على الموبيل محدش حيعرف يوصلك و طبعا لما العربيه تخلص لازم يبعتوا حد يدورعليك
3- فيه حشرات و نمل و صراصير فى مكان الأستقبال
4- كان فيه واى فاى بس بيشتغل فى الأستراحه بس و السرعه بطيئه أوى
الباسورد Kiawifi2011

5-ألى سلملى العربيه العامل مش المهندس و ملقتش أى مهندس أسئله أيه ألى حصل فى العربيه
6-طبعا علشان بعد الفطار كان مفيش كافيتيريا و الشو رووم مقفوله ,بس عملولى شاى مجانا
7-غيرت زيت و فلتر و دفعت 356 جندى
8-ميعاد الحجز كان 9 ,و كنت موجود فى الميعاد , المهندس أستلم العربيه 9:30 و أستلمتها من العامل تقريبا 11:00
9-العامل كان عايز فلوس بس أنا طنشته

أسف جدا على الأطاله بس كنت عايز أكتب تقييم كامل

لو فيه حاجه مش واضحه أو لو فيه أى سؤال أنا تحت أمركم

ولو حد ناوى يشترى و عايز يجرب العربيه أنا تحت أمره فى أى وقت

م/تامر محمد

تم اضافه بعض الصور من مشاركه لاحقة
الادارة