الموضوع: تفتكرو ايه احسن طريقه لتلين السياره في الزيرو (موضوع مناقشه )

الموضوع بسيط ومش معقد . . .
يفضل فعلا عدم التسارع أو الفرمله المفاجأه في فتره التليين
عدم الحرق علي عدد لفات اعلي من 3000 لفه
التكييف شغله عادي جدا مفيش مشكله
متنساش ان زيوت الموتور الفابريكه غالبا ما تكون مواصفاتها خاصه شويه بمعني انها زيوت تخزينيه أكثر منها للأداء وعشان كده معظم التوكيلات دلوقتي بتغير زيت ف صيانه ال 1000 كم والمشتري فعلا بيحس بفرق فالاداء والنعومه وصوت الموتور واستهلاك الوقود
الكلام دا مش فتي دا كلام كتالوجات كتير وخبره شخصيه
بالنسبه لصاحبك . . لو عربيته حديثه خليه يعمل ريسيت ل وحده التحكم الالكتروني وبعدين يسحب جامد فترات طويله العربيه هتبرمج نفسها علي الاداء الجديد دا
الاهمال ف فتره التليين دا خطأك و هتتحمل نتيجته عاجلا أم أجلا

الموضوع بكل بساطه لما تشتري عربيتك افتح المنيوال قسم التليين
واشتري دماغك من كل الاراء المختلفه
المانيوال قايل كل حاجه بالتفصيل حتي تليين الكاوتش

ﻻ يفضل فعلا القرص و الشد على العربيه فى اول 1000 كم . ما تعديش rpm 3 . الزيت اللى بتنزل به العربيه مش زيت كفاءه عاليه و فى الغالب لزوجته مرتفعه علشان التخزين و شدة الاحتكاك بين اجزاء الموتور الجديد و تطبيعها مع بعضها و يفضل تغييره بعد ال 1000 كم .

تجنب فى فترة ال 1000 كم القياده فى الزحمه . حاول يكونوا على طرق مفتوحه نسبيا . السرعه المثاليه لاى عربيه 90 كم و حاول ما تمشيش على سرعه واحده فتره طويله يعنى كل فتره هدى و ارجع ل 60 و اطلع تانى على 90 او 100 .

التكييف لا يفضل فى اول 1000 كم لانه بيزود عدد لفات الموتور .

كل المقصود من فترة التليين هو تطبيع اجزاء الموتور مع بعضها بافضل طريقه مثاليه خصوصا حركة البساتم و ما يحصلش داخلها دواير تحزيز فى المعدن او مش عارف بالظبط اسمها ايه .

تحياتى

المشاركة الأصلية كتبت بواسطة ashouhdy

استاذ ياسر و الله المواتير طالعة متلينة جاهزة :)

الكلام دة من جوة المصانع مش التوكيلات

كل عربيه و لها تعليماتها . احنا عندنا فى الرينو دى تعليماتهم . طيب ايه معنى العربيه متلينه جاهزه من المصنع ؟ هل شغلوها لالف كم مثلا ؟ خلينا فى الاحتياطى افضل . تليين 1000 كم مش ازمه .