تسكن في حدائق الأهرام ولا 6 أكتوبر؟؟؟؟؟؟

**MoToRiZeR** · 11-11-2008 04:29 PM

أكتوبر فعلاَ أفضل في الخدمات بس طريقها مقرف .. الدخول لأكتوبر صعب الصبح فقط من الساعة 8 لحد 9 و نص مثلاَ .

الخروج منها بقي صعب جداَ .. المحور بيقف قبل ميدان لبنان بأربعة كيلو و ب 6 كيلو .. تطلع دائري تلاقي نزلة المحور اللي هربت منه موقفة الدائري برضه .. فا طرقها محدودة و اما بتقف خلاص بتقف فا الخروج و الدخول منها مش هيبقي مريح أوي خاصة لو إنت من النوع اللي بيقرر يخرج وسط اليوم .

أحسن حياة إن تسكن في أكتوبر و يكون شغلك في أكتوبر .. ساعتها بجد تعيش ملك .. إنما تبقي رايح جي من أكتوبر ده مش هيبقي مريح في كل الأوقات .

و بالنسبة للزحمة فا هي حسب المكان اللي في أكتوبر .. فيه مناطق بقت زحمة فعلاَ و فيه مناطق هااااادية جداَ .

**aliabutaleb** · 11-11-2008 04:34 PM

المشاركة الأصلية كتبت بواسطة MoToRiZeR

أحسن حياة إن تسكن في أكتوبر و يكون شغلك في أكتوبر .. ساعتها بجد تعيش ملك .. إنما تبقي رايح جي من أكتوبر ده مش هيبقي مريح في كل الأوقات .

ربنا يديمها علينا نعمة

ويارب يعينكم على البلاء ده

**Jato.33** · 11-11-2008 05:18 PM

بص يا باشا أنا أرشحلك حدائق الأهرام طبعاً على الرغم من إني عندي شقة في أكتوبر
شوف
أولاً : حدائق الأهرام أقرب من الهرم وبالتالي أي خدمات
ثانياً : إسكان راقي جداً مساحات الشقق كبيرة أوي كلها أهالي مفيش حكومة خالص والناس إلي هناك مستواهم المادي وأعتقد ممكن نقول كمان الإجتماعي كويس مفيش عمال وصنايعية وكده
ثالثاً : في موقع متميز جداً قريبة من 6 أكتوبر ولن تضطر إلى ركوب المحور لأنك على طريق الواحات وبالتالي يمكنك بسهولة الوصول إلى أكتوبر في ربع ساعة بالعربية - قريبة من الطريق الدائري إن شاء الله بعد إكتماله وبالتالي يمكنك الوصول للكورنيش مستقبلاً - المواصلات إليها عادية جداً مليون مواصلة تنزلك ميدان الرماية ومن هناك مفيش 5 دقائق لو بتاكسي مش هياخد منك كتير وكمان مع تزايد العدد أكيد هيكون في مواصلات تدخلك لتغطية الطلب المتزايد - قريبة من مشاريع إستثمارية راقية جداً كتير على طريق الواحات وكمان مدينة الإنتاج الإعلامي ودريم بارك الكلام ده كله بالعربية مياخدش ربع ساعة - طريق الواحات عريض جداً ضغطه قليل وعمره ما وقف
رابعاً : الأسعار من سنة فاتت كانت بتتراوح من 1600 و 1800 المتر وكده قليل والمساحات مش أقل من 100 متر وتسدد النص كاش والباقي على سنتين وممكن لو قاوحت يديلك كمان 6 شهور أو سنة
خامساً : إستثمار جيد جداً لفلوسك بعد ما وصلة الدايري تخلص وكمان يفتحوا المتحف الجديد هتعلى المنطقة كلها أكيد

بالنسبة لأكتوبر :
الأسعار غالية جداً الشعبي ب1600 المتر(كل المساحات موجودة) مفيش تقسيط إلا لو عمارة جديدة ومش هيقسط لأنه هيلاقي كاش - متنفعش غير لو كنت بتشتغل فيها تبقى ملك - بإنتظار بدائل للمحور بعد الإنتهاء من وصلة الدائري إلي الأثار سبب تأخيره ربنا يحرقهم وكمان سيتم عمل طريق بديل من عند مسطرد الكلام ده على عهدة الحج نظيف بس طبعاً لسه بدري وبعدين موضوع المترو إلي هيروح هناك يبقى يشوفوه أحفادك أو أحفاد أحفادك لسه بدري على ما يحلوا مشكلتها الكتير والمحافظة الجديدة والمحافظ إلي ملوش لازمة وكده

**douha_wise** · 11-11-2008 06:45 PM

انا طبعا من سكان اكتوبر و شفت حدائق الاهرام و طبعا حى جميل لكنة لا يرتقى الى اكثر من حى من احياء اكتوبر و الخدمات هناك لها تأثير فلن تجد مستشفيات او مواصلات و مدارس او مناطق خدمية و غيرها و مكانها متطرف لا هو قريب من الهرم و لا من اكتوبر
اما اكتوبر فأكبر و لا تحتاج لكلام بخصوص الخدمات و المستشفيات و المواصلات و المدارس برغم انها حتى الآن ليست كثيرة للدرجة المطلوبة
مشكلة اكتوبر هى نهاية المحور و انا لا ارها مشكلة من اكتوبر نفسها بل مشكلة الدائرى و شارع جامعة الدول العربية و كوبرى 15 مايو المكتظ بالسيارات و لو وجدت حلول جذرية طويلة المدى بدلا من الحلول القص و اللزق المتبعة لاختلفت الامور كثيرا و املنا فى المحور الجديد الذى تكلموا عنة بعد نقل بوابات اسكندرية
لكن المستقبل فى اكتوبر افضل كمدينة كبيرة شبة متكاملة
و على فكرة انا سمعت ان الاسعار نزلت هذة الايام و انا ارشحلك الحى الحادى عشر الذى اسكن فية فأسعارة معقولة و مستواه فوق المتوسط الى جيد او الحى الخامس لكن لو بحثت فية فأبحث فى اواخرة لتجد اسعار اقل
عموما ربنا يوفقك و تكون جارنا فى اكتوبر

**a_tantawy7** · 14-11-2008 05:58 AM

شكرا لكل الردود يا شباب, أنا لسة مقررتش بشكل نهائي, وأن كنت ميال أكتر لحدائق الأهرام,حاسس أنها أقرب للبلد وكمان أررق وأرخص, مشكلتها الوحيدة قلة الخدمات و سوء حالة الطرق.
أدعولي و ألف شكر مرة تانية.

**a_tantawy7** · 14-11-2008 05:59 AM

المشاركة الأصلية كتبت بواسطة a_tantawy7

شكرا لكل الردود يا شباب, أنا لسة مقررتش بشكل نهائي, وأن كنت ميال أكتر لحدائق الأهرام,حاسس أنها أقرب للبلد وكمان أررق وأرخص, مشكلتها الوحيدة قلة الخدمات و سوء حالة الطرق.
أدعولي و ألف شكر مرة تانية.

و كمان أروق

**Survival** · 07-04-2013 01:46 AM

انزل شوف بنفسك و اسأل هنا و هناك
انا قبل ما اشترى شقتى لفيت القاهرة كلها تقريبا.
الموضوع مش مدينة تفرق عن مدينة و انهى احسن و افضل
الموضوع يتلخص اولا فى امكانياتك و متطلباتك لانها بتختلف من شخص لاخر.
عموما فى نصائح عامة ممكن اقولك عليها
- دور على دور تانى او تالت او رابع بالكتير و دا لان مشكلة الكهرباء و المياة الفترة الجاية هتكبر.
- كلما قل عدد الشقق فى العمارة كل ما كان احسن بالاخص لو مفيش جراج عشان تلاقى فرصة مكان تركن فيه.
- البحرى مفيش احسن منه بالذات لما الكهربا تقطع.
- كل ما كان الشارع اوسع كل ما كان افضل.
- لو الجنب القبلى من العمارة مفيش جنبه جار حاول تبعد عنه عشان الشمس هتخلى الحيطان نار فى الصيف.

لو مفيش مشكلة الكهربا اللى احنا فيها كنت قولتلك خد الدور قبل الاخير اضاءة و تهوية افضل - بلكونة غير مجروحة من الشارع - بيعيد عن دوشة الشارع.
اوعى تتسرع عشان دى خطوة كبيرة خد وقتك و فكر كويس. ومتنساش الاستخارة.

**egyptiandiver** · 07-04-2013 02:40 AM

6 أكتوبر sure

**Hossam_hassan4** · 07-04-2013 02:47 AM

انا سكان في الحدائق مشكلع عويصه في الشوارع و الامن و الجمعيه المسؤله حراميه و اكتوبر بقت زحمه جدا و المناطق الكويسه منها زي المتميز غاليه جداا

بس حدائق الاهرام سهل توصل منها لاي مكان بالعربيه بسهوله لكن مواصلات تعب شويه و مفيش مشاكل اوي من ناحيه الخدمات اعتقد كل حاجه موجوده