عزيزي البائع الجشع ...مالك ؟!
ندخل في الموضوع علي طول ... النهاردة بالصدفة لقيت حد عاملي invitation علي الفيس بوك عشان أعمل لايك لصفحة بتبيع عربيات مستعملة ...المهم دخلت عليها و بقلب لقيت فعلا عربيات كويسة و لكن في عبط رهيب في الموضوع !!!
لقيت الصفحة عارضة كيا سبورتاج 2013 تاني فئة ب 220000 و هي أصلا زيرو موديل السنة ب 224500 و العربية كانت ماشية 38000 كم ... حد يقدر يقولي في ايه ؟!
-الكورولا من 2005 ل 2007 بقت بتتباع ب 118000 لحد 130000 كل ده عشان أحسن جيل في الكورولا !!!
-أنا شايف إن سوق المستعمل كله بقي عبط في عبط ... يعني شفت مثلا لانسر بومة 2014 4000 كم فابريقة ب 152000 ... ليه ؟! و ايه الفرق بينها و بين 2006 مثلا ... ده حتي الشكل ماتغيرش !!!
-إحنا اللي عملنا في نفسنا كدة و رضينا نتقلب بمزاجنا و المصيبة إنك تلاقي واحد استلف مثلا عشان يجيب عربية و ديه حاجة صعبة أوي !!!
-إحنا كمستهلكين اللي نقدر نتحكم في أسعار االعربيات مش التجار ... يعني إحنا اللي نقدر نحدد السعر و نتشرط كمان ... الكلام ده يحصل لو قاطعنا كام شهر و نيمنا السوق و بطلنا نشتري عربيات شوية !!!
-كمان إحنا ممكن نجبر التوكيلات تحطلنا المواصفات اللي عايزينها زي الايرباجز و الESP و غيره من الأنظمة المهمة ...واحد صاحبي كان راكب معايا البيكانتو و كنا مسافرين و كنت ماشي علي 150 و اتفاجئ لما عرف إنها من غير أي وسيلة أمان (ماعدا حزام الأمان) و قالي انت مجنون و بصراحة أنا حبيت أعمم الكلمة علي كل ملاك العربيات في مصر اللي اتنازلوا و ضحوا بوسائل الأمان!!!
-قالي إن أقل عدد من الإيرباجز دلوقتي هو 4 و نادرا جدا لما تلاقي 2 ديه !!!
-العربيات كلها دلوقتي بقت لازم تنزل إجباري بالESP و حاجات تانية مهمة كتير
-إحنا لازم ناخد خطوة إيجابية عشان نغير مستقبا العربيات في مصر !!!
-بذمتك يا شيخ دمك مش بيتحرق لما بتعرف إنك راكب عربية درجة تالتة و بأغلي سعر في العالم ... تقريبا إحنا الشعب الوحيد اللي بيشتري العربية بضعف تمنها !!!
-عزيزي مشرف القسم العام أعتذرلك لو بدر مني لفظ خارج و لكنها حاجة تحرق الدم