الموضوع: تجربه قياده تحت ظروف صعبه (صباح الزحلقه)

من المواضيع القديمه بس نزلت فى منتدى سيات وحبيت اشاركها فى العام يارب تعجبكم
السلام عليكم
من فتره مبعملشي مواضيع قلت اجيلكم بموضوع مفيد قليل مننا اللي اتعرض له ورجاء اللي معاه مواضيع مشابهه يضيفها للموضوع لتعم الفائده
اولا ببعت تحياتي للقائمين علي قسم سيات ومجهودتاتهم بدون ذكر اسماء وده لانه عندي بنفس الغلاوه ومينفعشي انسي حد
ثانيا احب ادعو للجميع بكفايه شر الطريق خصوصا اليومين دول
الحكايه ان اخوكم غاوي صيد سمك وساعات بتهف عليا اروح وادي الريان وكان الاتفقاق يوم الجمعه 14-2 بس لظروف اضطرينا ناجل الطلعه لليوم اللي بعده اللي هو السبت وعلي الرغم ان الارصاد حذرت من احتمال دوش محترم من بعد الساعه 10 صباحا بس هنعمل ايه الغرض مرض وقد كان
الطريق 140 كم بياخد 3 ساعات ونص من البيت للمكان وده لانه مش طريق عدل وفي مدقين وبهدله
الطريق واحنا رايحين كان كويس وصلنا الساعه 8 تقريبا والجو كان تلج موت والسما مغيمه وتنذر بمطر غزير
تشكيل الرحله كالاتي
1-عربيه ريجاتا راكب فيها 4 اشخاص وكان بيسوقها اخو صاحبي واسمه محمد وهو سواق مخضرم في الطرق الوعره وكان وجوده معانا مطمئن جدا ليا
2- عربيه فولكس فان نقل كنا 3اشخاص وكنت انا اللي سايقها
قدرا قبل ما نوصل ب100 متر العربيه الريجاتا كسرت شداد قدام ولستر ربنا كنا في مدق وماشيين بسرعه 10كم/س وربنا ستر
مشينا بحنيه بعد ما ربطنا الشداد ووصلنا وقبل ما الدنيا تمطر نوينا ننزل البلد نلحمه ونرجع تاني
وقد كان وكنت وانا رايح الحمه باخد طريق اسفلت بس رايح جي ومعلوش حدود للسرعه ولا كماين ولا بتاع المهم بنجري عليه لقينا الهوا قوم التراب وبقينا شايفين طشاش وكنا مستعجلين وماشيين 100 ~110 وقالتني كومه رمل ناعمه موجت العربيه بس الحمد لله جت سليمه
ربنا وقعنا في خراط كويس انجزنا وخدنا بعضينا ورجعنا المهم الطريق ترتيبه كالاتي اسفلت رايح جي جنب ترعه صغيره وعليه منحني خطر جدا اقصي سرعه عليه 30 وبتكون ماشي قبله علي سرعه 100 فطبعا السرعه بتبقي سرقاك ومبتعرفشي تقدر وممكن العربيه تنزل في الترعه وبعدين طريق رايح جي وسط الصحرا اللي هو عليه مدخل وادي الريان وبعدين مدق مجرم الارض معضعضه واقصي سرعه 20 وساعات في حتت تزود ل40 وبعدين ارض غير ممهده اكبر من العربيه بمتر او متر ونص ويمينك زي حاجز ترابي وشمالك ترعه وممكن تجري فيهاشويه بس الواحد بيقلق ومبيزودش عن 20الي30 المهم اخر طريق ده هو المشكله لاني وانا راجع عليه كانت الدنيا مطرت شويه وخلت الارض مزحلقه وحسيت ان العربيه بتتزحلق غصب عني وبتجنح من ورا والطريق ضيق جدا واى غلطه هنروح في داهيه بس كان الموضوع ده في مكان واحد ولمسافه 30 متر فمحطيتشي في دماغي كالعاده المهم اخر طريق طوله 4كم وصلنا للمكان واصطدنا شويه وشربت بقي المطره الشديده وده طبعا خلي ال4كم دول طريق خطر جدا جدا وده فعلا اللي حصل
الموقف كالاتي الريجاتا سبقتني وانا وراها ومحمد بيديني تعليماته كل شويه ومتابعني بالمرايه واول حته مزحلقه شويه العربيه جنحت وكانت هتلف راحت دست فرامل بحنيه ووقفت مكانها بس وشها مش عدل راح محمد جالي جري وقاللي استني كده واهدي وقعد يديني ارشادات ازاي اتعامل مع الموقف وهو ان كل ما العربيه تتزحلق من ورا يمين اكسر نفس الاتجاه لحد ما الضهر يتوسطن والعكس صحيح يعني بوزنها كانها ماشيه علي الميه وطبعا الكلام سهل بس التطبيق مميت ودخلنا علي حته مسافه 30 متر وبدانا الزحلقه وقلبي وقع في الدواسه وانا برقص بالعربيه بس اول ما الاقي حته ناشفه اروح رامي عليها عجلتين والم نفسي والحمد لله كان في تسهيلات وعدت علي خير وقلبي كان بيدق بغبا لان اى غلطه هبقي في الميه وعوضي علي الله المهم دخلنا علي حته تانيه ممكن تكون من 50الي100 متر ومفيش فيها اى مكان ناشف وكمان غير مستويه ومليانه بروز ونقر وبعيني شفت العربيه الريجاتا بتلعب من محمد قلت استر يا ستار دخلت يا معلم وصباح الدريفتات كنت حاضن الطاره واخويا جنبي متابع الناحيه اللي فيها الترعه وانا عمال العب بالي ستيشن بدون مبالغه كنت بمشي زاويه 45 وسرعتي مبتعديش 10 ولما بعدل كانت بتجنح الاتجاه التاني بسرعه تخوف وشفت في الكام دقيقه دول اللي مشوفتوش في حياتي في السواقه
عدت على خير وخدنا المدق اللي يخرب بقي العفشه ومحمد اخد شورت كت عشان يرحم العربيه من المطبات شويه وانا استعجلت ودخلت وراه المهم عدينا علي حته رمله رحت غارز بس الريجاتا عدت برضه الخبره يا جدعان رحت قلتله تعالي طلعها وسبتله العربيه ووقفت اتفرج وكان معانا واحد اسمه عطيه سواق برضه ليه في موضوع الغرز وكده وقالنا لازم نستخدم الدواسات عشان تطلع والحمد لله طلعنا من الغرز وكملنا ووصلنا بالسلامه
الدروس المستفاده
1-السواقه ملهاش كبير
2-ضغط العجل مهم جدا ولازم تعرف اسراره لان مشاكلي كلها في اليوم ده ان العجل كان 40 لانها نقل وكان المفروض يكون 18الي20
3-الطرق الزحلقه هي الاخطر علي الاطلاق وطريقه سواقتها غلسه جدا بس نظريا سهله وهي حفظ توازن العربيه زى ما تكون بتعمل دريفتات كده بس لم العربيه ميكونشي فجائي والفرامل لا تستخدم الا في الشدائد فقط والعربيات الاوتو ملهاش مكان هناك
4-دواسات العربيه هي وسيله الخلاص من الغرز وده بانك تفرشها قدام العجل بعد ما توسعله قدامه ربع متر وتطلع بعزم مش بسرعه واول ما تركب الدواسه تاخد سرعه عدله
5-الصيد ده هوايه مرهقه بس بتفصل الانسان عن رتم الحياه وساغات بتقلب بغم زي ما حصل معايا كده
اشوفكم علي خير