الموضوع: ملاحظاتى بعد تجربة قيادة الشارك

انا معايا سيراتو اوتوماتيك موديل 2011
وكورولا 1300 سى سى مانيوال موديل 2006
امبارح كنت عند حمايا وخال مراتى كان موجود ولقيته اشترى شارك 2014 الفئة الاولى زيرو ب 134 الف جنيه

أستئذنت منه ان اجرب العربية علشان عاوز اعرف العربية بنفسى لان عاوز اغير العربية الكورولا بعربية اوتو وكنت محتار بين الشارك وبين الكروز
واخدت العربية ومشيت بيها حوالى 15 كيلو رايح وزيهم جاى
وملاحظاتى على العربية
1- العفشة ممتازة جداا ما شاء الله عليها لدرجة انى حسيت ان السيراتو مفيهاش عفشه من الاساس هههههههههههههه ....... والعفشة كمان اطرى من الكورولا ومحستش بالمطبات زى مبحس فيها فى السيراتو
بصراحة من الاخر عفشة محترمة تليق وتنفع فى شوارع مصر

2- التكييف ممتاز فيه 8 درجات لسرعه المروحة وتبريد كويس اوى بس التجربة كانت ليلا مش نهارا

3- نور الكشافات الامامية ممتاز جداا وكاشف الطريق

4- العزل وصوت الموتور .... صوت الموتور كان عالى بس مش للدرجة الى كنت متخيلها لانى كنت متخيل هسمع صوت مزعج جداا بس صوت الموتور اشبة بصوت كده مش عارف اوصفه بس بصراحة صوته عجبنى اوى كانى سايق عربية رالى

5- ارتفاع العربية عن الارض ممتاز وعالية ومحكتش فى اى مطب حتى كان فى مطب غبى بحك فيه بالسيراتو بس محكتش بيه بالشارك

6- العربيه ما شاء الله عليها واسعه من جوه وراء وقدام

7- الثبات ممتاز لان وصلت بالعربية الى 120 ومكنتش حاسس بالسرعه ومش حاسس بانى محتاج امسك الدريكسيون جامد وحاسس ان العربية تقيلة

8- السحب بصراحة ولا كلمة ومحستش فيها ببطء الطلعه ودست على البنزين واديتها كيك داون والعربيه ما شاء الله عليها مقصرتش

9- العربية فيها شاشه بتين اى باب مفتوح وعداد الحرار والبنزين ديجتال وبتكتب كلمة مرحبا عند وضع المفتاح فى السيارة ورسالة توديع عند ازاله المفتاح ورسالة تطلب منك ازالة المفتاح عند اغلاق الموتور بالاضافة لحاجات اخرى بس ملحقتش اشوفها

العيوب من وجهه نظرى
- شنطة العربية ضيقة فعلا بس عجبنى فيها ان الشنطة على مساعدين مش على مفصلات

- التابلوة كده تحس انه فقير ومفيهوش اضاءه ومظلم

- قطع غيار العربية بسمع انها غالية زيادة عن اللزوم بس معرفش فعليا اسعارها

بصراحة انا حاسس ان العربية دى قيمة مقابل سعر وبقيت ميال ليها اكتر من الكروز بعد ما سوقتها بس ناوى انشا الله ان كان فى نصيب فيها انى اجيب الفئة الثانية او الثالثة لانى حاسس ان الفئة الاولى فقيرة اوى