الموضوع: خطوات شراء عربية جديدة

انشاء الله ناويت اشترى عربية كنت عايزة اعرف ايه هى الخطوات او الاجراءات اللى هتعدى عليا من اول ما اروح المعرض لغاية ما اركن العربية تحت البيت
مع العلم العربية انشاء الله هتبقى زيرو كاش
هل المعرض بيخلص الاجراءات بتاعت المرور و ايه الاوراق اللى اخدها معايا و انا رايحة اشترى ؟

المشاركة الأصلية كتبت بواسطة shiko85

مبروك مقدما
حضرتك كل اللى هتعمليه انك تحددى نوع العربيه و الفئه المطلوبه و تسألى عليها سواء فالمعارض بتاعت الوكيل او اى معرض تانى
لو استلام فورى يبقى تدفعى الفلوس و تكتبى عقد العربيه و تستلميها بعد ما تعملى كشف عليها و تتأكدى انها مفهاش اى خدوش او خبطات و تتأكدى ان كل حاجه شغاله (يستحسن يكون مع حضرتك حد عنده خبره) و تتأكدى من وجود العده
لو العربيه مش موجوده هتدفعى عربون و تأخدى وصل بالمبلغ و اهم حاجه ان سعر العربيه يكون مكتوب فالوصل لان اوقات المعارض بتقول السعر زاد و بياخدوا فرق الفلوس
و لما العربيه توصل المعرض هيكلموا حضرتك و تروحى تستلمى العربيه و تعملى معاينه للعربيه
و لو حضرتك هتأمنى على العربيه مش لازم تستنى الترخيص - المعارض فيها مندوبين تأمين لشركات مختلفه تعملى العقد و تدفعى المبلغ المتفق عليه و خلاص كده علشان لا قدر الله لو حصل حاجه للعربيه يبقى التأمين يتحمل التصليح
ورق العربيه غالبا بيتأخر يوم او 2 و ممكن اسبوع
ممكن حضرتك تطلبى من المعرض ان حد من عنده يقابل حضرتك فالمرور (بيكون معاه الورق) و يخلص اجراءات الترخيص
الأوراق المطلوبه من حضرتك هى البطاقه فقط لان العربيه كاش

انا متشكرة جدا جدا جدا لردك