حد عنده فكرة عن استيراد حليب اطفال

**SoFiMaN** · 18-09-2014 01:08 AM

السلام عليكم

بقالي فترة بكلم شركة اوروبية استورد منتجها (لبن اطفال Formula مصنع و معبأ بالمصنع بالخارج) و تقريبا كل حاجة الحمدلله تمام فاضل اهم و اصعب حاجة في نظري و هي دخوله لمصر,, هل فعلا لازم اسجله في وزارة الصحة ؟ لو لازم طب الاجراء ايه لأن سمعت الموضوع ده بياخد بالسنة و اكتر

لو لازم التسجيل و فعلا التسجيل بياخد الفترة دي كلها طب ايه البدائل ؟

و اخيرا لو في حد برضه يعرف مستخلص شاطر و بيعرف يخلص اموره (اي كان بياخد كام) ياريت يدلني برضه.

**بحار** · 18-09-2014 06:14 AM

شوف مواقع وزارة الصحه وهيئة الرقابه على الصادرات والواردات وهتلاقى فيها اجابات على كل حاجه عاوزها.

**Secret-Man** · 18-09-2014 08:54 AM

تسجيل المنتج برقم وزارى
تاخد موافقه عرض واردات
تدخل المعمل فى الوارادات الجمرك عينات متقلش عن 4 علب وتنتظر نتيجه المعمل علشان يتوافق عليه يدخل
وبعدين يتسجل علامه تجاريه باسمك لان كل مره هيتطلب تصريح وزاره صحه والبضاعه فى الجمرك

**subhimust** · 18-09-2014 11:04 AM

ربنا يوفقك

**SoFiMaN** · 18-09-2014 11:52 AM

الف شكر للجميع .. طيب في حد ممكن يكون حافظ الطرق دي يكون معايا و يخلص الموضوع بأجر ؟ اعتقد المستخلصين اجدع ناس تخلص الموضوع ده

**Hany Adel** · 18-09-2014 01:54 PM

بعت لك رسالة على الخاص

تحياتي

**أبو صلاح** · 18-09-2014 02:20 PM

معانا عضو هنا اسمه اشرف فتحى
نايل موتورز - NileMotors.net
هو مستخلص جمركي ليه خبرة كويسة
ودي صفحته على الفيس بوك
https://www.facebook.com/ashraf.fathy.102

لو مهتم وعايز تلفونه كلمني على الخاص وانا استأذنه وابعتهالك

**أشرف فتحى** · 20-09-2014 01:52 AM

بص يا صديقى..
دا موضوع محتاج منك مجهود وتعب عشان هتدخل فيه منافسه مع حيتان كبيره..فلو انت مظبط نفسك فى التسويق والتوزيع والمعاملات الماليه والبيع يبقى نبدأ من أول السطر..

هتكلم فى الجزء اللى يخصنى وهو الجمارك..
حضرتك مبدئيا هتعمل سجل تجارى وبطاقه ضريبيه وسجل مستوردين تحدد فيه المجموعات السلعيه اللى هتستورد منها مقابل رسوم محدده وبيتم اصدار سجل المستوردين من الهيئه العامه للرقابه على الصادرات والواردات..وإن كنت هتبقى وكيل للشركه دى بس بتطلع حجه اسمها سجل وكلاء وتستورد منتجاتهم فقط.

تقدم اصول مستنداتك للإطلاع وصور منها للحفظ إدراه المتعاملين مع الجمارك وبتاخد رقم متعاملين فى الحاسب الالى بتاع الجمارك..

تاخد بعضك وتطلع على وزاره الصحه..وتحديدا على السياسات الدوائيه والصيدليات عشان تاخد موافقه بالاستيراد..وهيشترطوا عليك طبعا مخزن بمواصفات معينه ونظام تخزين معين وطفايات ونظام امان بطريقه معينه عشان تبقى مستورد مسجل عندهم..

تاخد رقم تسجيل فى وزاره لصحه لكل منتج على حده.

هتقدم موافقه السياسات مع كل شحنه او فاتوره هتقدمها للجمارك..

وبيختموا على صوره للفاتوره ..

المستخلص كل دوره انه بياخد منك امستندت دى وينوب عنك أو يمثلك امام الجمارك والهيئه لعامه للصادرات والواردات..

بعد الكشف الجمركى والمعاينه الواردات هتسحب عينه للتحليل واموافقه وموافقه الطب البيطرى..

بعد التحليل والافراج هتدفع لرسوم وتفرج عن شحنتك...

بس كده..