من أين لك هذا ؟؟؟؟؟؟

**د.أحمد سمير** · 22-07-2007 04:56 AM

تخيلت نفسي مواطن مصري بسيط ، شاب في مقتبل العمر لم تتح له الفرصة لتجربة أمور كثيرة ، وهو كملايين الشباب في مصر ينتمي لطبقة وسطى أو أقل ، يدخل إلى منتدانا العامر ليجد اسئلة ومداخلات وكلام عن سيارات بمئات الألوف أو على الأقل عشرات الألوف .. وتخيلت كم الإحباط والتساؤل اللذان يلمعان في عينيه وهو يقول لنفسه ، كيف استطاع هؤلاء الشباب أن يشتروا هذه السيارات ؟
فوجدتها فرصة مواتية لنوضح لهذا الشاب الافتراضي كيف أن شراء سيارة بهذه المبالغ تطلب جهداً وعرقاً وعملاً وكفاحاً سواء من شخوصنا أو من شخوص أهالينا . ويا ريت كل شخص يقول لنا تجربته في كيف استطاع توفير مبلغ شراء سيارة بأي ثمن كان .
أنا شخصياً اشتريت سيارتي الحالية بعرق جبيني وكفاحي الذي استمر عدة سنوات ، في ظل ضغط عمل هائل لا أتصور أنني قادر على تحمله الآن ، وقد أوليت شراء السيارة الأولوية على شراء اساسيات حياتية أخرى كثيرة كالشقة التمليك مثلاً . لذا فهي بحمد الله أتت من لحم الحي كما يقولون . وأنا أعتز جداً بالسياراتين التي اشتريتهما من حر مالي وعرق جبيني ، أكثر من أي سيارة اخرى
تقبلوا خالص مودتي

**AhmedElsayed** · 22-07-2007 08:51 AM

موضوع جميل اوى يا دكتور
واعتقد السؤال ده بيراود ناس كتير حتى من اللى معاهم عربيات
ربنا يبارك للجميع فى عربياتهم ويزيدهم كمان

انا بالنسبة لى العربية وسيلة لتقضية احتياجاتى فقط
وعلشان بهدلة التاكسيات والفلوس الرهيبة اللى صرفتها عليها بعد جوازى بالذات
كان الحل الوحيد انى اجيب عربية وجبتها بالتقسيط والحمد لله

بس عمر ما من احلامى انى اجيب مرسيدس ولا بى ام ولا اى حاجة من دى
علشان كده ساعات بستغرب اوى من الناس اللى بتصرف عشرات الالاف علشان تجيب عربية اكبر مع ان اللى معاهم مقضية الغرض او اللى بيصرف الاف علشان "يروش" العربية

أحمد السيد

**AlmAhAtmA** · 22-07-2007 09:59 AM

بعد ما اتنقلت المركز الرئيسي للشركه اللي بشتغل فيها
كان لازم اجيب عربيه
علشان انا من اسكندريه و شغلي حيكون بين العاشر من رمضان و القاهره
و اكيد لو مواصلات كانت الدنيا حتكون صعبه شويه
خصوصا اني لازم انزل كل اجازه
انا كان معايا شويه من خيرات امريكا دفعتهم مقدم و الباقي اقساط مع كونتكت
طبعا موضوع 5 سنين ده بيقضي علي اي احلام بسياره جديده
انا كل اللي بتمناه اني اقدر اسدد الاقساط و احافظ علي العربيه
و اهي مستوره و الحمد لله

**إسلام شاهين** · 22-07-2007 10:12 AM

تجربيت الشخصية :-
أنا من مواليد مصر ولكن تعليمي إلى المرحلة الثانوية كان في المملكة العربية السعودية ، وبعد العودة دخلت كلية الآداب قسم اللغة العربية واشتغلت بالتعليم لمدة 8 سنوات ( كنت بدي دروس ) بس بصراحة الموضوع معجبنيش خالص المهم عمي نائب رئيس مجلس دولة ( مستشار ) الله يكرمه عيني بمجلس الدولة ، المهم طبعا نتيجة لوقت الفراغ الكبير اللي بعد الشغل قررت أخش في موضوع تجارة الموبيلات واشتغلت فيها حوالي 10 سنسن كتجارة بيع وشراء والحمد لله عملت منها مبلغ كويس بس بعد كده الموضوع بقى مقرف جدا فقررت إني أسيبها ، المهم أول عربية جبتها كانت طبعا 128 وبعديها جبت هوناد أكورد 1983 وبعديها تاني 128 مرتين وبعدين جبت واحدة فيات أرجنتا وفي الآخر جبت الانسر 2007 دفعت مقدم والباقي قسط على خمس سنين وربنا يكملها معانا بالستر .

المهم يا دكتور أحمد حضرتك متأكد إن الموضوع ده مالوش دعوه بالضرايب ؟؟؟
هههههههههههههههه

**goodwave** · 22-07-2007 10:20 AM

والله موضوع شيق!
اولا السلام عليكم

انا بقى كان حلمي دايما يكون عندي عربية وانا شاب علشان الفسح والذي منة بس والدي لم يوافق ان يساعدني في شرائها وفضل ان يساهم معي في شراء شقة الزوجية! كنت منزعج منة جدا زمان بس دلوقتي بقول كان عندة حق!

بعد مااتجوزت ورزقني الله بكنزي لقيت ان موضوع العربية شيء مهم للاسرة (بس لو في امكان). استخرت الله واستشرت زوجتي بالنسبة لمصاريف البيت وتوكلت على الله و عزمت على الشراء.

بس اشتري ازاي وانا لسة عليا اقساط شقة وبيت مفتوح! حوشت رشين ومراتي باعت شبكتها واخدت قرض من البنك واشتريت العربية!

اينعم احنا ماسكين على نفسنا دلوقتي بس ربنا يكرم وان شاء الله نخلص اقساط الشقة والعربية وبردة بنتنا تكون لسة صغيرة وما تحسش بالمعاناة دي! بس هي اية الحياة من غير معاناة وكفاح؟

بس نصيحتي: شقة اولا وبعدين جواز واولاد وفي الاخر عربية (الترتيب دة طبعا للفئات المتوسطة زي حالاتي) :lol:

وشكرا

goodwave

**hazem_khidr** · 22-07-2007 12:18 PM

انا بقي قصتي غريبه شويه.
والدي ربنا يخليه و يكرمه عمل ليا شقه انا و اخويا من ايام ما كنا في تانيه كليه و ما رضاش يركب عربيه جديده و يمتع نفسه في سبيل انه يجيب لنا الشقق دي(كان معانا اياميها 125) و بعدين سافرت الامارات و العربيات رخصت و قولتله لازم اجيب عربيه و معنديش استعداد اني اتجوز قبل ما اركب عربيه معقوله و معدش عندي استعداد انزل من الامارات اركب عربيه قديمه اوي كده تاني كفايه.و علشان انا هناك و البعيد دايما بيبقي ليه تاثير قالي اللي تشوفه اعملهولك.المهم لميت كل اللي عملته في حياتي من شركه الادويه و شغلي في الامارات و كل مليم اتحصلت عليه في حياتي لحد ما كونت تلتين تمنها و والدي و والدتي ساعدوني بالباقي.و بعد ما اشتريتها علي مزاجي و انا كنت اياميها في الامارات والدي بدأ يركبها و عجبته و كنت سايبها عادي لا رفعتها ولا ايه حاجه ف هو استحرم انه يركبها بس ما قاليش علي ما جيت من الاجازه لقيته مسدد ليا تمنها في حسابي في البنك و باع عربيته و قالي فلوسك عندك و العربيه موجوده و لو حبيت تشتري ابقي اشتري براحتك :lol: . و لحد انهارده لسه بأسمي (مستخسر ادفع 700 جنيه انقل ملكيه ) و يمكن لما لقيت فلوسي معايا تاني دا اللي شجعني ارجع من الامارات و ابدأ حياتي في مصر و لولا كده مكنتش رجعت و كان زماني هناك محلك سر.
الخطوه الجايه بقي حخطب و اتجوز الاول و بعدين اجيب عربيه بالتقسيط

**Karim_Monir** · 22-07-2007 04:53 PM

موضوع مايطلعش غير من دماغ عمرانا زي دماغ واحد اوراق التصحيح كلت دماغة وفاق خلاص
ادخل في الموضوع

والدي من النوع اللي ما بيحبش يركب عربية غالية رغم انه مكانتة تخلية لازم يركب حاجة محترمة لكنه عشان عقلية عملية قوي جاب 128 بهدلتهالة اخر بهدلة-اتعلمت عليها ونص الحوادث اللي عملتها كانت بيها بس الامانة لله كنت بصلحا قبل ما يشوفها
اول ما خطبت قلت لازم اجيب عربية وكنت شغال في شركتي الحالية بس كان ليا دخل تاني كويس قوي
بس والدتي ربنا يكرمها (والدتي كانت ماسكة وزارة الموازنة والتخطيط والمتابعة والمالية وكل الوزارات المعنية بشئوني الجوازية)رفضت تماما انها تخليني افكر اجيب عربية الا لما اشتري شقة كويسة عشان كان عندي شقة في مدينة جديدة وبعدين اوضبها ومش اي توضيب وبيني وبينكم عشان والدي كان معاش كانت 128 تحت رجلي علي طول
بعد اول شهر جواز كنت هاعيط من قلة العربية ومرمطتي في المواصلات فكرت اجيب عربية وكانت بدايتي مع البيتلز ب 4500 جنية اخر فلوس احتكم عليها بعد شهر العسل والنقطة اللي بتيجي وخلافة
اشتريتها من العاشر من رمضان وانا نازل بيها وفرحان موتورها اتحرق وقطرتها لحد البيت

كانت بدايتي من البيتلز عملتلها عمرة نص كم وبعد شهرين بعدها وكسبت فيها 4 الالاف جنية وده شجعني اجيب بيتلز تاني وتالت
لحد ما خلفت كنزي ومراتي قالتلي كفاية بيتلز بقي عايزين عربية مكيفة بنفطس في الحر
بعتها ودمعتي في عيني وجبت الاكسيل وبعد كدة الريو عشان كنت عايز اركب زيرو بقي وبعد كدة الكرولا اللي شكلها هاتقعد شويتين تلاتة عشان العيال دخلت مدارس
اما عن الراي اني ماجيبش عربية غالية او رخيصة عشان بتقضي الغرض انا معترض عليها عشان بنروح نجيب شاشة كمبيوتر 17 بدل ال 14 القديمة وماوس ليزر بدل ابو بلية اكيد برضه العربية الكبيرة مساعدين احسن وثبات احسن وراحة وكدة بس مش صرف ببذخ
يعني لو اوكتافيا ولا فيكترا مكفييني ماروحش اجيب 320 ولا سي كلاس عشان معايا فلوس زيادة الا في الاوقات طبيعة العمل بتحكم
يعني انا مثلا بعد شغلي ليا شغل خاص في صيانة شركات كبيرة لو روحت بهدوم نص كم ولا شوز مش نضيف هاتتهز صورتي جامد وبدل ما طلب 10 مش هايدوني غير 3 واذا كان عجبك ما تبص لنفسك في المرايه
ودي حاجات فرضها علينا مجتمع المنظرة اللي احنا عايشينة

ياااااااااااااااااااااااا ااااااه يا دكتور
قلبت علينا المواجع ما كنا عايشن ساكتين :( :( :(

22-07-2007 05:17 PM

[b][size=18]كعادتك دايما يا دكتور بتفتح مواضيع في الصميم ، شكرا يا دكتور علي الموضوع ده

بالنسبة لي انا طول عمري بحب العربيات بس المهم اني طول عمري عارف اهمية العربية وبعتبرها روح البيت زي المية والكهرباء وده لان البرايد بتاعة الحاجة وقبليها كانت الدوجان ياما شالت اسية (البرايد شالت حاجات كتير من العفش بتاعي ومستلزمات الدهانات وخلافة) ده غير المصايف ومشاوير العيلة لاننا دياما كانت الحاجة تسكن في حتت علي اطراف القاهرة (عشان حساسية الصدر) فاللي يسكن في الشروق مثلا لازم يعرف اهمية العربية

عشان كده لما اتجوزت افتقدت العربية جدا بس انا طول عمري (انا بشتغل من 96) مفكرتش جديا اني احوش عشان اجيب عربية كنت دايما بحط فلوسي في شغل (تجارة اجهزة كمبيوتر) او في كورسات وكتب ومصاريف امتحانات اخدها عشان ارجع ادرسها تاني (عشان بدرس في مراكز IBM ,Microsoft)

المهم زادت احتياجي للعربية اكتر بعد الجواز وخاصة ان ربنا اكرمني بشغلي الحالي كمدير نظم لمجموعة شركات ليها اكتر من 20 فرع في انحاء القاهرة وبعض المحافظات الساحلية الامر الذى استلزم وجود سيارة تصلح للخدمة الشاقة والسفر وتكون جديده وعملية وحاجاتها رخيصة وفنيتها مش معقدة هيا كانت معادلة صعبة بس الحمد لله ربنا وفقني لاختيار حبيبتي البرايد

وقد كان ورغم اني كنت لسه خارج من معمعة الجواز والخلفة (بعد اول سنة جواز) الحمد لله كان معايا مبلغ المقدمة ورغم كرهي للقسط والبنوك بس حسبتها بشكل تجاري يعني
المصروفات الشهرية علي الانتقالات العادية + مصروفات انتقالات الشغل = قسط السيارة الشهري
وبالمعادلة ديه قدرت الحمد لله اجيب عربية جديده واترحم من قرف المستعمل وفي نفس الوقت مرهقش ميزانية البيت بقسط كبير او تكاليف اصلاح وقطع غيار غاليه

فعلا العربية نعمة اذكر ان هناك حديث شريف معناه ان الانسان يكفيه من متاع الدنيا دار وزوجة ودابة وطبعا العربية هي المناظر الحديث للدابة بشرط الابتعاد عن المغالاه والتبذير

**H.ibrahim** · 22-07-2007 06:44 PM

السلام عليكم و رحمة الله وبركاته
العبد لله كان اول امنيه فى حياتى انى اجيب عربية و ده علشان من وانا عندى 3 سنين و انا عندى حب جارف نحو العربيات بكل انواعهاو يمكن علشان اعيلة عندنا معاهم عربيات من صغرى وكنا بنسافر دايما بيها مع جدو الله يرحمه ولما سافرت مع والدى الى ليبيا فالمسافات هناك بعيدة بين المدن فكان لازم عربية وهما هناك بيعشقوا البيجو 404 و 504 و فكان لازم يبقى عندنا عربية و لما رجعنا سنة 1985 والدى اشترى الريجاتا وديه كانت لسه نازلة اول دفعة و مرضيش يركب مرسيدس لان احتياجاته كانت من البيت للشغل و الفسحة الاسبوعية لينا و لما حصل ان الفلوس اللى كانت باسمى فى شركات توظيف الاموال راحت ( وكان نفسى اجيب عربية لى لوحدى)و اتخرجت وبدات اشتغل كنت لما احوش فلوس كان نفس اركب بيتلز و لكن والدى رفض انى اشترى عربية خاصة بى لوحدى قال علشان اعرف اتجوز المهم بعد كده حطيت كل الفلوس اللى معى فى مقدم شقة تمليك بمدينة عباد الرحمن بالمعادى وفعلا اتجوزت و جبت بنوتة (حبيبة) و لكن حلم العربية مفرقش خيالى ابدا و السنة اللى فاتت خلصت اقساط الشقة الحمد لله واول مبلغ قدرت اجمعه تانى + شبكة المدام قدرت اجمع حوالى 12000 جنيها قمت نزلت اشتريت عربية بيجو 104 موديل 78 و هى بتحب تبيت عند الميكانيكى اكتر ماتبيت عندنا و لكن هى احسن 10000000000 مرة من التاكسى او المواصلات العامة خاصة لما بيبقى معك اطفال و انا كان ممكن اخذ قرض و اركب عربية زيرو و لكن علشان خوفا من الحرام و بعدا عنه فضلت اركب قديم ربنا يبارك فيه و ان شاء الله كمان سنة ربنا يكرمنا ونجيب حاجة موديلها احسن شويه و بعدين نفكر فى الزيرو ( على فكرة انا بسوق العربيات من وانا عندى 10 سنين )و لغاية دلوقتى سوقت تقريبا معظم انواع العربيات ( مانيوال - اتوماتيك - 4*4 - ميكروباص )حسب المتوفر مع العائلة او اصدقائى .اعتذار على التطويل على حضرتكم .