اولا الف الف مبروك على العربيه
ثانيا وده الأهم عايزك تتعب شويه وتقرا المواضيع المثبتة وكمان المواضيع القديمه ضرورى جدا جدا ... عشان تاخد خبره محترمه
ثالثا وده حاجه هتكرهك شويه فيه لانى ببالغ فيها :- الصيانه
١- فلتر هواء + فلتر بنزين + فلتر تكييف + ٤بوجيهات gm اصلى + مجموعه سير الكتينه = سير الكتينه + ٢ بليه + سير الدينامو + زيت وفلتر زيت + بليه الشداد بتاع سير الدينامو + طرمبه ميه جديده واهم حاجه تجيب القطع من عند حد موثوق منه جدا طبعا الأخوة الأفاضل أصحابنا هنا فى المنتدى هيعرفوك افضل الأماكن فى القاهره
٢- تغييير زيت الفتيس الاوتوماتيك ضرورى جدا بزيت Mobil ATF 320 والعربيه عندك بتاخد حوالى ٤ لتر واللتر ب ٥٠ جنيه
٣- العفشجى المحترم يبصلك على جميع اجزاء العفشه قطعه قطعه ويشوف التيل طبعا والمحتاج لازم يتغير
٤- فى المواضيع المثبتة هتلاقى فى صيانات الفيكترا طريقه تغيير وتنظيف دوره الميه موضوع لاستاذنا فادى محمد لازززززززم تعمل الموضوع ده وتعلمه وانت عند الميكانيكى عشان طبب الميه ... وطبعا تراجع على ثرموثتات الكوعه ضرورى جدا ولو بايظ غيره وتحط ميه موبيل من الحمراء بعد تنظيف الدوره كامله هتاخد حوالى جركن ونص
٥- هيتغير زيت الفرامل برضه على طريقه الاستاذ فادى محمد فى المواضيع المثبتة ... لازم تغيرها بنفس ألطريقه ضرورى جدا
٦- هنروح لواحد كهرباءى برنس يراجع لك على جميع السلوك فى الموتور لو حاجه مكشوفة يغطيها ويعزلها ويفتح علبه الفيوزات يشوف كل فيوز راكب مكانه صح بلونه ومقاسه وتغيرهم لو حاجه مختلفه او فيهم حاجه صيني
٧- هتخلص وتروح مغسله محترمه وتمسك انت خرطوم الميه وتغسل سربنتينه التكييف من قدام كويس جدا من تحت الاكصدام وتنزل البلاوى اللى فيها
٨- تروح تشوف ضغط الفريون عندك كام ولو محتاج يتزود زوده بس عند حد فاهم وياريت لو بالجهاز الجديد اللى بيكبس الفريون والعربيه مبطله ... ويبص على مواسير التكييف ويتأكد ان مفيش حاجه بتتحك او حاجه قريبه من السيور وهتبوظ ويعزلهم كويس
٩- تروح تظبط زوايا وترصص وتراجع على الكاوتش بتاعك
١٠ - حاول ماتتنطش حاجه من دى بجد ... انا عارف ان الموضوع انا فتحتهولك جدا ... لكن صدقنى انا بقولك على الصح اوى واللى انا شخصيا بعمله مره واحده تقوم بعد كده تسافر بعربيتك وانت باذن الله مطمئن جدا وهتتبسط اوى من اجمالى العربيه بعد الصيانه دى
اخر حاجه بأحد عليك تانى ضرورى تقرا المواضيع بتاعت الفيكترا b ... هتتبسط اوى وهتتعلم كل حاجه وتعملها بنفسك كمان
أسف للاطاله ... هذا وبالله التوفيق
المفضلات