من تعامل مع مركز خدمة راشد المعادى؟

**Mohamed Sorour** · 22-09-2014 11:15 AM

انا كنت عايز اعرف لو حد تعامل مع مركز خدمة راشد اللى فى المعادى؟ يقولنا رأيه

**noon** · 12-10-2015 07:42 PM

دي التجربة مع مركز راشد في المعادي

الأخوة الكرام .. السلام عليكم ورحمة الله ..

بعد أنقطاع فترة عن متابعة المنتدي الكريم .. يهمني أن أعرض عليكم تجربتي في السيارة البونتر بمركز راشد بالمعادي .. بما له وعليه ...

ويهمني الذكر بأن السيارة كانت متوقفة لفترة إلا أن صديقي الشاب اصر علي إخراجها من الجراج وتجهيزها وبالتالي قمنا بأدارتها واللف بها في شوارع المعادي ثم فجأة السيارة تعطلت أمام مركز راشد .. وطلب صديقي الشاب منهم الكشف علي السيارة ..........!!!!

فطلبوا أدخالها للمركز وقام بعض العمال من عندهم بزقها للداخل وكان هذا الأمر ليلا .. فأكدا بأنهما سيكشفان عليها صباحا ...

وفي الصباح أتصل المركز بصديقي وقالوا له أن السيارة لاتريد الدوران وأنهم يشكون في ان الموتور قافش وأن هناك وش سلندر .. ثم أتصل بي المركز وقال نفس الكلام .. فأكدت للمهندس بأن ظروفي الصحية لاتجعلني مستوعب مايقول لكن أعمل الصح لتدوير السيارة حتي نأخذها للعودة إلي الجراج ....!!!

وبعد يومان اتصل بي المركز وقال أنهم فتحوا الموتور .......؟؟؟؟
وقاموا بعمرة وش سلندر ..؟؟
أنا : أيوة بس حضرتك السيارة الزيت كان مضبوط ومش مختلط بالمياه ..؟
هو : مش مهم .. الموتور كان قافش واحنا فتحنا علشان نكشف ..؟
أنا : أيوة طيب دا كا مش وش سلندر .. ؟
هو : لأ حضرتك أحنا عملنا الصح ..؟
أنا : يعني أنت شايف كدة .. طيب الحساب كام .. ؟
هو : حوالي اربعة الاف جنيه ...!!!!
أنا : ليه وش سلندر باربعة تلاف .. ؟
هو : لأ أحنا غيرنا زيت وبيوجهات .. !
أنا : طيب أنتم كشفتم علي الموتور وحالتة الكبس ..
هو :لأ لما العربية تتظبط بعد ماتخدها تجربها ..!
أنا : بس المبلغ كتير ..؟
هو ممكن نعملك خصم ..؟
أنا : كام ؟
هو هنشيل مية جنيه ..
أنا : ...............................................

أنا : طيب العربية كدة تمام يعني ناخدها نسافر بيها ؟
هو : أيوة بس لسة لما نكشف علي العفشة ..
أنا طيب شوفوها .. ؟
هو : بس دي ليها حساب تاني ..! وماتقلقش هنعملك خصم ..
أنا : هبعتلك سواق ياخدها يدخلها الجراج لحد ما أسترد صحتي وأنزل أشوفها ..
هو : مفيش مشكلة بس متنساش فلوس الفاتورة ..
أنا : حاضر ...

بعد عشرة ايام ذهبت لمشاهدة السيارة في الجراج .. وجدت السيارة بتدور ولكن الموتور بدون سحب نهائية وأقصي سرعة ممكن تجيبها السيارة 40 ك .. !!!!!!!!!!

ودخلت بالسيارة عليهم وبعد الترحاب والكركدية .. السيارة الموتور مابيسحبش خالص ..
هو : أيوة أصل وش الأسبراتير عايز يتغير ...؟
أنا : طيب خرجت العربية أزاي وقلت أنها مظبوطة ..؟
هو : أنا كنت أقصد أن الموتور مظبوط ..
أنا : وازاي الموتور مظبوط ووش الأسبراتير وصباع الحرارة مش شغال ..
هو : لو عايزني أغيرهملك مفيش مشكلة .. ؟
أنا :بكام وش الأسبراتير ..؟
هو : لحظة (يذهب للعب في الكومبيوتر ) ب390 جنيه ..
أنا : أصلي ؟
هو : صيني بس علي مسؤليتنا ..!
أنا وصباع الحرارة ..؟
هو : ب900 جنيه ..!!
أنا طيب لحظة
وقمت بالأتصال بأحمد صالح في التوقيقية .. لقيت وش السبراتير ب 40 جنيه وصباع الحرارة 110 ..
أنا : طيب أنا هبعتلك الحاجة مع صديقي الشاب ..
هو : مفيش مشكلة ..

وبعد جلب البضاعة قام بالأتصال بي المهندس ..... راشد ..
هو : أيوة .. حضرتك صباع الحرارة دا مش بتاعها .. ووش الأسبراتير .. أحنا عايزين اسبراتير كامل ..
أنا : مش انت قلت عايوز وش بس ..
هو : أصل أحنا قلنا لازم نظبط العربية ...
أنا : طيب أظبطها .. بكام السبراتير ..
هو : بعد الخصم 1760 جنيه ..
أنا : ألو أحمد صالح بكام الأسبراتير كامل عندك .. ب300 جنيه .. ..
وأرسلت الأسبراتير وغيرت صوابع الحرارة مرة ثانية .. علي أمل ...!!!
وبعد تغير الأسبراتير أصر المهندس أن صباع الحرارة مش أصلي .. مش بتاعها .. مش شغال ..
أنا : طيب هات من عندك .. بس أعمل خصم ..
هو : من عينية .. بس هشوف في المخزن ..
أنا : أنا خايف تقولي غير الفانوس عشان العربية تتظبط ..!
هو : أحنا بنعمل الصح وبنراعي ربنا .. وزي ما انت شايف كل العربيات اللي عندنا باسات ....!!!

وبعد حوالي عشرة ايام قال أن صباع الحرارة مش موجود وهيكلم التوكيل يجيبه منه ...!
أنا طيب بعد اذنكم شيلوا البطارية من القواشيط عشان ماتتلفش ..
هو : حاضر .. ماتقلقش ..

وأستمر الوضع هكذا أربعون يوم ..
وأرسلت لهم السائق ..
لاحظ المهندس بفراسته أن سيارة السئق تتبع جهة ....
هو : أنت شغال في ...
السائق : أيوة ........
هو : أحنا عندنا توكيل تاتي للجيب والي بي أم لو عرفت تجيب العربيات بتاعة الجهة هنا .. هتكون مصلحة كويسة ..
السائق : ان شاء الله .. بس العربية بتاعة ال ..... دي عربيته الخاصة .. وبقالها شهرين ..
هو : هنخلصها .. وخد تليفوني وأي خدمة ..

وبعد حوار السائق أضررت بعدم أرساله هناك مرة أخري وذهبت بنفسي .. أرجوكم انا عايز العربية دلوقتي .. استني أسبوع ونجيب صباع الحرارة ..
أنا : لأ دلوقتي ... وصممت علي الدخول للورشة وشاهدت السيارة عليها طن تراب .. ثم لاحظت خبطة في أكرة الباب ,, ثم قاموا بشحن البطارية ..
أنا : هو مش أنا قلت شيلوا البطارية من القواشيط ..
هو : ماحصلش ..
أنا : يعني أنا كذاب ..
هو : البطارية مش هيحصلها حاجة أنا بركن عربيتي بالثلاث شهور والبطارية عادي بتشتغل ...
أنا : حالة الموتور سيئة ..
هو : بالعكس أحنا كشفنا عليه
أنا : مش أنت قلت ماينفعش تكشف غير وهي دايرة
هو : ساعات بينفع ننكشف من غير ماتدور
وبعد أحساسي بالقرف .. تركتهم وأنصرفت ..
هو : سوف نرسل لك السيارة للجراج ..
أنا : شكرا ..
وبعد ساعتين
هم : الو .. أحنا ودينا العربية جراج حضرتك ..
أنا : طيب العربية شغالة ..
هم : مش عارف يافندم ..
أنا : يعني أنت وديت العربية مش عارف وديتها زق ولا دورتها ..
هم : طيب هتصل بيك تاني ..
بعد خمس دقائق
هم : الو أيوة يافندم .. العربية شغالة وكله تمام .. وسبنا المفتاح مع البواب ..
وبعد يوم .. أرسلت صديقي الشاب ..

الشاب : ايوة أنا جيت .. العربية مابتدورش .. جبت كهربائي .. قال البطارية باظت .. والعمة مفكوكة ومفيش مسامير ..

وتستمر الأحداث مع مركز راشد ....

عذرا للأطالة والرغي لكن هذا ماحدث بحذافيره ..
وأدعوا الكرام أعضاء المنتدي لترشيح حد محترم في صقر قريش لتركيب صباع الحرارة ...

**melouk1** · 12-10-2015 08:36 PM

من الحرامية المشهورين في مصر .. كنا بنتعامل معاهم من ٢٠١٠ ل ٢٠١٢ و سرقة رهيبة لشركتنا
و عربياتنا الخاصة

**noon** · 12-10-2015 09:10 PM

شكرا لبعض الأشخاص اللذين يعرفوني شخصيا وأتصلوا بي للحديث حول هذا الأمر .. ويبدوا أن سمعة المكان مش ولابد .. لكن الغريبة الكلام المعسول جدا من المهندس الذي ذكر البعض أنه أبن صاحب المكان شخصيا .. لكن الأهمال كان رهيب ويؤسفني أن أقول الكذب .. فالجملة يتبعها جملة تنفيها وهكذا ... وبمنتهي البساطة يتعاملون وكأن الكذب عقيدة .. وشكرا لك أخي الكريم لردك ..

**Ayman amoun** · 22-10-2015 08:45 PM

[QUOTE=noon;3876019940]شكرا لبعض الأشخاص اللذين يعرفوني شخصيا وأتصلوا بي للحديث حول هذا الأمر .. ويبدوا أن سمعة المكان مش ولابد .. لكن الغريبة الكلام المعسول جدا من المهندس الذي ذكر البعض أنه أبن صاحب المكان شخصيا .. لكن الأهمال كان رهيب ويؤسفني أن أقول الكذب .. فالجملة يتبعها جملة تنفيها وهكذا ... وبمنتهي البساطة يتعاملون وكأن الكذب عقيدة .. وشكرا لك أخي الكريم لردك .

و الله يا استاذ / انا تعمله معاة و الحمد لله محصلش معيا حاجه بس اللا جضرتك بتحكى فيه دة كرسه

و حقك متسيبوش

فى مركز على الدائرى اسمه fixit مدير المركز محترم
على الدائرى خلف بنزينه وطنيه امام كارفور بس الناحيه التانيه

شكرا