عايز اشترى شالية فى راس سدر مساحة صغيرة بسعر معقول

محتاج رايكم عايز اشترى شالية فى راس سدر فى قرى كتير فمحتاج رايكم ايهما افضل ، انا بدور على شالية مساحة صغيرة و سعر معقول بالتقسيط مش كاش

والله وأنا بفكر زيك :) فى انتظار الخبراء

رد احد الاعضاء في موضوع مشابه

بصراحة موسوعة

ربنا يجازيه خير الاخ: mfe

اقتباس:

---

المشاركة الأصلية كتبت بواسطة mfe

ماشى ياباشا نبدا بقرى المستوى الاول
القرى دى من اجمل القرى فى مصر بجد هتستمتع فيها بس هى غالية حبيتين
اولها بردايس راس سدر و هى اجمل القرى فى راس سدر و الى عمل القرية دى مصريين من اصل ارمنى محافظين على كل حاجة فيها و ملحق بها فندق طبعا هى استيل جدا كانك خارج مصر. بس هى غالية شوية بس نجوم المجتمع هتلاقيهم هناك مفيش فيها تهريج. و لا حد ممكن يخالف قواعد القرية و بيختاروا الناس الى بتشترى عندهم كويس علشان كده عمرهم م بيعملوا اعلانات طبعا الوضع ده منعكس على السعر الشاليه سادس صف من البحر يعمل حوالى ٦٥٠ الى ٧٠٠ الف و يمكن اكتر. اخر معلوماتى انهم فاتحين باب الحجز لمرحلة جديدة يمكن خلصت و يمكن لا ملحوظة اقل شاليه ١٢٥ متر متشطب
تانى القرى هى هاسيندا. قرية هايلة فيها كل الى نفسك فيه على الطراز الاسبانى بس برضع سعرها غالى زى براديس
قرى المستوى الثانى
قرى رائعة ايضا و لكن اقل قليلا فى المستوى من براديس و هاسيندا
طبعا اولهم موسى كوست بس غالية جدا
اميرة سدر و فيها فندق الباتروس معرفش ان كانوا بيبيعوا و لا لسة
ريفيرا سدر و دى اسعارها فى حدود ٤٠٠٠ المتر بس بتشوف البحر من كل شاليه فى القرية القرية على شكل w
هوليداى فانتازيا قرية جميلة و الشاليهات تتراوح بين ٣٥٠٠ و ٥٠٠٠ المتر
جولدن بيتش ١ برضه اعتقد انها خلصت و متوسط السعر فيها ٤٠٠٠ المتر
لابلايا سدر اخر قرى راس سدر بالقرب من حمام فرعون الاسعار من ٣٠٠٠ الى ٥٠٠٠ النتر
قرى المستوى الثالث
قرى قد تكون جيدة و لكن الخدمات قيها محدودة او المستوى فيها مش عالى قوى
مارينا سدر
جولدن بيتش ٢ حلوة بس الشاطئ فيها سئ
بالم بيتش بتاعة المخابرات
بلو لاجون و دى ممكن تلاقى فيها باسعار مناسبة جدا لغاية ٣٠٠ الف جنيه شاليه كويس جدا و القرية حلوة مش سيئة
بلو باى القرية موقعها حلو و لكن المرافق سيئة و اسعارها رخيصة
الحياه مش بطالة بس المساحات الفعلية غير المكتوبة فى العقد خالص
القرية الهولندية ممكن تلقط شالية بسعر كويس و القرية مش بطالة
المستوى الرابع
تكره نفسك و اليوم الى حد قالك تشترى فى راس سدر
و هى على االاخص
كوين بيتش
فرجينيا
بنت السلطان
مسلة بيتش
بنانا بيتش
االباقى كله نصابين و على الاخص
غادة سدر بقالها ١٠ سنين تحت الانشاء
وايت ويف شرحه
يارا كوين ١٣ سنة تحت الانشاء بتبيع و تستثمر الفلوس و بعد ٣ سنين ترجعها و هكذا
مينا بيتش ٣ سنوت اعلانات و لسة مفيش حجر واحد و بتبيع دلوقتى فى المرحلة الثانية
بورسالينو ٧ سنوات تحت الانشاء
اوليمبيا ريسورت ٦ سنوات تحت الانشاء
نيجى بقى لنصيحتى الشخصية
السعر مقابل القيمة
لابلايا ممكن تشترى شاليه ٧٠ متر فى حدود ٢٠٠ الف القرية قائمة بالفعل و جميلة جدا و لكن هى ابعد قرى راس سدر
بلو لاجون ممكن تشترى شاليه ٤٠ متر فى حدود ١٥٠ الف قرية معقولة جدا مش وحشة و موقعها ممتاز وسط راس سدر
و اى سؤال تانى انا فى الخدمة
ملحوظة اذا انشا مطار راس سدر لن ترى هذه الاسعار تانى بس بقالنا ٦ سنين بنسمع على
المطار و على مشروع المارينا. الى هيخده ساوير س

---

شوف حضرتك قريه موسى كوست .............. افضلهم وفيها مراحل على التسليم وحجز وممتازه وغير نصابين ...... قريه محترمه جدا وفيه بالقسط ايضا .... تحياتى .

شكرا

امبارح كان فى اعلان فى الاهرام فى الصفحة الاولى على فيلا ب 179 الف وبالتفسيط
واكيد لو فى شاليهات حتبقى ارخص
لكن اللى اعرفه فى المنطقة دى انك لازم تتاكد من وجود شاطئ رملى مش زلط
والحاجة التانية ان القرية تكون بالعرض مش بالطول
لان يقال ان هناك قرى طولية على البحر وبالتالى ممكن الشاليهات تكون بعيدة جدا جدا عن البحر

طالما الموضوع بيتكلم عن القرى و المنتجعات فى راس سدر علشان تعم الفائدة كنت عايز اعرف حد يعرف حاجة عن ياسمينا بيتش ريزورت راس سدر خليج مطارمة ؟
و الاقتباس اللى كان من الموسوعة الخاصة براس سدر mfe كان من انهى موضوع لعلنا نعرف نسأله عن ياسمينا بيتش و كمان لما لفيت فى النت طلع ان فى ناس بتبيع باسم شركات لكنهم مش تبعهم و نصابين فالواحد على كده يعرف ازاى ان اللى بيبيع مش نصاب و انه تبع شركة فعلا ؟؟!

أنصحك أخي بالشراء في قرية ياسمينا بيتش راس سدر حيث أن القرية لها مستقبل واعد و لا توجد مشاكل بها و أنا عميل متعاقد بالقريه و ذهبت للموقع و عاينته بنفسي و تابعت أعمال الإنشاءات التي تحدث بها و انصحك و انصح كل من يريد شراء شاليه براس سدر بالشراء في ياسمينا بيتش ريزورت , أقر أسعار شاليهات بقرية ياسمينا بيتش راس سدر

ربنا يوفق الجميع ................

انا كمان فكرت فى راس سدر و كلمنى واحد من ياسمينا بيتش بس شفت الخبر ده قلقنى
مشترو شاليهات وفيلات "ياسمينا بيتش "يستغيثون بالقضاء لتأكيد صحة عقود البيع - بوابة الأهرام
لو حد عندة اخبار تانيه يقول

رأيي ان قرية ياسمينا بيتش راس سدر هي الأفضل من حيث الأسعار و خاصة ان شاطئها رملي و بحرها منعدم المد و الجزر
تتميز القريه ان مستقبلها واعد خاصة ان مطار راس سدر بعدها 5كم و مميزاتها تتفوق بها عن القرى الأخرى من حيث الموقع و تصميم الشاليهات

انا عاوز اشتري في راس سدر
وفكرت اشتري في موسى كوست وجدت الاستلام الفوري لشالية حوالي 120 متر يتخطى المليون جنية ، وده غير اشتراك النظافة حوالي 100 الف جنية وكمان غير اشتراك النادي حوالي 100 الف جنية ايضاً
وودجدت قرية اسمها بلو لاجون شالية 115 متر مع حديقة حوالي 40 متر سعرها تقسيط حوالي 500 الف جنية ولكني وجدتها قرية شعبية جدا بتفكرني بمساكن العشوائيات
انا عاوز اشتري في راس سدر علشان انا ساكن في مدينة القاهرة فالوقت لن يتخطى ساعتان ونصف فقط
وده غير ما اروح لمرسى مطروح فالوقت حوالي 6 ساعات وزيادة وده بعد فتح الطريق الجديد الي اسمه الفوكا
منتظر آراء الاصدقاء المحترمين