الموضوع: طلب نصيحة عن فلوانس ٢٠١٥ e3

شكرا لحضراتكم
بس لو ت سمحولي بس عندي سؤال
انا شايف موديلات عربياتكم مش فلوينس. ج بتوها و لا سماع و لا العربية عندكم؟

المشاركة الأصلية كتبت بواسطة aratux

شكرا لحضراتكم
بس لو ت سمحولي بس عندي سؤال
انا شايف موديلات عربياتكم مش فلوينس. ج بتوها و لا سماع و لا العربية عندكم؟

انا حجزت ولسه هستلم ادعيلى
والفلوانس مع واحد صاحبى وبسوقها وسافرت مره بيها
وعموما اكيد حد من مالكى الفلوانس هيرد بس ادخل ع اللينك الى كتبه الدكتور
هتلاقى جواه كل حاجه

المشاركة الأصلية كتبت بواسطة aratux

شكرا لحضراتكم
بس لو ت سمحولي بس عندي سؤال
انا شايف موديلات عربياتكم مش فلوينس. ج بتوها و لا سماع و لا العربية عندكم؟

بص ياباشا هقولك
اولا انا باعتلك لينك المشاركه اللي اخونا تامر مجمع فيه كل حاجه عن الفلوانس وقلتلك اني استفدت منه كتير وده كان اول حاجه حطيتها وبعد كده اتكلمت عن وجهة نظري بناء على الحاجات ده:

-الاعتماديه رائعه خصوصا في الفيس ليفت مع الموتور والفيتيس والتكيف الياباني ومافيش اي مشاكل عن الاعطال اللي كنا بنسمعها عن الميجان والصيانه عاديه زي قطع غيار الكوروللا والسيراتو او ارخص شويه وتوكيل رينو من افضل التوكيلات في مصر

طبعا الاعتماديه واضحه بشكل كبير في كلام كل الملاك عن الموتور والفيتيس بالتحديد وخصوصا اني جربت الفيتيس ال cvt في اللانسر البومه ومن اشد الناس اقتناعا بيه رغم انه مش extronic وكان لسه اول فئه من الفيتيس ده ومع كده انا عجبني جدا لاني بحب الاحساس الهادي للحركه دون الشعور بالنقلات
وطبعا بما اني من ملاك الميجان واخويا معاه لوجان 2013 وكل الفلوانس قبل الفيس ليفت كلها عربيات مشهوره بالنتشه بين الغيار الاول والتاني فانا واثق ان ال cvt هو الحل
رأيي عن توكيل رينو طبعا عن تجربه عشان انا اللي بعمل صينة اللوجان والميجان وعارف
بخصوص اسعار قطع الغيار هتلاقيها في المنتدى وممكن تقارن

-الناس بتحزرك منها اعتمادا على التاريخ زي مانت قلت محدش من الناس ده كلف خاطره يقرى عن الغربيه ومحدش فيهم يعرف انها بموتور وفيتيس cvt من نيسان

انا سمعت كل الكلام ده وانا بجيب الميجان واخويا سمعه مع اللوجان وهي لبانه واحده في بق الناس اول ماتسمع كلمة رينو او بيجو والحقيقه كانت غير كده انا جبت قطع غيار كتير للميجان وكان قبلها معايا فيرنا ولك ان تتخيل الفرق المهول بين الاتنين ومع كده محستش ان قطع الغيار مبالغ في اسعارها ولا حاجه وحسيت اني راكب عربيه عادي زي كل الناس عارف اتعامل معاها واصلحها فين مش شاري مكوك فضائي ولا حاجه

-الثبات حدث ولا حرج محدش قال نص كلمه عليه مع ميزة ان العربيه عاليه ومش بتحك في اي مطب خالص

هو فعلا محدش قال نص كلمه عليه واذا كانت الميجان تحفه في الثبات لدرجة اني بحسها ملزوقه في الاسفلت فما بالك بالتطور الطبيعي للحاجه الساقعه
وعلى فكره الميجان برضه عاليه جدا ومش بتحك خالص وده مالوش اي دور نهائي في ان العربيه تعوم منك حتى لو عدى من جنبك لوري بمقطوره بمعنى الكلمه على 160 وممكن تسند الدركسيون بصباعك وتاكل سانداوتش وحاجه ساقعه :))

-غالبا المقارنة بتكون مع الكوروللا والسيراتو والاسترا والسيفيك

عن رأيي الكوروللا انسب عربيه للمقارنه وهتلاقي في قسم المقارنات مواضيع عنهما ورغم انحياز البعض لده او لده فانا شايف ان الفلوانس رائعه والكوروللا مش محتاجه حد يدافع عنها لانها عارفه قيمة نفسها رغم عن انف الجميع وفي الاخر اي اختيار منهم هيكون موفق ولك حرية الاختيار

اما السيفيك فهي مش بتدخل في المقارنات كتير لكن لو ناوي على فلوانس هاي لاين وقربت من 200 الف يبقى لازم تشوف السيفيك لانها هتكسب مع التحفظ على الشكل الخارجي اللي مش عاجبني
اما السيراتو فانا قريت عنها والصراحه عجبتني برضه ومافيهاش حاجه ناقصه بس انا شخصيا مش هسيب الياباني والفرنساوي عشان كوري

اما الاسترا فانا مش عارف ايه اللي جابها في المقارنات (بتفكرني برستم بيه السلحدار انت ايه اللي جابك هنا ياد :)) وعشان الناس ماتزعلش انا مش بعيب في العربيه انا متأكد انها تحفه بس الاوبل عربيه مش منتشره وسعرها في البيع بينزل اوي وليه احط نفسي في الوضع ده مع وجود بدائل بس هي طبعا ليها عشاقها

المقارنات ده قائمه على اللف والتدوير لاني فعلا عاوز اجيب فلوانس بس السيفيك والكوروللا طلعولي في البخت فبقالي اسابيع بنخرب واللي كتبته ده كان خلاصة ماوصلت اليه

-سعر اعادة البيع كويس جدا رغم ان معظم اليع على الشكل القديم بس انا شايفها ماسكه سعر كويس زي المنافسين وادخل كونتاكت كار هتشوف بنفسك

كنت بفكر اشوف حاجه كسر زيرو لقيت الاسعار مش رخيصه فقررت اخليني في الزيرو وعلى فكره الميجان رغم كل القلق اللي بيدور حولها عربيه بياعه واعلان على النت كافي انك تزهق من الرد على التلفون مش زي ما الناس فاكره

اكيد انت زهقت من الرغي بس يللا انزل هات العربيه عشان نباركلك