الموضوع: اتنصب عليا في شقه .. لله الأمر

اصدقائي في نايل موتورز ارجو ان اجد من ينصحني ويوجهني في مصيبتي

واتمنى ان ماحدش يتحط في موقف زي اللي انا فيه لان البلد مليانه نصابين ولازم تبذل اقصى مافي وسعك لتتجنب الغش والنصب

إليكم التفاصيل

اشتريت من سنة شقه في احدى المدن الجديدة في منطقه جديده العمران فيها محدود .. والعماره كان فيها شقه واحده ساكنه .. كنت بنزل ادور واتفرج بنفسي مش عن طريق اعلان ولا سمسار
لقيت المنطقه ان شاء الله لها مستقبل كويس والعماره على الفنش النهائي والشقه مناسبه لامكانياتي

توكلت على الله وقابلت صاحب العماره وكان يبدو انه راجل محترم واتفقنا على التفاصيل ودفعت فلوسي كاش عند توقيع العقد وعملت توكيل بيع وشرا

هو الارض شاريها من صحابها بتوكيل .. واتفقنا انه هيخلص تشطيب العماره خلال شهرين ( الكلام ده من سنه وشهرين ) وهيدخل الكهربا والعداد .. العماره كان فيها عداد تجاري والشقه الساكنه كانت واخده منه كهربا مؤقتا لحين تسليم العماره للجهاز وادخال العدادات

وجبت محامي اتطلع على العقد وتراخيص البناء وسألنا في جهاز المدينه وقال كله تمام

عدا الشهرين ومفيش اي مسمار زياده اتحط في العماره وكلمت صاحبها كذا مره وكان بيسوف ويقول اي حجج والشهر يجر شهر

لغاية لما الشقق كلها اتباعت واجتمعت بالملاك واتحركنا عن طريق المعارف عشان نعرف ايه سبب التأخير

وهنا كانت المفاجأة ان الباشا صاحب العماره عليه مخالفات في الجراج وكل البلكونات وده سبب رفض الجهاز لاستلام العماره حتى تتم إزالة المخالفات

وفي هذه الأثناء جمعنا فلوس من بعض عشان نشطب السلم والمدخل ونشيل الرطش امام العماره ونشجر وكل ده على حسابنا

وبعد مفاوضات مع الجهاز وصلنا الى انه ممكن ندفع ٤٠٠ الف جنيه غرامه .. وعمل تصالح مع الجار الخلفي والجار الجانبي بخصوص البلكونات المخالفه

اجتمعنا بصاحب العماره وأبدى استعداده لدفع الغرامه وده كان مفاجئه لينا لأنه جشع وبيموت عالقرش .. لكنه قال المهم تاخدو موافقة الجيران

الجار الخلفي كان محترم ربنا يكرمه وتنازل

الجار الجانبي بقى طلع .... بلاش اغلط في حد .... رفض تماما التصالح واشترط ازالة البلكونات او دفع مبلغ ١٠٠ الف جنيه عشان يتنازل .. للعلم دي بلكونه صغيره طولها متر وكلنا مقفلينها الوميتال .. يعني مش جرحاه في حاجه .. وهناك فيه مسافات محترمه بين العمارات .. هو حقه انه يرفض التصالح ولكن من فرج عن مؤمن كربه .. والعفو عند المقدره .. وهو كده بيبتزنا

صاحب العماره رفض تماما يدفع اي جنيه لهذا الجار

وفي نفس الوقت احنا ٣ شقق وماعندناش مقدره لدفع هذا المبلغ .. وبقيت السكان بدؤوا يشخصنو المشكله وانها بقت مشكلتنا ولازم نمشي حالنا ونزيل البلكونات عشان المصلحه العامه

انا ماعنديش اي استعداد اني اضحي بطوبه في شقتي دافع تمنها دم وشقى .. ومكلف تشطيب والوميتال وخلافه

ارجو ممن يملك الخبره وخاصة في المدن الجديده انه ينصحني اعمل ايه

وازاي اجبر صاحب العماره انه يدفع هذا المبلغ

ولو تنصل اصلا من المسؤوليه ومادفعش. ال ٤٠٠ الف نعمل معاه ايه ؟؟؟

هو واحد جشع عمل مخالفات تزودله مساحه يكسب من وراها فلوس واحنا سالنا في الجهاز ودفعنا .. وكان بيتهيألو انه هيمشيها بالفهلوه بتاعته والتسيب اللي كان في الفتره الماضيه في البلد

والمشكله ان الجهاز مش بيعاين العقار غير وقت تسليمه ومش بيقربله وقت البناء .. يعني أي زبون ممكن يلبس الا لو جاب مهندس معماري بقى يطابق المبني بالرسم !!

والعماره كل سكانها ناس محترمين ورتب جيش وشرطه وكأنه بينقي زباينه عشان ماحدش يبلطج عليه

ودلوقتي حالنا واقف مش عارفين ندخل كهربا ونسكن
وحسبي الله ونعم الوكيل