اتنصب عليا يا رجالة ..

**amr_bekhit** · 12-12-2011 05:16 PM

السلام عليكم و رحمة الله

انا و الحمد لله على كل حال يبدو انى اتنصب عليا يا رجالة
السؤال : هل يمكن ان الميكانيكي يكون عندوه انعدام للضمير و يبدل البطارية بأخرى ؟
الواقعة : روحت لميكانيكي علشان يغير قواعد الماتور علشان بيقول كانت متهالكة ( مش عارف ازاى مع ان العربية عاملة فقط 23000 كيلو موديل 2009 )
المهم غيرها و بعدين تاني يوم وجدت بطارية شكلها مريب و لونها أحمر و ليس لبنى مائل للزرقة
كما تعودت دائما على منظر العربية لأنى بملا قربة المياه و براجع المياه فى الرادياتير دوما.

روحتلوه و كنا هنشد مع بعض لكن الناس قالوا البطارية ليها ضمان و شوف رقمها و ابقى تعالى اتهم الراجل بعدها !! كلام منطقى صح

رجعت وجدت فقط كتيب الضمان به أرقام الماتور و الشاسية و بعض التدوينات
و وجدت ان البطارية دي مكان المفكات معلم فيها و شكلها كفرانة كما تشاهدون فى الصور المرفقة ؟

السؤال: ما هو نوع البطارية التى تأتي مع السيارة الماروتي ؟ و ارجو من الأعضاء الكرام الإجابة على هذا السؤال
النوع اللى راكب عندي دلوقتى اسمه ( EXIDE ) حتى دخلت اشوف اسم الماركة ده لقيت العلامات التجارية بتاعتوه على النت مختلف خالص عن اللى ملزوق على جنب البطارية

و كمان مش شايف رقم للبطارية أساسا
اتصلت بمودرن اللى هو توكيل السوزوكي قالوللى السيارة لما تتباع يطلع معها 2 ضمان واحد للسيارة و واحد للبطارية !!
بصراحة الكلام ده مش واكل معايا ( it doesn't make sense )

كلمت خدمة العملاء فى مودرن زي ما قولتلكوا و قولت للاوبيرتور اللى بيكلمنى فى اى حاجة فى نظامكوا بتاع الكمبيوتر بيقول ان السيارة اللى رقم شاسيها كذا و متورها كذا يكون راكب فيها بطارية ررقم كذا ؟ قالى لأه

بصراحة اتفقعت .. علشان انا اشتغلت فى برمجيات كتيرة و منها لوكلاء سيارات و فيها تفصيلات فى قمة السخافة ..
قولت مش مشكلة انا اروح النيابة لمعارفنا و هناك يعملوا جواب للمودرن ديه مطلوب فيها رقم البطارية بتاعت السيارة ام رقم شاسيه كذا و موتور كذا

اترككم مع الصور المرفقة و انتظر تعليقاتكم

**ahmedsrs** · 12-12-2011 05:29 PM

الموضوع منتهى ياباشا انت بطاريتك لبنى ودى لونها احمر يبقى انت الصح الباش ميكانيكى شكله نصاب انت تاخد كام واحد من صحابك الجامدين وتروح تعمله مشكلة وتعلى صوتك وياريت تلبسه كمان قضية قله العربية كان فيها موبايل وفلوس

**Ahmed_Rahem** · 12-12-2011 05:40 PM

الحل بسيط، شيل الحديدة الى ماسكة البطارية بالعربية، لو مفيش مترحها تراب يبقى دى بتاعت العربية لو فية يبقى متركبة قريب.

واحسن حاجة تفضل واقف جنب عربيتك وهى بتتصلح، خصوصاً لو انت مش خبرة فى الميكانيكا.

**amr_bekhit** · 12-12-2011 10:17 PM

المشاركة الأصلية كتبت بواسطة ahmed_rahem

الحل بسيط، شيل الحديدة الى ماسكة البطارية بالعربية، لو مفيش مترحها تراب يبقى دى بتاعت العربية لو فية يبقى متركبة قريب.

حصل و هو عمل كده على اساس تبقى مطبعة و كانت مطبعة فعلا لكن ده مردود عليه و السبب بسيط ان الحديدة اللى ماسكة البطارية هى واحدة فى كل الموديلات بتاعت الماروتي 800 و البطارية الحمرا دي بتاعت ماروتي برضوه او من نفس الفيه بتاعتها علشان دي بطارية بحديدة كهربا رفيعة مختلفة عن باقى العربيات

المشاركة الأصلية كتبت بواسطة ahmed_rahem

واحسن حاجة تفضل واقف جنب عربيتك وهى بتتصلح، خصوصاً لو انت مش خبرة فى الميكانيكا.

حصل يا باشا لكن وقت الصلاة بس هو اللى العربية اتسابت فيه

بس انا وجدت امر غريب وجدت الإستيكر الأخضر اللى عليها انها متعبية فى 1997/08 كما باين من الصورة المرفقة

ده دليل انها بطارية تنتمي لألفية تانية خالص

**karimfahmy99** · 13-12-2011 05:14 AM

هل باين على الصواميل انها اضرب فيها مفتاح ؟؟ صواميل الماسك و الاتاشاط - عموما عندى جار عندة ماروتى هبقى ابص اشوف نوعها و لونها

**morsi** · 13-12-2011 06:05 AM

المشاركة الأصلية كتبت بواسطة amr_bekhit

يا سيدي ان كل ما هنالك انا عارف بطاريتي لونها لبنى مائل للأزرق و مش عايز غيرها
و موضوع الفولس و الموبايل ده يبقى افترا انا عندي عيال و حبش حد يفترى عليا و زمن الشقاوة خلص خلاص.
انا هروح بكرة ان شاء الله على مودرن و احاول اشوف بيانات البطارية و لو عصلجوا كما اتوقع
هخلى وكيل النيابة يطلبها رسمي ان شاء الله
اكيد البطارية اللى كانت راكبة فى العربية و جاية من الهند بيها متسجلة عليها فى مكان ما فى الشركة. دي بطارية مش باكو بسكويت
اعلموك بالتطورات

رأييى الشخصى كبر دماغك وأستعوض ربنا وماتضيعش وقتك اكتر من كدا فى موضوع البطارية ده لأن حضرتك اتنصب عليك وخلاص وصعب جدا تثبت اللى حصل وحتى لو مودرن اعطاك رقم البطارية سواء بالنيابة أو بالتراضى ازاى هاتثبت ان الميكانيكى هو اللى سرقها؟ساعتها هايقول ان العربية بتاعتك جايه له بالبطارية الحمرا وان انت بتتبلى عليه ومش هاتعرف تاخد منه حق ولا باطل.حضرتك انس الموضوع ده خالص وعيش حياتك وأخرج من الموضوع ده بدرس انك ماتسيبش عربيتك تتصلح الا قدام عينك .

**ehab_11_22** · 13-12-2011 10:45 AM

اللى أعرفو أن البطارية الى بتيجى مع الماروتى بطارية جافة ac delco

اللى أنا شايفوو أن البطارية مش جافة وشكلها غريب

من الاخر أحتسب الى الله ولو هاتعرف تاخد حقك من غير ماتدخل نفسك فى مشاكل جامدة يبقى خير

الموضوع هايطور لأنكو تمسكو فى بعض لا ياعم مشى حالك بدى

أنا أتسرق منى قبل كدا جوز كبالن أمامى وأتصلت بالميكانيكى حلفلى بأيمانات الله كلها أن مستحيل يحصل كدا فى ورشتو بس هاعمل أية أروح أضربو طب أستفدت أية ولا حاجة

الله يكون فى عونك وبعد كدا تشوف ميكانيكى محترم حتى لو غالى

**amr_bekhit** · 13-12-2011 01:50 PM

المشاركة الأصلية كتبت بواسطة karimfahmy99

هل باين على الصواميل انها اضرب فيها مفتاح ؟؟ صواميل الماسك و الاتاشاط - عموما عندى جار عندة ماروتى هبقى ابص اشوف نوعها و لونها

و الله الصورة امامك هتجد ان عدد الفك اشتغلت فيها لما هرتها .. اضغط على الصورة للتكبير
و اشكرك للإهتمام بالسؤال

**amr_bekhit** · 13-12-2011 02:01 PM

المشاركة الأصلية كتبت بواسطة morsi

وصعب جدا تثبت اللى حصل وحتى لو مودرن اعطاك رقم البطارية سواء بالنيابة أو بالتراضى ازاى هاتثبت ان الميكانيكى هو اللى سرقها؟ساعتها هايقول ان العربية بتاعتك جايه له بالبطارية الحمرا وان انت بتتبلى عليه ومش هاتعرف تاخد منه حق ولا باطل.

يمكن عندك حق بس اللى غايظنى و انا عندوه جاب كذا ميكانيكي و بتاع الكهرباء و الانذار و كلهم يقولوا دي بطاريتك و كان لونها احمر مش ازرق ، و قولتلوه هوديك النيابة كشوا فى الأول و بعدين قاعد يشتم شتايم مش كويسة خالص فى الحكومة على اساس ان النيابة مش هماه فى حاجة ، قدام الجمهرة اللى كانت واقفة ساعتها ، وكيل النيابة قالى حتى لو مش هنثبت عليه البطارية اقل واجب يشيل قضية " النيل من هيبة الدولة و مؤسساتها " و ونجيب كل اللى واقفين و هتلاقى عليهم احكام يا هربنين من الجيش و هيترفعوا كده او كده .. كل ده طبعا هايل بس كل اللى انا عايزوه البطارية بتاعتى علشان لما اجى ابيعها اقول للراجل اللى يشتريها دي بطاريتها الحقيقية سواء وحشة او حلوة ..

بصراحة شارع الميكانيكية اللى فى العرب جنب شريط القطار عند القرية الأولمبية تجاربى معاهم سيئة جدا .. واحد كان هيخربلي الكاربراتير قبل كده و التاني حمار انذار و التالت نصب عليا فى البطارية .. بجد لا أنصح اى شخص يروح هناك