متعة السواقة فى المانيوال ولا الاوتوماتيك
فاكرين العبارة دى (متعة السواقة)
انا حاسس ان الجملة دى خلاص اندثرت واصبحت من المأثورات الشعبية . انا متعود اسوق المانيوال وبحس فعلا انى باسوق عربية . وبحس بمتعة السواقة . وكنت لما اسوق عربية حد من اصحابى اتوماتيك اخرها معايا ربع ساعة سواقة وبعدين باتخنق من سواقتها .
ومن 3 اسابيع جبت كروز 2014 اتوماتيك . هى والحمد لله عربية جميلة ومبسوط منها . بس اكتر حاجة مضايقانى هو موضوع الاوتوماتيك . انا عارف كل واحد وهو بيقرا الكلام دة بيقول اية عليا .هههههههههه
عشان انا باسمع الكلام دة من اصحابى . لما باقولهم انا مخنوق من الاوتوماتيك . من عينة انت فقرى وغيرة والكروز دى لو كانت مانيوال كانت حتبقى عربية رياضية 100% .
وانا باسوق الاوتوماتيك جاييلى احساس غريب . انى عندى 65 سنة وعندى تصلب شرايين .هههههههههه
مش عارف لية . واشمعنى 65 برضة مش عارف .
حاسس انى راكب عربية اتارى .
واللى غاظنى اكتر ان عمرو اديب فى البرنامج بتاعة كان بيتكلم عن الحاجات اللى اندثرت وكان بيقول زمان كان فية عربيات اسمها مانيوال فيها دبرياج وتقعد تنقل الغيارات بأيدك .
كأن المانيوال دة تخلف عن الحضارة .
بصراحة مابقتش عارف انا انسان طبيعى . ولا . المفروض اروح عند دكتور نفسانى يعالجنى .