حل مشكلتي المريرة مع النوبيرا
ازيكو يا جماعة كل سنة و انتو طيبين و كل سنة و المنتدي الجميل ده بخير .. انا كان عندي مشكلة في النوبيرا شرحتها بالتفصيل في الموضوع ده http://www.nilemotors.net/Nile/440112-a.html
خلاصة المشكلة ان العربية بتنتش و الاقيها ساعات بتبطل و هي بين السرعات 40 الي 60 و في الزحمة و تقطيع علي السرعات البطيئة و خنقة و اكل بنزين و تاخير في الدوارة و هي سخنة و سحب ضعيف
روحت لكذا ميكانيكي و غيرت الاتي
بوجيهات و سلوك بوجيهات
رشاشات اوبترا
بوابة كرهباء اوبتر ( العربية نوبيرا 1500 سي سي كوري اتوماتيك كهرباء)
حساس مانيفولد maf
حساس شكمان
فلتر هواء و زيت و بنزين و تغير زيت
بطارية جديدة
علبة بيئة استيراد
علبة خلفية جديدة
بعد كل ده حوالي 2500 جنية و العربية زي ماهي
و غيرت اكتر من عشر ميكانيكة و كشفت اربع مرات بالكومبيوتر و المشكلة زي ما هي
بعد هذا كله روحت لاخر ميكانيكي .. فحص العربية قالي فاضل حاجتين انت مغيرتهمش و هما الموبينة و طرمبة البنزين
طلع الطرمبة لقيناها اولا قلبها صيني و ثانيا متعدلة مش بتاعت العربية
تقريبا بتاعت لانوس
قالي غيرها و بالفعل غيرتها بواحدة استيراد ب 230 جنيه( طبعا مجبتش جديدة لاني مش متاكد انه ده السبب)
و جربنا لاقينا العربية اتحسنت طبعا لاكن المشكلة الخنقة و التقطيع زي ماهي .. التقطيع علي السرعات cruising speed يعني و انتي ماشي علي اخر التاني او اول التالت و عاوز تثبت السرعة علي كده يعني الدوسة مستمرة في نفس القوة و السرعة من 40 الي 60
رجعنا تاني و جربنا الموبينة لاقينا العربية زي ماهي برضو
الميكانيكي غلب حمارو و قالي معرفش و ده مستحيل ان ميكانيكي يقول معرفش
احترمتو و المهم قعدنا انا و الميكانيكي نجرب في العربية و جربنا نظرية trial and error التجربة و الخطأ
بدل الفتي و التغير العمياني .. المشكلة ان الكومبيوتر مش قاري اي اعطال او اكواد و
ده الي مخليني اقعد اغير و اجرب لاني مش عارف العيب فين مظبط
المهم قعد يفصل حساس حساس و يجرب فصل حساس الشكمان العربية زي ماهي .. حساس الماب العربية بطلت ركبه تاني.. غيرنا حساس درجة حرارة المياة .. بيسموه صباع الحرارة برضو زي ماهي
راجعنا علي التقسيمة برضو زي ماهي .. راجعنا علي تروس الكرنك برضو زي ماهي.. فصل خرطوم erg برضو زي ما هي
وفي النهاية لاقيتة فصل فيشه كده مش عارف اسمها لغاية دلوقتي هي راكبة في المانيفولد ناحية السواق .. لمبة التشيك نورت و لكن.......
لاقيت العربية فاااااااااااااااااااارت
بقت بي ام بالمعنة الحرفي للكلمة تسارع رهيب الخنقة راحت .. جربتها علي البطيء نعومية رهيبة و السرعات لاقيتها فايرة .. عاملة زي الحصان الهايج الي عاوز تمسك لجامة بعد ماكانت حمار حصاوي ..اقل دوسة العربية بتفرك و تطير كنت مش مصدق عنيا بعد المجهود ده كله اخيرا عرفنا السبب .. بس ايه هوا السبب اساسا .. ايه الفيشة دي و ايه الي بتوصلة و بعدين لمبة التشيك منورة .. هل اسيبها كده و لا اغير البتاع الي الفيشة موصلالاه ولا ايه مظبط ..لقيته بيقولي تمام كده قلتله اه بس هنسيب الفيشة كده مفكوكة
قالي بس اطلع علورشة و.. في الورشة سالته ايه البتاع ده قالي معرفش !!!!!!!!!!!!!!!!!!
المهم قالي نغيره .. قلتلة ماشي طبعا .. لاقيته فك حاجة كدا عاملة زي حساس الشكمان علي صغير و متوصلة بالفيشة و هي متركبة في المانيفولد من ناحية السواق ..بعد كده دورت عليها في النت معرفتش اسمها ايه
روحنا في ثانية جبنا واحدة زيها استيراد ب 70 جنيه و ركبناها .. لمبت التشيك طفت لكن ...
العربية رجعت زي الاول ..شيلناها العربية ظبطت و لكن لمبت التشيك نورت
روحنا لواد بتاع كومبيوتر ..قولناله علي المشكلة قالي بسيطة جدا بثقة ..
راح مبدل خرطومين كده مش عارف بتوع ايه و قالي جرب يا باشا ..قلتلة اركب
و جربنا ..لمبة التشيك منورة و البتاع ده متغير ..هوا كل الي عمله بدل مكان خرطومين راكبين في علبة كده في صدر العربية ..العلبة دي فيها تلات خراطيم متوصلين بيها من فوق ..شكل بعض يعني تتلخبط فيهم
جربت العربية لقيتها
تمااااااااااااااااااااااا اااام
اكني فاصل الفيشة بس الفيشة راكبة..قعدت اجرب و اجرب نص ساعة اجرب فيها في وسط البلد و الزحمة و طلعت علي طريق و جبت سرعة و كله تمام .. اكني راكب عربية تانية خالص
و بعد كده الصبح و انا بسخن العربية لاقيتها بتنقط ماية و مفيش ريحة خالص..بعد ما انت بتجيب ريحة بنزين ني من ورا و بتاكل بنزين و بعد المشاوير ..افتح الكبوت الاقيها سخنة عادي مش الصهد الي كان بيهب في وشي و الحمد لله كله بقي تمام
الحكاية كلها انو خرطومين متبدلين مكان بعض بوظو البتاع الي انا مش عارف اسمه لغاية دلوقتي
و اخيرا حبيت انقل تجربتي ليكو لعل احد الاعضاء عندو نفس المشكلة يستفاد منها
و شكرا لكل الاعضاء الي ردو عليا في مشاركتي السابفة و شكرااا