كان في شهر رمضان اللي فات واتصل بي واحد من المعرض وقاللي عندي عربية كسر زيرو لانسر شارك 2014 رحت بعد الإفطار قاللي استني معايا صاحب المعرض هاييجي بيها لغاية لما وصل الساعة تقريبا واحدة شفتها وعجبتني وروحت بيها يادوب قبل السحور وتاني يوم قلت اشيك عليها لقيت لمبة الايرباج والتشك انجن منورة والحزام مش شغال والكبوت مرحل شوية.. طبعاً رحت رميتهاله في المعرض قالي مش هاينفع نرجعها ودي حاجة بسيطة وعربية كانت مريحة عليها وهي واقفة.. ولو على اللمض المنورة اطفيها لك في التوكيل.. رحنا التوكيل والحمد لله المهندسين هناك كان ضميرهم صاحي وقالوا العربية كانت جاية على ونش وسيستم الايرباج عايز يتغير ب 30000 جنيه.. طبعاً فقد النطق.. المهم قالي هاتاخد حاجة غيرها وبعد مناهدة وخناق اخدت السيراتو أول فئة خليجي.. وطبعاً أنا كنت غلطان لأني كان المفروض قبل مااشتري افحص العربية واجيب تقرير من التوكيل بس بتاع المبيعات في المعرض كان عامل نفسه صاحبي وخلاني أثق فيه للأسف..