+1000000000
ما انصحش اى واحد خارج القاهره والجيزة يجيب العربيه دى
عشان مش هيلاقى اى حد بيفهم فيها غير تةكيلها اللى سمعته برده مش قد كده وملوش مراكز صيانه كتير
يعنى ملزم بمكان معين للصيانه
عرض للطباعة
انا على فكره بفكر زيك بالظبط ، وغير كده انا عاوز اشتري عربيه عاليه عشان اخليها معايا 10 سنين او اكتر واحافظ عليها ، ومتهيالي بعد الفتره دي كله بيتساوى في الخساره ، وبالنسبه لموضوع الصيانه وقطع الغيار ، انا اصلا اي عربيه زيرو هجيبها في الرينج ده ، مش هعمل فيها حاجه غير في توكيلها عشان تفضل زي ما هيه ، وغير كده بالنسبه عز العرب عامل خدمة اعطال للستروين وبي ام والحجات العاليه اللي عندو بحيث لو حصل معاك حاجه في منطقه بعيده بيبعتلك ونش ياخد العربيه من اي مكان ، ونا مش عاوز اكتر من كده ، وكمان اصلا معظم العربيات الجامدة هتلاقي انتشارها قليل نسبيا زي الجولف والليون وما شابه ، ولو فكرت في النقطه دي ، هتركب هيونداي او لانسر او ما شابه ، وشكرا على كده ،
ولا انتو ايه رأيكم في الكلام ده ؟
خلاص بقى ... توكل على الله وخلاص .. الف مبروووك
يا باشا ربنا يخليك ، وطبعا انا عارف اننا اخوات انا بس بهزر معاك ، وهيه فعلا العربية عجباني جدا لدرجة اني كنت اجلت قرار الشراء ، بس لما اهتميت بيها وقريت عنها عشان صاحبي اللي ناوي يشتريها ، عجبتني جدا وبدأت افكر جديا اني اشتريها ، بس تقدر تقول من كتر ماهي عجباني بطمن منكم من اختياري ، احسن تكون فيه حاجه غايبه عني او مش واخد بالي منها وانت عارف مراية الحب عاميه :) وانا فعلا بقيت منبهر بيها
أولا ألف شكر على الصور و المعلومات
بس ايه أخبار المازدا ... على فكرة حضرتك تنفع بياع جدا Sales Man يعني... لأن بصراحة أول ما حضرتك بتتكلم عن عربية بتدخل دماغي و اقعد اجيب عيوبها و مميزاتها و اقارنها باللي قبلها و ده نادر لما بيحصل... حضرتك بتتحمس للحاجة زيادة بس أحب أضيف لحضرتك حاجة:
1- السيتروين أسعار قطع غيارها غالية نار يمكن أغلى من البيجو كمان
2- سنتين ضمان مش فترة كبيرة و الله يجازيه عز العرب
3- الصيانة عند عز العرب حدث و لا حرج
يعني ده على السريع كده و مش هادخل في سعر اعادة البيع و خلافه على اعتبار ان حضرتك مش هتزهق من العربية خالص و مش هتحن New technologies اللي هتنزل في خلال الكام سنة اللي جايين
أولا : يا باشا ألف شكر على الكلام الجميل ده ،
ثانيا : بالنسبه لقطع الغيار هيه طبعا غاليه بس مش اغلى من البيجو زي ما انت فاكر ، وكمان هتلاقي معظم الجديد غالي ، يمكن بس البدائل التقليد اللي هيه بأسعار رخيصة مش متوفره ، بس ده في وجهة نظري مش عيب ، وده لأني عن نفسي افضل اجيب الأصلي الغالي لأنه هيحافظ على العربيه وكمان هيعيش اكتر بكتير فهتلاقيه في الأخر ارخص وده على الأخص في الأساسيات والميكانيك اكتر منه في الأكسسوار واللي هوه لو حاجه حصلت فيه هيتغير ببلاش تبع التأمين وحتى لو مش مامن بتبقى حجات قليلة.
ثالثا : سنتين ضمان بالنسبه لناس كتير ومنهم انا لما تكون مفتوحة احسن بكتير لأني ال 100000 اللي في العربيات التانيه هيخلصو معايه في سنه بالكتير
رابعا : اسعار الصيانه في عز العرب مش غاليه للدرجه دي ، وممكن تتأكد من الناس اللي معاهم جين2
واحب اوضحلك حاجه ، اني مش بتحمس لعربيه غير لما تكون تستاهل ، يعني مثلا لما كنت متحمس للجين2 كان بالنسبه للهاي لاين واللي مش هتنزل وكان بالمقارنه بسعرها ، والمازدا3 بردو ممتازه يعيبها فقط التوكيل الغير موجودج وانها واطيه وكمان شكلها هيتغير السنه الجايه ،
لكن ال C4 Facelift كنت اصلا بشوف تفاصيلها عشان واحد صاحبي ، ولما جمعت عنها معلومات كتير وعرفت مزاياها خاصة بعد التعديلات في الشكل والموتور ومدى جودة الخامات الخاصه بها وكمية الكماليات عالية التقنية ، خلتني فعلا مقتنع بيها جدا واعتقد انها احسن عربيه في فئتها السعريه واعلى شويه كمان ، وبجد مش لاقيلها عيب ، وعلى فكره العربيه دي شعبيتها بره رهيبه وباعت 1000000 عربيه في الأربع سنين اللي فاتو ، شوف بقه بعد التعديلات دي هتعمل ايه؟
بالنسبه لتغيير العربيه وسعر اعادة البيع ، كله بعد خمس سنين بيقل تقريبا نفس النسبه ، وانا اصلا هدفي اني اخلي العربيه معايا 10000 سنين مثلا ، وعشان كده بدور على حاجه عاليه في الكفائه والتكنولوجيا ،
عموما ارجو اني اكون بافيدك انت والأخرين ، والله ولي التوفيق