قرار يسمح بتعيين ابناء العاملين فى حالة تسوية العامل معاش مبكر قبل سن 50 سنة

الســلام عليكم و رحمة الله وبركاته

من زمان عملت بتاع 3 مواضيع كان نفسى فيها نعمل قسم مستقل خاص بأى افكار جديدة نطور بيها البلد
-- و راحت المواضيع لحالها --
المهم ، انا بقول المقدمة دى للتذكرة بس

فى موضوع منهم كان من مقترحاتى تقليل سن المعاش للموظفين الحكوميين لـ 55 بدل 60 .. تمهيدا لإنها تبقى 50 مثلا فى المستقبل البعيد
لإن كدا كدا العمر الافتراضى للمواطن المصرى قليل ، ما بين تلوث و أمراض ... الخ
زائد ان قدرته على العطاء برضه بتقل ، و قد يصبح عبء كمان أو ضرر إذا كان فى منصب قيادى

من ناحية تانية ، كل موظفين الحكومة بيجروا وراء تعيين ابنائهم فى الهيئة اللى شغالين فيها
بل ان الموضوع دا فى عديد من الوزارات رسمى و قانونى ........ إلى أن وردت اشاعات من قريب ان الموضوع دا اتلغى رسمى ( الله اعلم )

بالصدفة و انا بكلم واحدة معرفة ، لقيتها بتقولى انها سمعت اشاعة ان ممكن يفتحوا باب التعيين لأبناء العاملين مقابل معاش مبكر للوالدين ،، و انها نفسها يكون حقيقة و لو حصل هاتقدم على معاش مبكر فورا و تشغل بنتها

ايه رأيكم فى موضوع زى ده ، لو بجد يبقى اتضرب كام عصفور بحجر ؟؟؟
1- تقليل بطالة
2- دم جديد للمصالح الحكومية
3- احالة الكبار سناّ للمعاش برضاهم
4- توفير مبالغ للدولة

و يمكن فوايد اكتر كمان


عجبتنى جدا الفكرة دى ، و قولت اعرف آرائكم

وهايبقى تعيين لأبناء العاملين فى كل المصالح الحكوميه ولا مصالح حكوميه معينه ..

تعين ابناء العاملين ده انا مرشحهوش هيا ناقصة

الموضوع اللى انت بتتكلم فيه ..............من زماااااااااااان ايام مبارك
لدرجه انه كل ماجى وزير يحط التاتش بتاعته
ودخلوه مع قصه المعاش المبكر فى بعض وكانت هيصه


عمل كوراث مالهاش اول من اخر
ده غير انه .............................امتداد رسمى وصرييييييييييح لموضوع الواسطه والتظبيط


يعنى التظبيط بقى قانون فى مصر

وما زاااااااااااااال


وبكره تشوفوا مااااااااااسر :)

دة معناها مؤسسات الحكومه تتحول الى عائلات معينه تحكمها ولا يوجد دماء جديده وتدخل دائرة مغلقه .... طبعا غلط الكلام دة جمله وتفصيل .. فين فرص العمل للجميع لايوجد . فين الكفاءات لايوجد .. ولا جديد .
ولو فكر سعادتك كدة عملت ثورة ليه على مبارك وكان كم شهر يسلمها لابنه جمال وقامت القيامه اشمعنى هنا ايوة ودة لاء

لو حضرتك موظف
لو حضرتك والدك موظف
لبقي ليك حق تطلب ابناء العاملين
سؤال محيرني طب الي ابوه مش موظف في الحكومة لبقي ميتعينش عشان خاطر ابن الموظف يتعين ونرجع للكوسه و......
ياريت صاحب الموضوع يرد
ان شاء الله مصر هتتلغي الوسايط والقرف

اول مبتديت حياتي كلمت قريب ليه يشغلني في وظيفه بدون ذكر الجهة المهم قالي والله بناخد ابناء العاملين فقط تخيل انته بقي وهوا كان لسه مشغل ابنه وانا منفعش عشان ابويا مش شغال فيها

فكرة المعاش المبكر دي مفيدة لاعطاء فرصة للجيل الجديد .
اما ابناء العاملين دي مستفزة . كدة مكانش ليها لازمة الثورة علي مبارك و كان ابنة مسك البلد مكانه. ماهوه بردة شاب و دماء جديدة.
الفكر دة منتشر و العاملين فاكرين الشركة بتاعتهم و ان من حقهم تعيين اولادهم و كمان الغريبة ايام الثورة كان فيه مظاهرات بكدة في اماكن كتير، وده يخل بمبدأ تكافل الفرص.و معني كدا ان القطاع العام او الحكومي و منهم مثلا وزارة البترول و التليفزيون اللي عملوا مظاهرة لتعيين أولادهم سيصبحوا قطاع عائلي للاولاد و الاحفاد.

في البلد دي موظف الحكومه بيطلع ابنه موظف حكومه زيه و الباقي ولاد البطه السودا بغض النظر عن الكفاءات و الخبره

عدنـــــا لكم ،،

اولا شكرا على المشاركة و التفاعل

انا بحكيلكم عن معالجة لوضع قائم ... انا تم تعيينى ابناء عاملين بعد خروج والدتى على المعاش ( و بقرار رسمى ) مش واسطة أو غيره
دخلت الهيئة لقيت استاذ فلان ، و ابنه شغال فى قسم كذا ... و مدام فلانة و ابنها قى قسم كدا ، و هكذا .
القسم اللى انا فيه كله باستثناء 2 ابناء عاملين .. و منهم اللى اعتبروهم ابناء عاملين بالواسطة ( خاله هو اللى موظف ) .

و مازالت الدايرة دوارة بنفس النظام ،، كل 6 شهور أو سنة ينزل 3 مسابقات .. واحد ابناء عاملية داخلية ، و 2 مسابقات معلنة بس اللى بياخد المنصب اللى واسطته ظبطت الحوار بصرف النظر عن اى امتحانات أو مقابلات .

لكن لو المسابقة اللى تنزل يبقى فيها نسبة 25% ابناء عاملين .. و الباقى عادى ،، يبقى كدا نوعا ما اتحسنت الشروط


لكن لو عاوزين تلغوا " ابناء العاملين " يبقى تمام و حق مشروع ، بل واجب
لكن الاكثر اولوية - و لو ان الاتنين اولويات - يبقى الواسطة ،، اللى بيتدفع فيها لواحد فاسد علشان يشتغل
لإن الأولى مش حرام لكن التانية حرام ( الرشوة ) .

============
مش عاوز اقول ان المسابقات مالهاش لازمة ، و ان الوساطة هاتستمر علشان اغلب الوظائف الحكومية مش محتاجة لمهارة ذهنية .. اى واحد روتينى غبى ممكن يقوم بالوظيفة ، فأكيد هايدوروا على مقياس افضلية آخر .

و متااابع